އީރާނާ ދެކޮޅަށް އެމެރިކާއިން ކުރަމުންދާ ހަނގުރާމައަށް އަސްކަރީ އެއްވެސް ހައްލެއް ނެތް ކަމަށާއި، ހަނގުރާމަ ނިމުމަކަށް ގެނެވޭތޯ ކުރާ މަޝްވަރާތައް ވަނީ ކުރިއަށްް ނުގޮސް ތާށިވެފައި ކަމަށް އީރާނުގެ އެންމެ އިސް ޑިޕްލޮމެޓް އާދީއްތަ ދުވަހު ތަކުރާރުކޮށް ވިދާޅުވެއްޖެ އެވެ.
ފެބްރުއަރީ މަހުގެ ފަހުކޮޅު އެމެރިކާ އާއި އިޒްރޭލުން ފެށި ހަނގުރާމާގައި ވަރުގަދައަށް ހަމަލާތައް ދިން ނަމަވެސް ނަތީޖާއެއް ހާސިލް ނުކުރެވި ހަނގުރާމަ ވަނީ ދިގުލައިގެން ގޮސްފަ އެވެ. އަދި އެމެރިކާއިން ފަހަކަށް އައިސް ވަނީ އަސްކަރީ ހަރަކާތްތައް މަދުކޮށް، އިގްތިސާދީ ފިޔަވަޅުތަކަށް އިސްކަންދީފަ އެވެ. މައިގަނޑު މައްސަލައަކަށް ވެފައިވަނީ ގަލްފުގެ ތެލާއި ގޭސް އުފުލާ މުހިންމު މަގު ކަމަށްވާ ހޮރުމުޒު ކަނޑުއޮޅި ބަންދުކުރުމަށް އީރާނުން ކުރަމުންދާ މަސައްކަތެވެ.
"އަޅުގަނޑުމެންގެ ދުޝްމަނުން އަނެއްކާވެސް އަސްކަރީ ކުރިމަތިލުމުގެ މަގު އިހްތިޔާރުކޮށްފި ނަމަ، އަޅުގަނޑުމެންގެ ރައްދު ކުރިއަށްވުރެ ވަރުގަދަވާނެ. އަދި މިއަށްވުރެ ބޮޑު ބާރަކާ އެކު އަޅުގަނޑުމެންގެ ދިފާއުގައި މަސައްކަތްކުރާނަން،" ބޭރު ގައުމުތަކުގެ ސަފީރުންގެ ބައްދަލުވުމެއްގައި އީރާނުގެ ފޮރިން މިނިސްޓަރު އައްބާސް އަރާގްޗީ ވިދާޅުވި އެވެ.
އޭނާ ވިދާޅުވީ "އަސްކަރީ ހައްލެއް ނެތް، އަދި އާ ދަތިކުރުމުގެ ފިޔަވަޅުތަކުގެ މައްޗަށް ބިނާވެފައިވާ ހައްލެއްވެސް ނެތް" ކަމަށާއި، މައްސަލަ ނިންމޭނީ "އިންސާފާއި ހަމަހަމަކަމުގެ މައްޗަށް ބިނާވެފައިވާ މަޝްވަރާތަކުން އެކަނި" ކަމަށެވެ.
އީރާނާއި އެމެރިކާއިން ޖޫން މަހު ވަނީ ދާއިމީ ހައްލަކަށް ވާސިލުވުމުގެ އޮގަނައިޒޭޝަނަލް ފްރޭމްވޯކެއް އެކުލަވާލުމުގެ އެމްއޯޔޫއެއްގައި ސޮއިކޮށްފަ އެވެ. ނަމަވެސް ހޮރުމުޒު ކަނޑުއޮޅިން ދަތުރުކުރާ އުޅަނދުފަހަރަށް އީރާނުން ހަމަލާދޭން ފެށުމުން އެމެރިކާއިން އަނެއްކާވެސް ވަނީ އަސްކަރީ ހަރަކާތްތައް ފަށައިފަ އެވެ.ހަ ނގުރާމަ ފެށުނީއްސުރެ އީރާނުން ދަނީ އެ މުހިންމު ކަނޑުގެ މަގުގެ ކޮންޓްރޯލް ހޯދުމަށް މަސައްކަތްކުރަމުންނެވެ. އަދި އެ ގައުމުގެ ހުއްދައާ ނުލައި ދަތުރުކުރަން އުޅޭ އުޅަނދުފަހަރަށް ދަނީ ހަމަލާދެމުންނެވެ.
އެމެރިކާއިން ވަނީ އީރާނުގެ ބަނދަރުތަކާ ދެކޮޅަށް ބްލޮކޭޑެއް ގާއިމުކޮށް، އެ ބްލޮކޭޑާ ހިލާފުވާ ކަމަށް ބުނާ އުޅަނދުފަހަރަށް ހަމަލާދީފަ އެވެ.
އީރާނާއި އެމެރިކާގެ މަންދޫބުން ވަނީ ފާއިތުވި ހަފުތާގައި އދ.ގެ އާންމު މަޖިލީހުގެ ހަވާސާގައި ނުސީދާ މަޝްވަރާތަކެއް ބާއްވައިފަ އެވެ. އަދި ކަނޑުއޮޅި އަލުން ހުޅުވާލުމަށްޓަކައި އީރާނުން ވަނީ ހަތް ޝަރުތެއް ހުށަހަޅާފައިވާ ކަމަށް ވެސް ބުންޏެވެ. އީރާނުން އެދިފައިވާ ކަންތައްތަކުގެ ތެރޭގައި މުޅި މެދުއިރުމަތީގައި ހަމަލާތައް ހުއްޓާލުމާއި، ބޭރު ގައުމުތަކުގައި ފްރީޒްކޮށްފައިވާ އެގައުމުގެ ފައިސާ ދޫކޮށްލުމާއި، އީރާނުގެ ތެލުގެ ދާއިރާއަށް އަޅާފައިވާ ދަތިކުރުމުގެ ފިޔަވަޅުތައް އުވާލުމުގެ އިތުރުން އެމެރިކާގެ ކަނޑުގެ ބްލޮކޭޑް ނިމުމަކަށް ގެނައުން ހިމެނެ އެވެ. ނަމަވެސް ޓްރަމްޕް ވަނީ އެ ހުށަހެޅުން ގަބޫލު ނުކުރައްވައިފަ އެވެ. އެކަމަކު އިތުރު މަޝްވަރާތަކަށް ފުރުސަތު އޮންނާނެ ކަމަށާއި އަދި އަލުން އަސްކަރީ ހަރަކާތްތައް ފެށުމަށް ވެސް ތައްޔާރު ކަމަށް ވިދާޅުވި އެވެ.
އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަގާއީ އާދީއްތަ ދުވަހު ސިފަކުރެއްވި ގޮތުގައި އެމެރިކާގެ އެންމެ ފަހުގެ ހުށަހެޅުމަކީ "ނިއުކްލިއާ މައްސަލަތަކާ ގުޅޭގޮތުން ކުރިން ވެސް ހުށަހެޅި ހުށަހެޅުންތަކާ އެއްގޮތް" ހުށަހެޅުމެކެވެ.
"އަޅުގަނޑުމެން ވަނީ ހޮރުމުޒު ކަނޑުއޮޅީގެ މައްސަލައަށް އިސްކަންދޭކަން ސާފުކޮށް ބުނެދީފައި،" އޭނާ ވިދާޅުވި އެވެ. އަދި އެ ކަނޑުގެ މަގު އަލުން ހުޅުވާލެވޭނީ "އީރާނުގެ ވިޔަފާރި އުޅަނދުފަހަރަށް ކުރިމަތިކުރުވާ ހުރަސްތައް ނައްތާލައި، ދަތިކުރުމުގެ ފިޔަވަޅުތައް އުވާލުމުން" ކަމަށްވެސް ތަކުރާރުކުރެއްވި އެވެ.
އެމެރިކާ އާއި އިޒްރޭލުން ސިފަކުރާ ގޮތުގައި މިއީ އީރާނުން ނިއުކްލިއާ ހަތިޔާރު ހޯދުން ހުއްޓުވުމަށް ކޮންމެހެން ކުރަންޖެހޭ ހަނގުރާމައެކެވެ. ނަމަވެސް އީރާނުން ދަނީ އެފަދަ އަމާޒެއް އޮތްކަމަށް ކުރާ ތުހުމަތަށް އަބަދުވެސް އިންކާރުކުރަމުންނެވެ.