ރިޔާޟް (އޮކްޓޯބަރު 19) - ސައޫދީ އަރަބިއްޔާގައި ބޭއްވުމަށް ހަމަޖެހިފައިވާ ބޮޑު އިންވެސްޓްމަންޓް ކޮންފަރެންސް، ޔަމަނުގެ ހޫތީންގެ ހަމަލާތަކާ ގުޅިގެން ފަސްކުރަން ނިންމައިފި އެވެ.
މި ކަމާ ބެހޭ މައުލޫމާތު އެނގޭ ތިން މަސްދަރަކުން އޭއެފްޕީ އަށް ކަށަވަރުކޮށްދީފައިވާ ގޮތުގައި، މި މަހުގެ 26 އިން 29 އަށް ރިޔާޟްގައި ބޭއްވުމަށް ތައްޔާރުވަމުންދިޔަ "ފިއުޗާ އިންވެސްޓްމަންޓް އިނިޝިއެޓިވް" (އެފްއައިއައި) ކޮންފަރެންސް ތާވަލާ އެއްގޮތަށް ދެން ނުބޭއްވޭނެ އެވެ. އަދި މި ބައްދަލުވުން ދެން ބާއްވާނެ ވަކި ތާރީހެއް އަވަސް މުއްދަތެއްގެ ތެރޭގައި އިއުލާނު ނުކުރާނެ ކަމަށް ވެސް މަސްދަރުތަކުން ބުނެ އެވެ.
"ސަހަރާގެ ޑާވޯސް" ގެ ނަމުން މަޝްހޫރުވެފައިވާ މި ކޮންފަރެންސަކީ ދުނިޔޭގެ ނުފޫޒުގަދަ ވިޔަފާރިވެރިންނާއި ގައުމުތަކުގެ ވެރިން ބައިވެރިވާ މުހިންމު ހަރަކާތެކެވެ. ނަމަވެސް، މި ދުވަސްވަރު ރިޔާޟަށް ދަތުރުކުރުމުގެ ރިސްކު ނަގާނީ ކާކުތޯ، އޭއެފްޕީއާ ވާހަކަ ދެއްކި މަސްދަރުތަކުން ސުވާލު އުފައްދާފައިވެ އެވެ.
މި ކޮންފަރެންސް ފަސްކުރުމަކީ ބޭރުގެ އިންވެސްޓްމަންޓްތައް ހޯދުމަށާއި، ތެލަށް ބަރޯސާވާ މިންވަރު ކުޑަކޮށް އިގްތިސާދު ޑައިވާސިފައިކުރުމަށް ސައޫދީން ކުރަމުން އަންނަ މަސައްކަތްތަކަށް އެޅުނު ބޮޑު ހުރަހެކެވެ.
މި ނިންމުން ނިންމާފައި މިވަނީ، ހޫތީންގެ ހަމަލާތަކުގެ އަމާޒަކަށް ވެފައިވާ ރިޔާޟްގެ އިންޓަނޭޝަނަލް އެއާޕޯޓަށް މި މަހުގެ 10 ވަނަ ދުވަހު ދިން ހަމަލާއެއްގައި 13 މީހުން މަރުވެ، އެއާޕޯޓުގެ ހިދުމަތްތައް މުއްދަތެއް ނެތް ގޮތަށް މެދުކަނޑާލާފައިވަނިކޮށެވެ. މިއީ ފާއިތުވި ދިހަވަރަކަށް އަހަރުގެ ތެރޭގައި ސައޫދީއަށް ދިން އެންމެ ނުރައްކާތެރި ހަމަލާ އެވެ. -- އޭއެފްޕީ