އެމެރިކާ އާއި އީރާނާ ދެމެދު ކުރިއަށްދާތާ އަށް މަސް ދުވަސް ވެފައިވާ ހަނގުރާމަ ނިމުމަކަށް ގެނައުމަށްޓަކައި ޑިޕްލޮމެޓިކް އެއްބަސްވުމަކަށް އާދެވުމުގެ ފުރުސަތު ވަރަށް ބޮޑު ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
ޓްރަމްޕްގެ އަމިއްލަ ސޯޝަލް މީޑިއާ ޕްލެޓްފޯމް ކަމަށްވާ "ޓްރުތު ސޯޝަލް" ގައި ކުރެއްވި ޕޯސްޓެއްގައި ވިދާޅުވީ، އީރާނުން ވީހާވެސް އަވަހަކަށް މައްސަލަ ހައްލުކުރަން ބޭނުންވާ ކަމަށާއި، ސުލްހައިގެ އެއްބަސްވުމަކަށް އާދެވުން ގާތް ކަމަށެވެ. އެމެރިކާގެ މިޑްޓާމް އިލެކްޝަނާ ދިމާކޮށް ޓްރަމްޕް މިފަދަ މޭރަމަކުން ވާހަކަ ދެއްކެވިއިރު، މިއީ އިންތިހާބަށްފަހު އީރާނަށް ވަރުގަދަ އަސްކަރީ ހަމަލާތަކެއް ދޭނެ ކަމަށް ކުރިން ވިދާޅުވަމުން އައި އިންޒާރުތަކާ ހިލާފަށް، ޑިޕްލޮމެޓިކް ހައްލަކަށް ޓްރަމްޕް ވިސްނުން ބަދަލުކުރެއްވި ކަމުގެ ނިޝާނެކެވެ.
އީރާނުގެ ރައީސް މަސްއޫދު ޕެޒެޝްކިއަން ވެސް ވަނީ އެ ގައުމުގެ ރޫހީ ލީޑަރު، ސުލްހައިގެ ވާހަކަތަކައިގެން ކުރިއަށް ދިއުމުގެ ފުރިހަމަ އިހްތިޔާރު ސަރުކާރަށް ދެއްވާފައިވާ ކަމަށް ވިދާޅުވެފަ އެވެ. މިއާއެކު ދެ ގައުމުގެ ދެމެދުގައި ސުލްހައިގެ އާ އުއްމީދުތަކެއް ވަނީ އުފެދިފަ އެވެ.
މި ވާހަކަތަކާ ގުޅިގެން އެމެރިކާގެ ނައިބު ރައީސް ޖޭޑީ ވެންސް ވިދާޅުވީ، ގަތަރާއި ޕާކިސްތާން މެދުވެރިކޮށް އީރާނުގެ އޮފިޝަލުންނާ އެކު އެދެވޭ މަޝްވަރާތަކެއް ކުރިއަށްދާ ކަމަށެވެ. އަދި އީރާނުގެ ފޮރިން މިނިސްޓްރީގެ ތަރުޖަމާނު އިސްމާއީލް ބަގާއީ ވިދާޅުވި ގޮތުގައި، ޝަރުތުތައް ގަބޫލުކުރާ ނަމަ ހަފުތާއެއްގެ ބަދަލުގައި ދެ ދުވަސް ތެރޭގައި ހޮރްމޫޒް ކަނޑުއޮޅި ހުޅުވާލުން ހިމެނޭ ގޮތަށް ސުލްހައިގެ ފްރޭމްވޯކް ތަންފީޒު ކުރަން އީރާނުން އޮތީ ތައްޔާރަށެވެ.
މި ސުލްހައިގެ ސިގްނަލްތަކާ އެކު ދުނިޔޭގެ ބާޒާރުގައި ތެލުގެ އަގުތައް ވަނީ ހަތް ޕަސެންޓަށް ވުރެ ދަށަށް ގޮސްފަ އެވެ.
ނަމަވެސް، ދެ ގައުމުގެ ދެމެދުގައި އަދިވެސް ބޮޑެތި ހިޔާލުތަފާތުވުންތަކެއް އެބަހުއްޓެވެ. އެމެރިކާއިން ބޭނުންވަނީ އީރާނުގެ ނިއުކްލިއާ ޕްރޮގްރާމް އެއްކޮށް ހުއްޓާލުމަށެވެ. އީރާނުން އެދެނީ އެ ގައުމާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލައި، ހިފަހައްޓާފައިވާ ފައިސާ ދޫކޮށްލުމަށެވެ. މީގެ އިތުރުން، އިޒްރޭލުން ލުބުނާނުގައި ހިޒްބުالله އާ ދެކޮޅަށް ކުރާ ހަނގުރާމަ ހުއްޓާލުން ވެސް އީރާނުގެ ޝަރުތުތަކުގެ ތެރޭގައި ހިމެނެ އެވެ.
މި އެއްބަސްވުމަށް އެމެރިކާގެ ބައެއް ރިޕަބްލިކަން ސެނެޓަރުންގެ ފާޑުކިޔުންތައް އަމާޒުވަމުންދާއިރު، މިއީ އޮބާމާގެ ދައުރުގައި ވެވުނު ނިއުކްލިއާ މުއާހަދާ ފަދަ ބަލިކަށި އެއްބަސްވުމަކަށް ވެދާނެ ކަމުގެ ކަންބޮޑުވުން އެ ބޭފުޅުން ދަނީ ފާޅުކުރައްވަމުންނެވެ.