ރިޔާޟް (ނޮވެމްބަރު 21) - ޔަމަނުގެ ހޫތީ ހަނގުރާމަވެރިންނާ ދެކޮޅަށް ހަނގުރާމަކުރާ ސައުދީ އަރަބިއްޔާ އިސްވެ އޮންނަ ކޯލިޝަނުން ހިންގި "ހާއްސަ އޮޕަރޭޝަނެއް" ގެ ބަދަލުހިފުމުގެ ގޮތުން، ހޫތީން މިއަދު ސައުދީގެ ވެރިރަށް ރިޔާޟަށް ހަމަލާތަކެއް ދީފި އެވެ.
މިދިޔަ ހޫނު މޫސުމުގައި ޔަމަނުގެ ދާހިލީ ހަނގުރާމަ އަލުން ފެށުނު ފަހުން ސައޫދީއަށް އަމާޒުވާ ހަމަލާތައް ވަނީ ވަރަށް ބޮޑަށް އިތުރުވެފަ އެވެ. މި ހަނގުރާމައިގައި ސައުދީން ވާގިވެރިވަނީ ބައިނަލްއަގްވާމީ ގޮތުން ބަލައިގެންފައިވާ ޔަމަނުގެ ސަރުކާރަށެވެ.
ރިޔާޟަށް ވައިގެ މަގުން ނުރައްކާތެރި ހަމަލާއެއް އަތުވެދާނެ ކަމުގެ އިންޒާރު ކަމާބެހޭ ފަރާތްތަކުން ދިންތާ މާގިނައިރުތަކެއް ނުވަނީސް ދެ ގޮވުމެއްގެ އަޑު އިވުނު ކަމަށް އޭއެފްޕީގެ ނޫސްވެރިއަކު ވަނީ ރިޕޯޓްކޮށްފަ އެވެ. ނަމަވެސް ފަހުން އެ އިންޒާރު ވަނީ އުވާލައިފަ އެވެ. ސައުދީ ކޯލިޝަނުން ފަހުން ބުނީ ރިޔާޟަށް އަމާޒުކޮށް ހޫތީން ފޮނުވާލި ތިން ބެލިސްޓިކް މިސައިލް ވައިގެ ތެރޭގައި ގޮއްވާލައި ނައްތާލާފައިވާ ކަމަށެވެ.
އީރާނުގެ މަދަދު ލިބޭ ހޫތީން އެކްސްގައި ބުނީ ރިޔާޟް ހިމެނޭހެން ސައޫދީގެ އެކި ސަރަހައްދުތަކަށް ހަމަލާ ދެމުންދާ ކަމަށެވެ. މި ހަމަލާތައް ދީފައިވަނީ ރަތް ކަނޑުގެ އައްސޭރީގައި އޮންނަ ޔަމަނުގެ ހުދައިދާ ބަނދަރަށާއި އެހެން ބައެއް ތަންތަނަށް ކޯލިޝަނުން އިއްޔެ ދިން ހަމަލާތަކުގެ ބަދަލު ހިފާނެ ކަމަށް ހޫތީން އިންޒާރު ދިނުމަށް ފަހުގަ އެވެ.
ކޯލިޝަންގެ ތަރުޖަމާނު ތުރުކީ އަލް މާލިކީ ވިދާޅުވި ގޮތުގައި އިއްޔެ ހިންގި "ހާއްސަ އޮޕަރޭޝަނުގައި" ހަމަލާދީފައިވަނީ ހުދައިދާ ބަނދަރު މެދުވެރިކޮށް ހަތިޔާރާއި ބެލިސްޓިކް މިސައިލް އެތެރެކޮށް ސްމަގްލް ކުރުމަށް ހޫތީން ބޭނުންކުރާ ވަސީލަތްތަކަށެވެ. މީގެ އިތުރުން ސަންއާ، ސާދާ އަދި ތާއިޒް ގަވަރުނޭޓްގައި ހުރި ހޫތީންގެ މިސައިލާއި ޑްރޯން އުފައްދާ މަރުކަޒުތަކަށާއި ހަތިޔާރު ގުދަންތަކަށް ވެސް ހަމަލާދީފައިވާ ކަމަށް އޭނާ ވިދާޅުވި އެވެ.
ވޭތުވެދިޔަ 24 ގަޑިއިރުގެ ތެރޭގައި ކޯލިޝަނުން ދިން ހަމަލާތަކުގައި 41 މީހުން މަރުވެފައިވާ ކަމަށް ހޫތީން ބުނާއިރު، ޔަމަނުގެ ސަރުކާރު ސިފައިން ބުނީ ވައިގެ ހަމަލާތަކާއި ބޮޑުބަޑީގެ ހަމަލާތަކުގައި ހޫތީންގެ 193 ހަނގުރާމަވެރިން މަރުވެ ނުވަތަ ޒަހަމްވެފައިވާ ކަމަށެވެ. ނަމަވެސް މި އަދަދުތައް މިނިވަންކަމާ އެކު ކަށަވަރު ކުރެވޭ ގޮތެއް ނުވެ އެވެ.
ކޯލިޝަންގެ ތަރުޖަމާނު ވިދާޅުވި ގޮތުގައި ޔަމަނުގެ ބޯޑަރާ ކައިރީގައި އޮންނަ ސައޫދީގެ ޖީޒާން ސަރަހައްދަށް އަމާޒުކުރި ދެ ބެލިސްޓިކް މިސައިލް ވެސް ވަނީ ވައިގެ ތެރޭގައި ނައްތާލާފަ އެވެ. އަދި އޭގެ ބައިތައް އަލް ޝުގައިގް ސަރަހައްދަށް ވެއްޓިފައިވާ ކަމަށް އޭނާ ވިދާޅުވި އެވެ. ނަމަވެސް ހޫތީންގެ އަސްކަރީ ތަރުޖަމާނު ބުނީ އަލް ޝުގައިގް ޕަވާ ސްޓޭޝަނަށާއި ޖީޒާން ބަނދަރަށް ދިން ސީދާ ހަމަލާތަކުގައި އެ ތަންތަނަށް ބޮޑެތި ގެއްލުންތަކެއް ލިބިފައިވާ ކަމަށެވެ.
ހުދައިދާ ބަނދަރު ހުސްކުރުމަށް ކޯލިޝަނުން އާންމުންނަށް އިންޒާރު ދިނުމާ ގުޅިގެން، ހޫތީން ވަނީ ސައޫދީގެ ޖިއްދާ ބަނދަރާއި ރަތް ކަނޑުގެ އައްސޭރީގައި ހުރި ސައުދީގެ އެހެން ބަނދަރުތަކަށް ހަމަލާދޭނެ ކަމުގެ އިންޒާރު ދީފަ އެވެ. އަދި ޖިއްދާ ބަނދަރު ބޭނުންކުރާ ޝިޕިން ކުންފުނިތަކަށް އެތަން ދޫކޮށް ދިއުމަށް އީމެއިލް މެދުވެރިކޮށް ހޫތީން ވަނީ އަންގައިފަ އެވެ.
މީގެ އިތުރުން، ކުރިއަށް އޮތް ގަޑިތަކުގައި ސައުދީގެ ވައިގެ ސަރަހައްދަކީ ހޫތީންގެ އަސްކަރީ އޮޕަރޭޝަންތައް ހިންގާނެ މައިދާނަކަށް ވާނެތީ، މައްކާ އާއި މަދީނާގެ މަތިން ވައިގެ ސަރަހައްދު ފިޔަވައި ސައޫދީގެ އެހެން ހުރިހާ ވައިގެ ސަރަހައްދުތަކަކީ ރައްކާތެރި ނޫން ތަންތަން ކަމަށް ބުނެ ހޫތީން ވަނީ އެއާލައިންތަކަށް އިންޒާރު ދީފަ އެވެ. އަދި ރިޔާޟްގައި ހުންނަ ކިންގް އަބްދުﷲ ފައިނޭންޝަލް ޑިސްޓްރިކްޓަކީ "އަސްކަރީ އަމާޒެއް" ކަމަށް ބުނެ އެ ސަރަހައްދާ ދުރުގައި ތިބުމަށް ވެސް ވަނީ އަންގައިފަ އެވެ.
ހަތަރު އަހަރު ވަންދެން ކުރި ހަނގުރާމަ ހުއްޓާލުމުގެ އެއްބަސްވުން މިދިޔަ ޖުލައި މަހު ރޫޅުމާ ގުޅިގެން ދެ ފަރާތުން ވެސް ދަނީ ވަރުގަދަ ހަމަލާތަކެއް ބަދަލުކުރަމުންނެވެ. ހޫތީން މިދިޔަ ސެޕްޓެމްބަރު މަހު ފެށި ވަރުގަދަ ހަމަލާތަކުގައި ބޮޑު ސަރަހައްދެއް ހިފައި، ޔަމަނުގެ ސަރުކާރުގެ ވަގުތީ ވެރިރަށް އަދަންއާ ވަނީ ވަރަށް ބޮޑަށް ކައިރިވެފަ އެވެ. ސައޫދީ ކޯލިޝަނުން 2015 ވަނަ އަހަރު ޔަމަނުގެ ހަނގުރާމައިގެ ތެރެއަށް ވަން ފަހުން މިހާތަނަށް އެތައް ލައްކަ ބަޔަކު މަރުވެ، މި ވަގުތު އޮތް އެންމެ ބޮޑު އެއް އިންސާނީ ކާރިސާ ވަނީ އުފެދިފަ އެވެ. މި ހަމަލާތަކާ ގުޅިގެން އދ. އިން އިއްޔެ ވަނީ ކަންބޮޑުވުން ފާޅުކޮށްފަ އެވެ. -- އޭއެފްޕީ