ބޯލްޓަންގެ ފޮތް ނެރުން ހުއްޓުވުމުގެ އަމުރެއް ކޯޓުން ނުދިން

ވޮޝިންޓަން (ޖޫން 21) - އެމެރިކާގެ ކުރީގެ ނޭޝަނަލް ސެކިއުރިޓީ އެޑްވައިޒަރު ޖޯން ބޯލްޓަން ވައިޓް ހައުސްގައި ހޭދަކުރެއްވި މުއްދަތުގައި ކަންކަން ހިނގާފައިވާ ގޮތުގެ މައްޗަށް އޭނާ ލިޔުއްވި ފޮތް ނެރުން ހުއްޓުވަން ޖަސްޓިސް ޑިޕާޓްމަންޓުން ކޯޓަށް ދިޔަ ނަމަވެސް ފޮތް ނެރުން ހުއްޓުވުމުގެ އަމުރެއް ކޯޓުން ނުދިނެވެ.

ވޮޝިންޓަން ޑީސީ ޑިސްޓްރިކްޓް ޖަޖް ރޯއިސް ލަމްބާތު ވިދަޅުވީ ފޮތުގައި ގައުމީ ސަލާމަތަށް ނުރައްކާ ވާހަކަތައް ހުރި ކަމަށް ބެލެވުނު ނަމަވެސް ފޮތް ހުއްޓުވުން މިހާރު މާލަސްވެއްޖެ ކަމަށެވެ. ފޮތް ޗާޕްކޮށް އެތައް ހާސް ކޮޕީއެއް މިހާރު ވަނީ ދުނިޔޭގެ އެކި ގައުމުތަކަށް ފޮނުވައިފަ އެވެ. ބައެއް މީޑިއާތަކުން މިހާރު ވަނީ ފޮތުގެ ބައިތައް ޝާއިއު ކުރަން ވެސް ފަށައިފަ އެވެ. ފޮތުގެ ޕަބްލިޝާ ވެސް ބުނެފައި ވަނީ އެތައް ހާސް ކޮޕީއެއް މިހާރު ދުނިޔޭގެ އެކި ގައުމުތަކަށް ފޮނުވާފައިވާ ކަމަށެވެ. ފަނޑިޔާރުގެ ނިންމުމަކީ ބޯލްޓަން ލިބިވަޑައިގަތް ކާމިޔާބީއެކެވެ.

ޖަސްޓިސް ޑިޕާޓްމަންޓުގެ ވަކީލުން ކޯޓުގައި ބުނެފައި ވަނީ ފޮތް ނެރުމުގެ ކުރިން އެ ފޮތުގައި ސިއްރު މައުލޫމާތުތައް ވައިޓް ހައުސް އިން ރިވިއު ކުރުމުގެ ފުރުސަތު ބޯލްޓަން ދެއްވާފައި ނުވާ ކަމަށާ އަދި ސިއްރު މައުލޫމާތު ފޮތުގައި ހިމަނައިފައި ނުވާނެކަން ބޯލްޓަން ޔަގީންކޮށްދީފައި ވެސް ނުވާ ކަމަށެވެ. ބޯލްޓަންގެ ވަކީލުން ބުނެފައި ވަނީ ފޮތުގައި ހުރި ބައިތައް ވަނީ ވަރަށް ފަރުވާތެރިކަމާ އެކު ބަލައިފައި ކަމަށާއި ހަމައެކަނި މައްސަލައަކީ ލިޔުންތަކާ މެދު ރައީސް ޑޮނަލްޑް ޓްރަމްޕް ހިތްހަމަޖެހިވަޑައިނުގަތުން ކަމަށެވެ.

"ދަ ރޫމް ވެއާ އިޓް ހެޕަންޑް" ގެ ނަމުގައި ލިޔެފައިވާ 577 ސަފުހާގެ ފޮތް ނެރުމަށް ހަމަޖެހިފައި ވަނީ މި މަހު 23 ވަނަ ދުވަހު އެވެ. ފޮތުގައި ބޯލްޓަން ވަނީ ވަރަށް ގިނަ ތުހުމަތުތައް ކޮށްފަ އެވެ. އޭގެ ތެރޭގައި އިންތިޚާބު ކާމިޔާބު ކުރަން ޗައިނާގެ އެހީ ހޯދަން ޓްރަމްޕް އުޅުއްވި ކަމަށް ލިޔުއްވާފައިވެ އެވެ.

ޓްރަމްޕް ވިދާޅުވެފައި ވަނީ ބޯލްޓަން ވަނީ ގާނޫނާޚިލާފުވެފައި ކަމަށާއި އެކަމުގެ އަގު އޭނާ އަދާކުރައްވަން ޖެހޭނެ ކަމަށެވެ. އަދި ފަތުގައި ވަނީ "ދޮގާއި ފޭކް ވާހަކަތައް" ކަމަށް ވިދާޅުވި އެވެ.

ބޯލްޓަން ވައިޓް ހައުސްގެ މަގާމަށް ވަޑައިގެންނެވީ އެޕްރީލް 2018 ގަ އެވެ. މަގާމުން ވަކިވެވަޑައިގެންނެވީ ޖެހިގެން އައި އަހަރުގެ ސެޕްޓެމްބަރު މަހު އެވެ. ނޭޝަނަލް ސެކިއުރިޓީ އެޑްވައިޒަރުގެ މަގާމުން އިސްތިއުފާ ދެއްވީ ކަމަށް ބޯލްޓަން ވިދާޅުވި ނަމަވެސް ޓްރަމްޕް ވިދާޅުވެފައި ވަނީ ޚިޔާލު ތަފާތުވެގެން އޭނާ މަގާމުން ދުރުކުރީ ކަމަށެވެ.