ޓްރީ ޓޮޕް ހޮސްޕިޓަލްގެ ހެލްތު ކޭމްޕް: ކުޑަހުވަދޫން 400 އެއްހާ މީހުން ޑޮކްޓަށް ދެއްކި

ޓްރީ ޓޮޕް ހޮސްޕިޓަލުން އިސް ނަގައިގެން ދ. ކުޑަހުވަދޫގައި މިދިޔަ ހަފުތާގައި ބޭއްވި ހެލްތު ކޭމްޕުގައި 400 އެއްހާ މީހުން ޑޮކްޓަރަށް ދެއްކި ކަމަށް އެ ހޮސްޕިޓަލުން މިއަދު ބުނެފި އެވެ.

މި އަހަރުގެ ދެ ވަނަ ކޮމިއުނިޓީ ހެލްތު އިނީޝިއޭޓިވްގެ ގޮތުގައި ކުޑަހުވަދޫގައި ޓްރީ ޓޮޕް ހޮސްޕިޓަލުން ހެލްތު ކޭމްޕް ބޭއްވީ މިދިޔަ ހަފުތާ ބަންދުގަ އެވެ.

ޓްރީ ޓޮޕް ހޮސްޕިޓަލުގެ 8 ޑޮކްޓަރަކު ބައިވެރިވެގެން ހުކުރު ދުވަހާއި ހޮނިހިރު ދުވަހު ބޭއްވި އެ ކޭމްޕަށް ބޮޑު ތަރުހީބެއް ލިބުނު ކަމަށް އެ ހޮސްޕިޓަލުން ބުންޏެވެ.

އަންހެނުންގެ ސިއްހަތާއި ދަރިމައިވުމާ ގުޅޭ ހާއްސަ މައުލޫމާތު ސެޝަނެއް އެ ބަލިތަކާ ގުޅޭ ކޮންސަލްޓަންޓު ޑރ. ޒާކިޔާ އަހުމަދު އެ ކޭމްޕުގައި ކުރިިއަށް ގެންދިޔަ އެވެ.

ޓްރީ ޓޮޕް ހޮސްޕިޓަލްގެ ޑޮކްޓަރުންގެ ޓީމުގައި އަންހެނުންގެ ބަލިތަކާއި ދަރިމައިވުމުގެ ބަލިތަކުގެ ކޮންސަލްޓަންޓު ޑރ. ޒާކިޔާގެ އިތުރުން ކަށީގެ ބަލިތަކުގެ ކޮންސަލްޓަންޓު ޑރ. އަލީ މުޒްނީ އާއި ކަށީގެ ބަލިތަކުގެ ކޮންސަލްޓަންޓު (ކޮނޑުހުޅާއި ކުޅިވަރުގެ އަނިޔާތަކަށް ހާއްސަ) ޑރ. މެގްނަސް އޮލޮފް އޮޑްކްވިސްޓް ހިމެނެ އެވެ. އަދި ކަރުންމަތީގެ ބަލިތަކުގެ ކޮންސަލްޓަންޓު ޑރ. ޗަންދްރަޝޭކަރު ރަވާލް އާއި ކުޑަކަމުދާ ބަލިތަކުގެ ކޮންސަލްޓަންޓު ޑރ. މެހްމެޓް އޮޑާ އާއި ހަމުގެ ބަލިތަކުގެ ކޮންސަލްޓަންޓު ޑރ. އަނޫ އަގްރަވާލް އަދި ލޮލުގެ ބަލިތަކުގެ ކޮންސަލްޓަންޓު ޑރ. އަރްޗަނާ ޝަރްމާ އާއި ޖެނެރަލް ސާޖަން ޑރ. އުކްތަމް އަބްދުއްލައެވް ވެސް އެ ޓީމުގައި ހިމެނެ އެވެ.

މި ހެލްތު ކޭމްޕަކީ ކުޑަހުވަދޫގައި ހުންނަ އަތޮޅު ހޮސްޕިޓަލާއި އަތޮޅު ކައުންސިލް އަދި ކުޑަހުވަދޫ ކައުންސިލާއި ކުޑަހުވަދޫ އަންހެނުންގެ ތަރައްގީ އަށް މަސައްކަތްކުރާ ކޮމިޓީގެ އެހީއާ އެކު ކުރިއަށް ގެންދިޔަ ކޭމްޕެކެވެ.

ރާއްޖޭގެ އެކި ހިސާބުތަކުގައި ދިރިއުޅޭ މީހުންނަށް ޓްރީ ޓޮޕް ހޮސްޕިޓަލްގެ ހިދުމަތްތައް ފޯރުކޮށްދިނުމުގެ ގޮތުން މިފަދަ އެކި ހެލްތު ކޭމްޕުތައް އަންނަނީ ބާއްވަމުންނެވެ.