ބީއެމްއެލް އިސްލާމިކްގެ ކޮމިއުނިޓީ އިމްޕެކްޓް ގްރާންޓްގެ ދަށުން ބޭންކުން ހިންގި ފަސް ޕްރޮޖެކްޓެއް ނިންމާލައިފި
ބީއެމްއެލް އިން ބުނީ އެ ފަސް ޕްރޮޖެކްޓް ނިންމައި، އިތުރު ދެ ޕްރޮޖެކްޓެއްގެ މަސައްކަތް މިހާރު ވެސް ކުރިއަށް ދާ ކަމަށެވެ.
އެ ގްރާންޓަކީ ބީއެމްއެލް އިސްލާމިކްގެ 10 ވަނަ އަހަރީ ދުވަހާ ގުޅިގެން ހިންގި ހަރަކާތްތަކުގެ ތެރޭގައި ހިމެނޭ ގްރާންޓެކެވެ. އެ ގްރާންޓުގެ ދަށުން ހިންގާފައިވަނީ ތައުލީމާއި ތިމާވެއްޓާ ގުޅުންހުރި އިޖުތިމާއީ ޕްރޮޖެކްޓްތަކެވެ.
ގްރާންޓްގެ ދަށުން ނިންމި 5 ޕްރޮޖެކްޓަކީ:
- ސ. އަތޮޅު ތައުލީމީ މަރުކަޒުގައި ސްޓަޑީ އަދި ރީޑިން އޭރިއާއެއް ގާއިމުކުރުން.
ބީއެމްއެލް އިން ބުނި ގޮތުގައި އެތަން ހިޔާކޮށް، ވޯޓާ ރެސިސްޓެންޓް ބެންޗާއި މޭޒެއް ބަހައްޓާފައިވެ އެވެ. އަދި އެތަން ޑިޒައިންކުރީ ހަމަހިމޭން މާހައުލެއްގައި ފޮތް ކިޔުމާއި، ގިނަ ކުދިން އެއްވެގެން ކިޔަވަން އެކަށީގެންވާ ގޮތަށް އަދި ވަށައިގެން ގުދުރަތީ ފެހިކަން އޮންނަ ގޮތަށެވެ.
- ތ. އަތޮޅު މަދަރުސާގެ ކުޅޭ ސަރަހައްދުގެ ފާރު ރޭނުމާއި ފެން އަދި ވެލި ކުޅޭ ސަރަހައްދެއް ގާއިމުކުރުން
އެ ޕްރޮޖެކްޓްގެ މަގްސަދަކީ ކުދިންނަށް އުފާވެރި އަދި އެކަށީގެންވާ މާހައުލެއް ގާއިމް ކުރުމެވެ.
- ގދ. އަތޮޅު ސްކޫލުގައި ބެންޗްތަކެއް ގާއިމުކުރުން
ބީއެމްއެލް އިން ބުނިގޮތުގައި އެއީ ބެލެނިވެރިންނަށާއި ސްކޫލަށް ޒިޔާރަތްކުރާ ފަރާތްތަކަށާއި މުވައްޒަފުންނާއި ދަރިވަރުންނަށް އިށީނދެލައިގެން ތިބެވޭނެ ފަސޭހަ އިންތިޒާމެއް ހަމަޖައްސާފައިވާ ތަނެކެވެ. އެއީ ސްކޫލްގެ މާހައުލަކީ އެންމެންނަށް ވެސް ހިތްހަމަޖެހޭ ފަދަ ތަނަކަށް ހެދުމުގެ ގޮތުން ކުރި މަސައްކަތެއް ކަމަށް ވެސް އެ ބޭންކުން ބުންޏެވެ.
- ދަރުމަވަންތަ ހޮސްޕިޓަލުގައި 'ސްޓޫޑަންޓް ރިސޯސް ހަބް' އެއް ގާއިމުކޮށް މެޑިކަލް ދަރިވަރުންނަށް އެހީތެރިވުން:
ދަރުމަވަންތަ ހޮސްޕިޓަލުގައި ސިއްހީ ދާއިރާއިން ކިޔަވާ ދަރިވަރުންނަށް ހާއްސަކޮށްފައިވާ ސަރަހައްދުގައި ގާއިމުކުރި އެ ހަބްގައި މުހިންމު މެޑިކަލް ފޮތްތައް ހިމެނޭ ފޮތް ހަރުގަނޑަކާއި 'ތްރީޑީ އެނަޓޮމީ އެޓްލަސް ސަބްސްކްރިޕްޝަން ފަދަ ޑިޖިޓަލް ވަސީލަތްތައް ހިމެނެ އެވެ. އޭގެ އިތުރުން ކިޔެވުމާއި ދިރާސާކުރުމަށް ބޭނުންވާ މައިކްރޮސްކޯޕްތަކާއި ބައިނޮކިއުލާ މައިކްރޮސްކޯޕް އަދި އިލެކްޓްރޯނިކް ސްކޭލް ފަދަ ލެބޯޓްރީ ސާމާނު ވެސް އެ ހަބްގައި ލިބެން ހުރެއެވެ.
- މުރައިދޫ ސްކޫލުގައި ވޯކްވޭއެއް ގާއިމުކުރުން
އެ މަޝްރޫއުގެ ބޭނުމަކީ ބޭންކުން ބުނިގޮތުގައި ދަރިވަރުންނާއި މުދައްރިސުން އަދި ބެލެނިވެރިންނަށް ކްލާސްރޫމްތަކާއި އިދާރީ އޮފީސްތަކާއި ބޭރުގެ ސަރަހައްދުތައް ގުޅުވައިދޭ ރައްކާތެރި މަގެއް ފޯރުކޮށްދިނުމެވެ. އެ މަގުގެ ސަބަބުން ކޮންމެ މޫސުމެއްގައި ވެސް ފަސޭހައިން ހިނގާ ބިނގާވެ އުޅެވޭނެކަން ކަށަވަރުވެ، ސްކޫލްގެ މާހައުލަކީ ރައްކާތެރި ތަނަކަށް ވާނެ ކަމަށް ވެސް ބީއެމްއެލް އިން ބުންޏެވެ.