ކޮންމެ ދިވެއްސަކަށް ފައިދާ ބަހާ ގޮތަށް ސަރުކާރުން 10 ރިސޯޓު ހެދުމަކީ، އަނެއްކާ ވެސް ރާއްޖޭގެ ޓޫރިޒަމަށް އަންނާނެ ބޮޑު ބަދަލެއް ކަމަށް ޓޫޜިޒަމް ދާއިރާގެ އެންމެ ތަޖުރިބާކާރު އެއް ވިޔަފާރިވެރިޔާ އަދި ކްރައުން ކުންފުނީގެ ޗެއާޕާސަން ހުސައިން އަފީފު (ޗަމްޕާ އަފީފު) ރޭ ވިދާޅުވެއްޖެ އެވެ.
ރާއްޖޭގެ ޓޫރިޒަމް ދުވަސް ފާހަގަކުރުމަށް ބޭއްވި ރަސްމިއްޔާތުގައި އަފީފު ވިދާޅުވީ، ސަރުކާރުން އިއުލާން ކޮށްފައިވާ ގޮތަށް 10 ރިސޯޓު ހަދައި، އޭގެ ފައިދާ ދިވެހިންނަށް ބެހުމަކީ ބޮޑު ބަދަލެއް އެ ދާއިރާއިން ފެންނާނެ ކަމެއް ކަމަށެވެ.
"މިކަމުގައި ބައިވެރިވާން ވެސް ބޭނުން. އަދި މި މަޝްރޫއު ކާމިޔާބުވާނެ ކަމަށް ވަރަށް ބޮޑަށް އުންމީދު ކުރަން،" އަފީފު ވިދާޅުވި އެވެ.
ސަރުކާރުގެ ކުންފުންޏަކުން ކުރިއަށް އޮތް ތިން އަހަރުގެ ތެރޭގައި 10 ރަށެއް ރިސޯޓެއްގެ ގޮތުގައި ތަރައްގީ ކުރަން ނިންމާފައިވާ ކަމަށާއި އެ އިން ލިބޭ ފައިދާއިން ކޮންމެ ދިވެއްސަކަށް އަހަރަކު 400 ޑޮލަރު ދޭން ފަށާނެ ކަން ސަރުކާރުން އިއުލާންކުރީ މި އަހަރުގެ ކުރީކޮޅު އެވެ. މިދިޔަ ފެބްރުއަރީ މަހު ރައްޔިތުންގެ މަޖިލިސް މި އަހަރަށް ހުޅުވުމުގެ ޖަލްސާގައި ރިޔާސީ ބަޔާން އިއްވަވަމުން ރައީސް ޑރ. މުހައްމަދު މުއިއްޒު ވިދާޅުވީ، އެ މަޝްރޫއުގެ ދަށުން ހަދާ 10 ރިސޯޓުގެ ހިއްސާދާރުންނަކީ ދިވެހިން ކަމަށް ގާނޫނަކުން ހަމަޖައްސާނެ ކަމަށެވެ.
އަފީފު ރޭ ފާހަގަކުރެއްވި ގޮތުގައި، ޓޫރިޒަމް ދާއިރާ މިހާ ހިސާބަށް އައީ ސަރުކާރާއި އަމިއްލަ ފަރާތްތައް ގުޅިގެން ކުރި މަސައްކަތުންނެވެ ކުރިއަށް އޮތްތަނުގައި ވެސް ދާއިރާ ކުރިއަށް ގެންދެވޭނީ އެގޮތުގެ މަތިން ކަމަށް އޭނާ ވިދާޅުވި އެވެ.
ދާއިރާ ކުރިއަށް ގެންދިއުމަށް، މިދިޔަ ދުވަސްތަކުގައި ދަސްވި، ފިލާވަޅުތައް ބޭނުންކުރަން ޖެހޭ ކަމަށް ވެސް އަފީފު ވިދާޅުވި އެވެ.
އަފީފު ވިދާޅުވީ، ޓޫރިޒަމް ދާއިރާ ކުރިއަށް ގެންދަނީ، އެ ދާއިރާގެ އެކި ފެންވަރުގައި މަސައްކަތްކުރާ މުވައްޒަފުންގެ ބުރަ މަސައްކަތުން ކަމަށާއި އައިލާއާ ދުރުގައި އެ މުވައްޒަފުން ކުރާ މަސައްކަތްތައް ފާހަގަކުރައްވާ ކަމަށެވެ.