ކުއްލި ނުރައްކަލުގެ ހާލަތު އިއުލާން ކޮށްފައި އޮތުމުން ރާއްޖޭގެ ޓޫރިޒަމަށް ބޮޑެތި ގެއްލުންތަކެއް ވަމުން ދާތީ، އެ ހާލަތު އުވާލުމަށް ލިވްއަބޯޑު އެސޯސިއޭޝަން (ލޭމް) އިން މިއަދު ގޮވާލައިފި އެވެ.
ލޭމުން ނެރުނު ބަޔާނެއްގައި ވަނީ، ރާއްޖެ ބޮއިކޮޓް ކުރުމަށް އެކި ފަރާތްތަކުން ހިންގާ ކެމްޕެއިން ވެސް ހުއްޓާލުމަށް އެދިފަ އެވެ. އަދި އެއީ ރާއްޖޭގެ ސިޔާސީ ހަލަބޮލި ކަމުގެ ތެރެއިން ފެށުނު ކަމަކަށް ވާއިރު، ސިޔާސީ ދާއިރާގެ ހުރިހާ ފަރާތްތަކުން ވެސް ޒިންމާދާރު ކަމާއެކު ޓޫރިޒަމް އިންޑަސްޓްރީގެ ދިފާއުގައި މަސައްކަތް ކުރުމަށް ވެސް ލޭމުން ވަނީ ގޮވާލައިފަ އެވެ.
ކުއްލި ނުރައްކަލުގެ ހާލަތު އުވާލުމަށް ލޭމުން ގޮވާލިއިރު، އިއްޔެ ވަނީ އެ ހާލަތު 30 ދުވަހަށް އިތުރު ކުރުމަށް ރައްޔިތުންގެ މަޖިލީހުން ފާސްކޮށްފަ އެވެ.
"ރާއްޖޭގައި ހިނގަމުން އަންނަ ކަންތައްތަކަށް އިންޓަނޭޝަނަލް މީޑިއާ ކަވަރޭޖް ފުޅާ ދާއިރާއެއްގައި ދެމުން ދާއިރު، ރަހުމަތްތެރި އެތައް ގައުމަކުން ވަނީ މި ދުވަސްކޮޅު ރާއްޖެ އަށް ދަތުރު ނުކުރުމަށް އެދި ޓްރެވަލް އެޑްވައިޒަރީތައް ނެރެފައި. މި އަހަރުގެ ސަމާ [ހޫނު މޫސުން] އާ ދިމާކޮށް ރާއްޖެ އަންނަން ޗާޓަރު ފްލައިޓްތައް ވެސް ކެންސަލް ވެފައިވާ ކަމުގެ މައުލޫމާތު ވަނީ ލިބިފައި،" ލޭމްގެ ބަޔާނުގައި ވެ އެވެ.
ލޭމުން ބުނީ، ކުއްލި ނުރައްކަލުގެ ހާލަތު އުވާލާއި، ރާއްޖެ ބޮއިކޮޓް ކުރުުން ހުއްޓާލުމަށް ގޮވާލުމަކީ ރަނގަޅު ކަމެއްގެ ގޮތުގައި ބަލައިގަނެ، ޓޫރިޒަމް އިންޑަސްޓްރީ ހިމާޔަތް ކުރުމަށް ހުރިހާ ފަރާތްތަކުން ވެސް މަސައްކަތް ކުރާނެ ކަމަށް އުންމީދު ކުރާ ކަމަށެވެ.
ލޭމުން ކަންބޮޑުވުން ފާޅު ކުރިއިރު، ރާއްޖެއާ ގާތް ގުޅުމެއް އޮންނަ އަދި އެންމެ ގިނަ ޓޫރިސްޓުން އަންނަ ޗައިނާ އިން ވަނީ އެ ގައުމުގެ ފަތުރުވެރިން މި ވަގުތު ރާއްޖެ ނައުމަށް އެދިފަ އެވެ. އަދި އެހެން ބައެއް ގައުމުތަކުން ވެސް ރާއްޖެ އަށް ޓްރެވެލް އެޑްވައިޒަރީ ނެރެފައިވެ އެވެ.
ރާއްޖޭގެ ސިޔާސީ ހަމަނުޖެހުންތަކާއެކު ގައުމުތަކުން ޓްރެވަލް އެޑްވައިޒަރީތައް ނެރުމުން ޓޫރިސްޓް ބުކިންތައް ކެންސަލް ކުރުން އިތުރުވެ، މިލިއަން ޑޮލަރުގެ ގެއްލުންތައް ވަމުން އަންނަ ކަމަށް މީގެ ކުރިން ވެސް ބައެއް ވިޔަފާރިވެރިން ވަނީ ބުނެފަ އެވެ.
