ޗައިނާއިން އައި ޓޫރިސްޓުންގެ އަދަދު ވަރަށް ބޮޑަށް އިތުރުވެ، މިދިޔަ މަހު ރާއްޖެ ޒިޔާރަތްކުރި ޓޫރިސްޓުންގެ އަދަދު 19 ޕަސެންޓް މައްޗަށް ހިނގައްޖެ އެވެ.
ފެބްރުއަރީ 5 ގައި ކުއްލި ނުރައްކަލުގެ ހާލަތު އިއުލާންކުރުމުން ރާއްޖެއަށް ދަތުރުކުރުން ޗައިނާ އާއި އިންޑިއާ އިން ވަނީ އެ ގައުމުތަކުގެ ރައްޔިތުންނަށް އަންގައިފަ އެވެ. އަދި ޔޫރަޕްގެ ބައެއް ގައުމުތަކުން ރައްޔިތުންގެ ކިބައިން އެދުނީ ރާއްޖެ ދާއިރު ސަމާލުވުމަށެވެ.
އެކަމަކު ރާއްޖެ އައި ޓޫރިސްޓުންގެ އަދަދު މި ވަނީ މައްޗަށް ގޮސްފަ އެވެ. ޓޫރިޒަމް މިނިސްޓްރީން އާއްމުކުރި ތަފާސްހިސާބުތައް ދައްކާ ގޮތުން މިދިޔަ މަހު ރާއްޖެއަށް 144،286 ޓޫރިސްޓުން އަ އެވެ.
އެ ހިސާބުތައް ދައްކާ ގޮތުން މިދިޔަ މަހު ވެސް އެންމެ ގިނަ ޓޫރިސްޓުން ޒިޔާރަތްކޮށްފައި ވަނީ ޗައިނާއިންނެވެ. އެ ގައުމުން އައި 33،506 ޓޫރިސްޓުންނަކީ މިދިޔަ އަހަރުގެ އެ މުއްދަތަށް ވުރެ 38 ޕަސެންޓް އިތުރުވުމެކެވެ.
ޓޫރިސްޓުން ޒިޔާރަތްކުރި ގޮތް ދައްކައިދޭ ހިސާބުތަކުން އެނގޭ ގޮތުގައި ދެވަނައަށް އެންމެ ގިނަ ޓޫރިސްޓުން އައީ އިޓަލީންނެވެ. އެ ގައުމުން 13،962 ޓޫރިސްޓުން އައިއިރު ތިންވަނަ އަށް އެންމެ ގިނަ ޓޫރިސްޓުން އައީ އިނގިރޭސި ވިލާތުންނެވެ. އެ ގައުމުން 11،362 ޓޫރިސްޓުން ރާއްޖެ ޒިޔާރަތްކުރި އެވެ.
ޓޫރިޒަމް މިނިސްޓްރީން ބުނީ މިދިޔަ ދެ މަސްދުވަހު ރާއްޖެ އައި ޓޫރިސްޓުންގެ އަދަދު، މިދިޔަ އަހަރުގެ އެ މުއްދަތާ އަޅާބަލާއިރު 16.3 ޕަސެންޓް މަތި ކަމަށެވެ.