ގްރިޑް ޕްރޮޖެކްޓް ނިމުމުން އިންޖީނުތަކުން އުނދަގުލެއް ނުވާނެ، އޭރުން ދާއިމީ ހައްލެއް ލިބޭނެ

މާލޭގައި ބަހައްޓާފައިވާ އިންޖީނުތަކުގެ ސަބަބުން އާއްމުންނަށް ދަތިވާ ކަމުގެ ޝަކުވާތައް ކުރަމުން ދިޔަ ނަމަވެސް އެ ކަމަށް އެ ކުންފުނިން ހައްލު ހޯދާފައިވާ ކަމަށް ސްޓެލްކޯ އިން މިއަދު ބުނެފި އެވެ.

އެ ކުންފުނިން މިހެން ބުނިއިރު، ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވެސް ވަނީ ސްޓެލްކޯގެ އިންޖީނުގޭގެ ސަބަބުން އާއްމުންނަށް ދަތިވާ ކަމަށް ވިދާޅުވެ، އެ ކުންފުންޏަށް ފާޑު ވިދާޅުވެފަ އެވެ. އެ މަނިކުފާނު ކުރެއްވި ޓްވީޓެއްގައި ވިދާޅުވީ، ސްޓެލްކޯގެ އިންޖީނުގެ ވެފައި ވަނީ މާލޭގައި ދިރިއުޅޭ މީހުންނަށް "މުސީބާތަކަށް" ކަމަށާއި އިންޖީނުގެ ބޮޑު ކުރަމުން ދަނީ ގާނޫނާ ހިލާފަށް ކަމަށެވެ.

ސްޓެލްކޯގެ އޮފިޝަލަކު "މިހާރު" އަށް ވިދާޅުވީ އެ ކުންފުނިން ގްރިޑް ޕްރޮޖެކްޓް ފެށީ އިންޖީނުތަކުގެ ސަބަބުން އާއްމުނަށް ދިމާވި ދަތިތަކަށް ހައްލު ހޯދައިދިނުމަށް ކަމަށެވެ. އަދި އިންޖީނުގެ މިހާރު ހުރި ވަރަށް ވުރެ އިތުރު ކުރުމުގެ އެއްވެސް ވިސްނުމެއް އެ ކުންފުނިން ނުގެންގުޅޭ ކަމަށް އޭނާ ވިދާޅުވި އެވެ.

ގްރިޑް ޕްރޮޖެކްޓަކީ މާލެ އާއި ހުޅުލެ އަދި ހުޅުމާލޭގެ ކަރަންޓު އެއް ވިއުގައަކުން ގުޅުވައިލުމަށް ހިންގާ ޕްރޮޖެކްޓެކެވެ. މި ޕްރޮޖެކްޓުގެ ދަށުން މިހާރު ކަނެކްޝަން ގުޅައި، ޕްރޮޖެކްޓު އެނަޖައިޒް ކޮށްފައިވާއިރު، މި ޕްރޮޖެކްޓު އެއްކޮށް ނިމުމުން މާލެ އަށް ކަރަންޓު ދޭނީ ހުޅުމާލޭގައި ހުންނަ ސްޓެލްކޯގެ އިންޖީނުގެ ބޭނުންކޮށްގެންނެވެ. އެހެންކަމުން މި ޕްރޮޖެކްޓު އެއްކޮށް ނިމުމުން ގާކޮށީގެ އިންޖީނުތައް ނިއްވައިލާނެ ކަމަށް ސްޓެލްކޯއިން ބުންޏެވެ.

"މިހާރު ހުޅުމާލޭގައި އަޅާފައިވާ 50 މެގަވޮޓުގެ އިންޖީނުގެ އިން މި ޕްރޮޖެކްޓުގެ ދަށުން މާލެ އަށް ކަރަންޓު ފޯރުކޮށްދޭނެ. މި ޕްރޮޖެކްޓު މިހާރު މިއޮތީ ނިމެން ކައިރި ވެފައި. ކުންފުނިން ނިންމާފައި އޮތީ މި ޕްރޮޖެކްޓު ނިމުމުން ގާކޮށީގައި ހުރި ހުރިހާ އިންޖީނެއް ޝަޓްޑައުން ކުރަން. އޭރުން ކައިރީގައި ދިރިއުޅޭ މީހުންނަށް ވެސް އުނދަގުލެއް ނުވާނެ،" ސްޓެލްކޯގެ އޮފިޝަލު ވިދާޅުވި އެވެ.

ގްރިޑް ޕްރޮޖެކްޓު ނިންމައިލުމަށް ފަހު، ގާކޮށީގެ އިންޖީނުތައް ނިއްވައިލަން މަސް ދުވަސް ނަގާނެ ކަމަށް ސްޓެލްކޯއިން ބުންޏެވެ. އެއީ ޕްރޮޖެކްޓު ނިމުމުން އޭގެ ސްޓެބިލިޓީ ޗެކް ކުރުމަށެވެ.

ސްޓެލްކޯގެ ގްރިޑް ޕްރޮޖެކްޓުގެ ދެވަނަ ފިޔަވަހީގެ ދަށުން ހުޅުމާލޭގައި ހަދާފައިވާ 50 މެގަވޮޓުގެ އިންޖީނުގެ 100 މެގަވޮޓުގެ އިންޖީނުގެއަކަށް ކުރިމަގުގައި ބަދަލު ކުރާނެ އެވެ. މިއާއެކު އެ އިންޖީނުގެ މެދުވެރިކޮށް މުޅި މާލެއަށް ކަރަންޓު ފޮރުކޮށްދެވޭނެ އެވެ. އެހެންކަމުން ދެވަނަ ފިޔަވަހީގެ މަސައްކަތް ނިމުމުން މާލޭގައި ހުރި ހުރިހާ އިންޖީނެއް ނިއްވައިލެވޭނެ ކަމަށް ސްޓެލްކޯއިން ލަފާކުރެ އެވެ.

މާލޭގެ ހުރިހާ އިންޖީނެއް ނިއްވައިލި ނަމަވެސް އެ އިންޖީނުތައް ބެކަޕެއްގެ ގޮތުގައި ބޭނުން ކުރާނެ އެވެ. އެއީ ގްރިޑު ޕްރޮޖެކްޓުގައި އެއްވެސް މައްސަލައެއް ދިމާވެއްޖެ ނަމަ މާލެ އަށް ވަގުތުން ކަރަންޓު ފޯރުކޮށްދިނުމަށެވެ.