އާ އަހަރު ފާހަގަކުރަން ހުޅުމާލޭގައި އަންކިތު ތިވާރީގެ ޝޯއެއް

އާ އަހަރު ފާހަގަކުރަން ހުޅުމާލޭގައި ޔޫތު މިނިސްޓްރީން ބާއްވާ ޝޯއަށް އިންޑިއާގެ މަޝްހޫރު މިއުޒިކް ޕްރޮޑިއުސަރު އަދި ލަވަކިޔުންތެރިޔާ އަންކިތު ތިވާރީ ގެންނަން ނިންމައިފި އެވެ.

ޔޫތު މިނިސްޓްރީން އިންތިޒާމުކުރާ މި ޝޯ އޮންނާނީ އަންނަ ހުކުރު ދުވަހުގެ ރޭ 8:30 ގައި ހުޅުމާލެ ދުވާ ޓްރެކުގަ އެވެ. މި ޝޯގައި ދިވެހި ބައެއް އާޓިސްޓުންގެ ހުށަހެޅުންތައް ވެސް އޮންނާނެ އެވެ.

ހިންދީ ލަވަތަކުން މަޝްހޫރުކަން ހޯދާފައިވާ އަންކިތު އަކީ ދިވެހިންގެ މެދުގައި ވެސް ވަރަށް މަޝްހޫރުވި 2013 ގައި ނިކުތް ބޮލީވުޑްގެ ފިލްމެއް ކަމަށްވާ "އާޝިގީ 2" ގެ ބައެއް ލަވަތައް ކޮމްޕޯޒް އަދި ކިޔައިގެން ބޮޑު މަގުބޫލު ކަމެއް ހޯދި ލަވަކިޔުންތެރިއެކެވެ.

އެ ފިލްމުގެ "ސުން ރަހާ ހޭ" އަކީ އޭނާގެ އެންމެ މަޝްހޫރުވި ލަވަ އެވެ. އޭނާ މިއުޒިކް ޑައިރެކްޓުކޮށް، އަމިއްލަ އަޑުން ކިޔާފައިވާ އެ ލަވައިން ފުރަތަމަ ފަހަރަށް އޭނާ އަށް، ބޮލީވުޑްގެ އެންމެ ގްރޭންޑް އެވޯޑު ކަމަށް ފިލްމުފެއާގައި ބެސްޓް މިއުޒިކް ޑައިރެކްޓާގެ އެވޯޑު ލިބުނެވެ.

އޭގެ ފަހުން 2014 ގައި ނެރުނު ބޮލީވުޑްގެ ފިލްމު "އޭކް ވިލަން" ގެ ލަވަ "ގަލިޔާ" ކިޔައިގެން ބެސްޓް ޕްލޭ ބެކް ސިންގާގެ ފިލްމުފެއާ އެވޯޑު އޭނާ އަށް ލިބުނެވެ. އަދި މިދިޔަ ހަތް އަހަރު ތެރޭގައި ފިލްމުފެއާގައި ބޮލީވުޑްގެ މަޝްހޫރު ލަވަކިޔުންތެރިޔާ އަރުޖިތު ސިންގު ވައްޓާލާއި، މި އެވޯޑު ކާމިޔާބުކުރެވުނު ހަމައެކަނި ލަވަކިޔުންތެރިޔާ އަކީ ވެސް އޭނާ އެވެ.

އާ އަހަރު ފާހަގަކުރަން މީގެ ކުރިން ރާއްޖެ އަށް ބޮލީވުޑްގެ މަޝްހޫރު އެކްޓަރުންނާއި ލަވަކިޔުންތެރިން ވެސް ގެނެސްފައިވެ އެވެ. ހާއްސަކޮށް ކުރީގެ ރައީސް އަބްދުﷲ ޔާމީންގެ ސަރުކާރުގައި އަހްމަދު އަދީބް ޓޫރިޒަމް މިނިސްޓަރަކަށް ހުންނެވިއިރު، ކޮންމެ އާ އަހަރާކާ ދިމާކޮށް މާލޭގައި ބޭރުގެ އާޓިސްޓުންނާ އެކު ޝޯތައް ބޭއްވި އެވެ.