މި މަހު 16 ގައި ބާއްވާ އޮސްކާ އެވޯޑް ހުށަހަޅައިދޭ ތަރިންގެ ތެރޭގައި ދުނިޔޭގެ މަޝްހޫރު ފިލްމީ ތަރި ޕްރިޔަންކާ ޗޯޕްރާ ޖޯނަސް ހިމެނިއްޖެ އެވެ.
އޮސްކާގެ ސްޓޭޖުން ޕްރިޔަންކާއާ އެކު، ފެންނާނެ މަޝްހޫރު ތަރިންގެ ތެރޭގައި ރޮބަޓް ޑައުނީ ޖޫނިއާ، އެން ހެތުވޭ، ގްވިނެތު ޕަލްޓްރޯ، ޕޯލް މެސްކަލް، ކްރިސް އެވަންސް އަދި ވިލް އާނެޓް ހިމެނެ އެވެ.
މި އަހަރުގެ އޮސްކާގެ ހޮސްޓުންގެ ލިސްޓު އެކަޑެމީ އެވޯޑްސްގެ ރަސްމީ ސޯޝަލް މީޑިއާ ޕޭޖުތަކުން އިއުލާންކުރުމާ ގުޅިގެން ޕްރިޔަންކާ ވެސް ވަނީ އެ ޚަބަރު އޭނާގެ އިންސްޓަގްރާމްގައި ހިއްސާކޮށްފަ އެވެ.
މިއީ 2016 ވަނަ އަހަރަށް ފަހު ޕްރިޔަންކާ އޮސްކާގެ ސްޓޭޖުން ފެންނާނެ ފުރަތަމަ ފަހަރެވެ. އެ ފަހަރު އޭނާ ހުރީ ލުބްނާނުގެ ޑިޒައިނަރު ޒުހައިރު މުރާދު ފަރުމާކުރި ހުދުކުލައިގެ ހެދުމެއްގަ އެވެ.
މި އަހަރު ކުރީކޮޅު ބޭއްވި ގޯލްޑަން ގްލޯބްސް އަދި ޕެރިސް ފެޝަން ވީކްގައި ވެސް ޕްރިޔަންކާ ވަނީ އޭނާގެ ފުރިހަމަ ފެޝަން ސްޓައިލްތަކުން އެންމެންގެ ސަމާލުކަން ހޯދައިފަ އެވެ. އެހެންވެ، ކުރިއަށް އޮތް އޮސްކާގެ ރެޑް ކާޕެޓުން އޭނާ ފެންނާނެ ގޮތަކަށް ގިނަ ބަޔަކު އަންނަނީ އިންތިޒާރު ކުރަމުންނެވެ.
ޕްރިޔަންކާ އެންމެ ފަހުން ފެނުނީ މިދިޔަ މަހު 25 ގައި އެެމެޒަން ޕްރައިމް ވީޑިއޯ އިން ގެނެސްދިން އެކްޝަން ފިލްމު "ދަ ބްލަފް" އިންނެވެ.
ގިނަ ދުވަސްތަކަކަށް ފަހު އޭނާ މިހާރު އަންނަނީ އިންޑިއާގެ ފިލްމެއްގައި ވެސް މަސައްކަތްކުރަމުންނެވެ. އެއީ ދެކުނު އިންޑިއާގެ ކާމިޔާބު ޑައިރެކްޓަރު އެސްއެސް ރަޖަމޯލީގެ "ވަރަނާސީ"ގަ އެވެ. އެ ފިލްމުގައި އޭނާ ކުޅޭނީ "މަންދާކިނީ" ކިޔާ ރޯލެކެވެ. އޭނާއާ އެކު، އެ ފިލްމުން ދެކުނު އިންޑިއާގެ ތަރިން ކަމަށްވާ މަހޭޝް ބާބޫ އާއި ޕްރިތުވީރާޖް ސުކުމާރަން ފެންނާނެ އެވެ.