ބޮލީވުޑް ފިލްމަކުން ފެނިދާނެ ކަމުގެ އިޝާރާތެއް ކޭ-ޕޮޕްގެ މަޝްހޫރު ތަރި ޖިސޫ ދިނުމާ އެކު، އިންޑިއާގެ ފޭނުން އޭނާ ފިލްމަކަށް ނެގުމަށް އެދި ބޮޑެތި ޑައިރެކްޓަރުންނަށް ގޮވާލަން ފަށައިފި އެވެ.
ބްލެކްޕިންކްގެ މެންބަރު ޖިސޫ މި ޝައުގުވެރިކަން ފާޅުކުރީ ނެޓްފްލިކްސް އިން ގެނެސްދޭ އޭނާގެ އާ ސީރީޒް "ބޯއިފްރެންޑް އޮން ޑިމާންޑް" އިޝްތިހާރު ކުރުމަށް މިދިޔަ ހަފުތާ ބަންދުގައި ބޭއްވި އިވެންޓެއްގެ ތެރެއިންނެވެ.
ޖިސޫ ބުނި ގޮތުގައި، ބޮލީވުޑްގެ ފިލްމަކުން ފުރުސަތެއް ލިބިއްޖެ ނަމަ އެކަން ތަޖުރިބާކޮށްލަން އޭނާ ހުރީ ތައްޔާރަށެވެ.
އިންޑިއާގައި ތިބި ޖިސޫގެ ފޭނުން އަންނަނީ އިންޑިއާގެ މަޝްހޫރު ޑައިރެކްޓަރުން ކަމަށްވާ ސަންޖޭ ލީލާ ބަންސާލީ އާއި އެސްއެސް ރާޖަމޯލީ ޓެގްކޮށް، ޖިސޫ އެމީހުންގެ ފިލްމަކަށް ނެގުމަށް ސޯޝަލް މީޑިއާގައި ގޮވާލަމުންނެވެ.
ފޭނުން ބުނާ ގޮތުގައި، ކޮރެއާގެ އާޓިސްޓުންނާއި ބޮލީވުޑްގެ ގުޅުން ބަދަހިވަމުން އަންނަ މި ދަނޑިވަޅުގައި، ޖިސޫ ކަހަލަ ދުނިޔޭގެ ތަރިއަކު ބޮލީވުޑްގެ ފިލްމަކުން ފެނުމަކީ ގިނަ ބަޔަކު އުންމީދުކުރާ ކަމެކެވެ.
ލަވަކިޔުމުގެ އިތުރުން ޖިސޫ މިހާރު އަންނަނީ އެކްޓިންގެ ދާއިރާގައި ވެސް ބޮޑެތި ކުރިއެރުންތަކެއް ހޯދަމުންނެވެ.