އިންޑިއާގެ މުމްބާއީ ޕޮލިސްގެ އިކޮނޮމިކް އޮފެންސަސް ވިންގް (އީއޯޑަބްލިޔޫ) އިން ތަހުގީގުކުރަމުން އަންނަ ކޮރަޕްޝަންގެ ބޮޑު މައްސަލައެއްގައި ބޮލީވުޑްގެ އެކްޓަރު ޑީނޯ މޮރެއާ އިއްޔެ ހައްޔަރުކޮށްފި އެވެ.
އޭނާ ހައްޔަރުކުރީ އީއޯޑަބްލިޔޫ އިން ތަހުގީގުކުރަމުން އަންނަ 65.54 ކްރޯޑު އިންޑިއަން ރުޕީސް (6.8 މިލިއަން ޑޮލަރު)ގެ "މީޓީ ރިވާ ކޮރަޕްޝަން"ގެ މައްސަލައިގަ އެވެ.
ރިޕޯޓްތައް ބުނި ގޮތުގައި، މުމްބާއީގެ ބެންޑްރާގައި ހުންނަ ޑީނޯގެ ގޭގައި އޭނާއާ ގާތްގަނޑަކަށް 8 ގަޑިއިރު ވަންދެން ސުވާލުކުރުމަށް ފަހު، ފުލުހުން ވަނީ އޭނާ ހައްޔަރުކޮށްގެން ގެންގޮސްފަ އެވެ.
އެ މައްސަލައަކީ މުމްބާއީގެ މީޓީ ކޯރު ސާފުކުރުމާއި ތަރައްގީކުރުމުގެ މަޝްރޫއުގައި ހިންގާފައިވާ ބޮޑެތި މާލީ އޮޅުވާލުންތަކަކާ ގުޅިގެން މުމްބާއީ މުނިސިޕަލް ކޯޕަރޭޝަން (ބީއެމްސީ) އަށް ބޮޑު މާލީ ގެއްލުމެއް ލިބިފައިވާތީ ކުރާ ކޮރަޕްޝަންގެ ތަހުގީގެއް ކަމަށް ރިޕޯޓްތައް ބުންޏެވެ.
މި މައްސަލައިގެ ތަހުގީގުގައި އީއޯޑަބްލިޔޫ އިން ބަލަމުން އަންނަނީ ކޮންޓްރެކްޓަރުންނާއި މެދުވެރިން އަދި ސިވިކް އޮފިޝަލުން ގުޅިގެން ހިންގާފައިވާ ހިޔާނާތްތަކެވެ.
މީގެ ކުރިން މިދިޔަ އަހަރުގެ މެއި މަހު ވެސް ޑީނޯ އާއި އޭނާގެ ބޭބެ ސަންތީނޯ މޮރެއާއާ ފުލުހުން މި މައްސަލައިގައި ސުވާލުކޮށްފައިވެ އެވެ. އެއީ މައްސަލައިގެ ތުހުމަތުކުރެވޭ މައިގަނޑު ފަރާތްތަކާއި ޑީނޯއާ ދެމެދު ކުރެވިފައިވާ ފޯން ކޯލްތަކާއި ސަންތީނޯގެ ކުންފުނިން ހިންގާފައިވާ މާލީ މުއާމަލާތްތަކާ ގުޅިގެންނެވެ.
މި ކޮރަޕްޝަންގެ މައްސަލައިގައި އިންޑިއާގެ އެންފޯސްމަންޓް ޑިރެކްޓްރޭޓް (އީޑީ) އިން ވެސް ވަނީ މީގެ ކުރިން ޑީނޯގެ ގެ ބަލައި ފާސްކޮށްފަ އެވެ. ތަހުގީގު ކުރިއަށް ދާއިރު، މި މައްސަލައިގައި އިތުރު ފަރާތްތަކެއްގެ ބައިވެރިވުން އޮތުމުން އެ މައްސަލަ ވެސް ބަލަމުން އަންނަ ކަމަށް މުމްބާއީގެ ފުލުހުން މީޑިއާތަކަށް ބުނެފައިވެ އެވެ.