ސަލްމާން އޫލިއާއާ ކައިވެނި ކުރާނެތަ؟

މި ދުވަސްކޮޅަކީ އަނެއްކާ ވެސް ސަލްމާން ހާންގެ ކައިވެނީގެ ވާހަކަތައް މާ ގަދަ އަށް ދެކެވެމުން އަންނަ ދުވަސްކޮޅެކެވެ. މީޑިއާތަކުގައި އެކި ގޮތްގޮތަށް ސަލްމާންގެ ކައިވެންޏާ ބެހޭ ގޮތުން ވާހަކަ ދައްކަމުން އަންނަ އިރު، މި އަހަރުގެ ފަހުކޮޅު ސަލްމާން ކައިވެނި ކުރާނެ ކަމަށްވެ އެވެ.

އުމުރުން މިހާރު 50 އަހަރުގެ ސަލްމާން ކައިވެންޏަކަށް ތައްޔާރުވަމުން އަންނަކަމުގެ ނިޝާންތަކެއް މިހާރު އަންނަނީ ފެންނަމުންނެވެ. ވަރަށް ހާމަކަން ބޮޑުކޮށެވެ. ސީދާ އެކަމާ އޭނާ ވާހަކަ ނުދެއްކިޔަސް މީޑިއާތަކަށް ފެންނަ މަންޒަރުތަކުން ކައިވެންޏަށް ސަލްމާން ތައްޔާރުވެއްޖެ ކަމަށް ބުނެވި ދާނެ އެވެ.

އެހެން ނޫން ނަމަ މިހާރު އޭނާއާ އަޅުވާ ކިޔަމުން އަންނަ ރޮމޭނިއާ އަށް އުފަން އޫލިއާ ވަންތޫރާ އެކު އެހާ އާންމުކޮށް، އެހާ ހާމަކަން ބޮޑުކޮށް ސަލްމާނެއް ނުފެންނާނެ އެވެ.

ސަލްމާން ކައިވެންޏަށް ތައްޔާރުކަން ކަށަވަރުވާ އަނެއް ކަމަކީ ދާދި ފަހުން މުމްބާއީގެ އިންޓަނެޝަނަލް އެއާޕޯޓުން ސަލްމާނާއި އޭނާގެ މަންމަ އާއި ކޮއްކޮ އަރްފިތާ ހާނާ އެކު އޫލިއާ ފެނުމެވެ. އެރޭ އޫލިއާ ހުރީ ސަލްމާންގެ މަންމަގެ އަތާ އަތް ގުޅުވައިގެންނެވެ. ޅީދަރިއެއްހެން ސަލްމާންގެ މަންމަ އަށް އަޅާލުމުގައި އޫލިއާ އުޅުނު ތަން މިޑިއާތަކަށް ވަރަށް ގާތުން ފެނުނެވެ.

އޭގެ އަނެއްކާ ދެ ދުވަހެއް ވަރު ފަހުން ކުރީގެ މަޝްހޫރު ބަތަލާ ޕްރިތީ ޒިންތާގެ ކައިވެނީގެ އުފަލުގައި ބޮލީވުޑްގެ އެކުވެރިންނަށް ބޭއްވި ހާއްސަ ހަފުލާ އަށް ސަލްމާން ދިޔައީ އޫލިއާ ގޮވައިގެންނެވެ. އެ ރޭ ސަލްމާން އޭނާގެ ރައްޓެހިންނަށް އޫލިއާ ތައާރަފުކޮށްދީ، އެއީ އޭނާގެ ލޯބިވެރިޔާ ކަމަށް ބުނެފައިވާ ކަމަށްވެ އެވެ.

ސަލްމާނާއި އޫލިއާގެ ވާހަކަތައް ދެކެވޭތާ މިހާރު ދެކެވޭތާ ހަތަރު އަހަރެއްހާ ދުވަސްވެއްޖެ އެވެ. އެ ދެ މީހުންގެ މެދުގައި ހާއްސަ ގުޅުމެއް އޮންނަ ކަމަށް ވާހަކަ ދެކެވެނީ ސަލްމާންގެ ޝޫޓިންތަކުން ވެސް އޫލިއާ ފެނުމާއި ސަލްމާންގެ ވެނިޓީ ވޭނުން އޫލިއާ ފެނުމާއި އޭނާގެ ޕެންޓް ހައުސްގައި އޫލިއާ އަސް ދުއްވުމާއި އާއިލާގެ މީހުންނާ އެކު ވަގުތުތައް ހޭދަ ކުރުމާއި ކެއުންތަކަށް އިންސާފު ކުރާ މަންޒަރު ދައްކުވައިދޭ ފޮޓޯތައް ދޭތެރެ ދޭތެރެ އިން އާންމުވާތީ އެވެ.

އަނެއްކޮޅުން ސަލްމާން 2014 ވަނަ އަހަރު ޕްރޮޑިއުސް ކުރި ފިލްމް "އޮ ތެރީ" ގެ ހާއްސަ ލަވައެއް ވެސް އޫލިއާ ކުޅެފައިވެ އެވެ.

އެހެންވެ ސަލްމާނާއި އޫލިއާ އާ ދެމެދު އޮތީ އެކުވެރި ކަމަކަށް ވުރެ ގާތް ގުޅުމެއް ކަމަށް ގިނަ ބަޔަކު ދެކެ އެވެ. ބައެއް މީހުން ހީކޮށްގެން ތިބީ ސަލްމާން އެންމެ ފަހުން ރައްޓެހިވެގެން އުޅުނު ޒުވާން ބަތަލާ ކެޓްރީނާ ކައިފް ފަހުން، ސަލްމާން ދޫކޮށް ރަންބީރު ކަޕޫރާ ހިތާވެގެން އުޅެފައި، އެ ގުޅުން ނިމުމަކަށް އައުމުން ސަލްމާނާއި ކެޓްރީނާ އަލުން ގުޅޭނެ ކަމަށެވެ. އެކަމަކު މިހާ ތަނަކަށް އެ މަންޒަރެއް ނުފެނެ އެވެ. އެކަމަކު ދެ މީހުންގެ މެދުގައި މިހާރު ވެސް ޕްރޮފެޝަނަލް ގުޅުން ކުރިއެކޭ އެއްގޮތަށް އެބަ އޮތެވެ.

އޫލިއާއަކީ ކާކުތަ؟

ލޯ ކިޔަވާފައިވާ މިހާރު 35 އަހަރުގެ އޫލިއާއަކީ ރޮމޭނިއާ އަށް އުފަން މޮޑެލްއެކެެވެ. ސަލްމާނާއި އޭނާ ދިމާވީ 2010 ވަނަ އަހަރު ޑަބްލިން އިން ކަމަށްވެ އެވެ. އެ ހިސާބުން ގުޅުން އުފެދުނީ އެވެ.

ބްލޮންޑް އިސްތަށިގަނޑެއްގެ ވެރި އޫލިއާއަކީ ޓީވީ ޕްރެޒެންޓަރެއް ވެސް މެ އެވެ. ސަލްމާނާއި އޫލިއާގެ ގުޅުން ކައިވެންޏަކާ ދިމާއަށް މިސްރާބު ޖަހާފައިވާ އިރު، އޫލިއާ ބެހޭ ގޮތުން ކުރިން ނުދެެކެވޭ ވާހަކަތަކެއް މިހާރު އިންޑިއާގެ މީޑިއާތަކުގައި އަންނަނީ މާ ގަދައަކަށް ދެކެވެމުންނެވެ.

އެއީ އޭނާ ކުރިން ކައިވެންޏެއްކޮށް، އެެ ކައިވެނި ރޫޅިފައިވާ ވާހަކަ އެވެ. އެހެންވެ ސަލްމާން އަލަތު ކައިވެންޏަކަށްދާ އިރު، ކުރިން މީހަކާ އިނދެފައި ހުރި މީހަކާ ކައިވެނި ކުރާ ނަމަ، އޭނާގެ ފޭނުންނަށް އެއީ ހަޖަމް ކުރަން ވެސް އެހާ ފަސޭހަ ކަމަކަށް ނުވެދާނެ އެވެ. އެހެންވެ އެކަމާ ފާޑުފާޑުގެ ވާހަކަތައް ދައްކާނެ އެވެ. ހަމަ އެއާ އެކު އޫލިއާއަކީ ކުރިން ކައިވެންޏެއް ކޮށްފައިވާކަން ސަލްމާނަށް އެނގޭތޯ އެއީ ވެސް ބައެއް މީހުން މީޑިއާތަކުން މިހާރު އުފައްދާ ސުވާލެކެވެ.

ރިޕޯޓްތައް ބުނާ ގޮތުން އޫލިއާ ކައިވެނި ކުރީ މިއުޒިޝަނެއްގެ އިތުރުން ޕްރޮޑިއުސަރެއްގެ ގޮތުގައި ވެސް މަސައްކަތް ކުރާ ރޮމޭނިއާ އަށް އުފަން މާރިއަސް މޮގާ، 34، އާ އެވެ. އެ ދެ މީހުންގެ ކައިވެނީގެ ފޮޓޯތަކެއް ވެސް މިޑިއާގައި މިހާރު އަންނަނީ ދައުރުވަމުންމެވެ.

އޫލިއާ އާއި މާރިއަސްގެ ކައިވެނި ރޫޅިފައި ވަނީ 2009 ގަ އެވެ. ރިޕޯޓްތައް ބުނާ ގޮތުން ކައިވެނި ރޫޅުނީ މާރިއަސް އެހެން މީހަކާ ހިތާވެގެން އުޅޭކަން އޫލިއާ އަށް ފަޅާ އެރުމުންނެވެ.

ސަލްމާން ކައިވެނި ނުކޮށްގެން މުޅި އިންޑިއާ އެ ވާހަކަ ދައްކަނީ އެވެ. އެހެންވެ މިހާރު އެންމެ ބޮޑަށް އުފެދޭ ސުވާލަކީ ހަމަ ހަގީތުގައި ވެސް އޫލިއާއަކީ ސަލްމާންގެ ލޯބިވެރިޔާތޯ އެވެ؟ އޭނާ އާ ސަލްމާން ކައިވެނި ކުރާނެތޯ އެވެ؟ ވާ ގޮތެއް ބަލަން ތިބެމާ ހިނގާށެވެ.