އާމިރު ހާންގެ ދަރިފުޅު ޖުނައިދު ހާން ވެސް އެކްޓިން އަށް

ފިރިހެން ދަރިފުޅު ޖުނައިދު ހާން އެކްޓަރެއްގެ ގޮތުގައި ބޮލީވުޑަށް ނެރެން ރަނގަޅު ސްކްރިޕްޓަކަށް ބަލަމުން އަންނަ ކަމަށް އާމިރު ހާން ބުނެފި އެވެ.

އޭނާ ބުނި ގޮތުގައި 27 އަހަރުގެ ޖުނައިދު އެކްޓިން އަށް ވަަރަށް ބޮޑަށް ޝައުގުވެރިކަން އެބަ ހުއްޓެވެ. އެކަމަކު ކުރިން ބެލެވެނު ގޮތުގައި އޭނާ ބޮލީވުޑަށް ނުކުތަސް ނުކުންނާނީ ޑައިރެކްޓަރެއްގެ ގޮތުގަ އެވެ. ޖުނައިދު ވަނީ ބައްޕަގެ ކެރިއަރުގެ އެންމެ ކާމިޔާބު އެއް ފިލްމު ކަމަށްވާ 2009 ގެ "ތްރީ އިޑިއަޓްސް" ގައި ޑައިރެކްޓަރު ރާޖްކުމާރް ހިރާނީއާ އެކު އެސިސްޓަންޓެއްގެ ގޮތުގައި މަސައްކަތްކޮށްފަ އެވެ.

އާމިރު ބުނި ގޮތުގައި ޖުނައިދު ފިލްމު ކުޅެން ބޭނުންވާތީ އާއިލާ އިން އެކަމަށް އެއްބާރުލުން ދޭނެ އެވެ. އެކަމަކު ސްކްރީން ޓެސްޓަކީ އަބަދުވެސް ގަބޫލުކުރާ އެއްޗެއް ކަމަށާއި ސްކްރީން ޓެސްޓުން ޖުނައިދު ފެއިލްވެއްޖެ ނަމަ އޭނާ އެކްޓަރެއްގެ ގޮތުގައި ނުފެންނާނެ ކަމަށް ބުންޏެވެ.

"އަހަރެންގެ ދަރިއަކަށްވީތީ ޖުނައިދަށް ލިބޭނެ ހާއްސަ އިމްތިޔާޒުތަކެއް ނުހުންނާނެ. އޭނަގެ ސްކްރީން ޓެސްޓެއް ހަދާފައި، އެއިން ފާސްވެއްޖެ ނަމަ ފިލްމު ކުޅޭނީ،" ބޮލީވުޑްގެ އެންމެ ހުނަރުވެރި އެކްޓަރުންގެ ތެރޭގައި ހިމެނޭ އާމިރު ބުންޏެވެ. "އަހަރެން މީގެ ކުރިން ދުށިން ޖުނައިދު ކޮށްފައި ހުރި އެކްޓިންތަކެއް. އޭނާގެ އެބަހުރި އެ ހުނަރު. މިހާރު މި ބަލަނީ އޭނާ އަށް ރަނގަޅު ސްކްރިޕްޓަކަށް."

ޖުނައިދަކީ އާމިރުގެ ފުރަތަމަ ކައިވެންޏަށް ލިބުނު ދެ ކުދިންގެ ތެރެއިން ދޮށީ ދަރިފުޅެވެ. ރީނާ ދައްތާ އާއި އާމިރުގެ ދެން ހުންނަނީ އިރާ ހާން، 22، ކިޔާ އަންހެން ކުއްޖެކެވެ.

އާމިރު މިހާރު ކައިވެނިކޮށްގެން އުޅެނީ ޕްރޮޑިއުސަރު/ޑައިރެކްޓަރު ކިރަން ރާއޯ އެވެ. އެ ދެ މީހުންނަށް ލިބިފައިވާ ދަރިފުޅަކީ އާޒާދު ރާއޯ ހާނެވެ. މިހާރު އުމުރުން 7 އަހަރުގެ އާޒާދަކީ ސަރޮގޭޓްކޮށްގެން ހޯދި ދަރިއެކެވެ.