ސަނީ ޑިއޯލްގެ "ގަދަރު" ގެ ސީކްއެލްއެއް ހަދާ ވާހަކަ ދޮގުކޮށްފި

ސަނީ އިންޑިއާގެ ބޮޑުވަޒީރު ނަރެންދުރަ މޯދީއާ އެކު.

އަހުމަދު އަދްޝަން، މިހާރު

20 މެއި 2019 - 08:40

ސަނީ ޑިއޯލްގެ ކެރިއަރުގެ އެންމެ ކާމިޔާބު އެއް ފިލްމު ކަމަށްވާ "ގަދަރު: އޭކް ޕްރޭމް ހަތާ" ގެ ސީކްއެލްއެއް ހަދަން ތައްޔާރުވަމުން އަންނަ ކަމަށް ބުނާ ވާހަކަ ސަނީ އާއި ފިލްމުގެ ޑައިރެކްޓަރު އަނިލް ޝަރުމާ ދޮގުކޮށްފި އެވެ.

އާދީއްތަ ދުވަހު ނިންމައިލި އިންޑިއާގެ އާންމު އިންތިހާބުގައި ވެރިކަންކުރާ ޕާޓީ ބީޖޭޕީގެ ޓިކެޓްގައި ޕަންޖާބްގެ ގުރުދާސްޕޫރަށް ވާދަ ކުރި ސަނީ ބޮލީވުޑް ހަންގާމާ އަށް ބުނީ "ގަދަރު" ގެ ދެވަނަ ބައެއް ހަދަން އުޅޭ ވާހަކައެއް ދެކެވިފައި ނެތް ކަމަށެވެ.

"އަނެއްކާ އިތުރު ފިލްމަކާ ދޭތެރޭ ވިސްނާނެ ވަގުތެއް ވެސް މި ވަގުތު އަހަރެންގެ އަތަކު ނެތް. އަހަންނަކަށް ނޭނގޭ ތިއީ ކޮން ތަނަކުން ތިލަވެގެން އުޅޭ ވާހަކައެއް ކަމެއް،" މި މަހުގެ ކުރީކޮޅު ރިލީޒް ކުރި "ބްލޭންކް" ގައި މުހިއްމު ރޯލެއް ކުޅުނު އެކްޓަރު ބުންޏެވެ.

ޑައިރެކްޓަރު އަނިލް ބުނި ގޮތުގައި "ގަދަރު" ގެ ދެވަނަ ބައެއް ހަދާ ވާހަކަ އަބަދު ވެސް މީޑިއާތަކުގައި ދައްކަ އެވެ.

"އެއީ އަބަދު ވެސް ދައުރުވާ ވާހަކައެއް. އެކަމަކު ފިލްމެއް ހަދަން އުޅޭ ނަމަ އެކަން ރަސްމީކޮށް ހިއްސާ ކުރާނަން." ސަނީއާ އެކު "އަޕްނޭ" ވެސް ގެނެސް ދިން ޑައިރެކްޓަރު ބުންޏެވެ.

Sunny Deol ge "Gadar" ge 2 vana bai hadhanee

The most trusted news source in the Maldives

Mihaaru

"ގަދަރު" އަކީ 2001 ގައި ރިލީޒް ކުރި ފިލްމެއް.

ދެެހާސް އެކެއްގައި ރިލީޒް ކުރި "ގަދަރު" ގެ ލީޑް ރޯލް ކުޅުނީ ސަނީ އާއި އަމީޝާ ޕަޓޭލް އެވެ. އެ ފިލްމުގައި ކިޔައި ދެނީ ބޮޑު ހަތުރުވެރި ކަމެއް އޮންނަ އިންޑިއާގެ ފިރިހެނަކާއި ޕާކިސްތާނުގެ އަންހެނެއްގެ ލޯބީގެ ވާހަކަ އެވެ.

ސަނީ މިހާރު އަންނަނީ އޭނާގެ ދޮށީ ފިރިހެން ދަރިފުޅު ކަރަން ޑިއޯލް ބޮލީވުޑަށް ނެރުމުގެ އެންމެ ފަހުގެ ތައްޔާރީތައް ވަމުންނެވެ. އެގޮތުން ދަރިފުޅު ލޯންޗް ކުރަން އޭނާ ޑައިރެކްޓް ކުރި "ޕަލް ޕަލް ދިލް ކޭ ޕާސް" އަންނަ ޖުލައި މަހުގެ 19 ގައި ސިނަމާތަކަށް އަންނާނެ އެވެ.