އަޖޭ ދޭވްގަންގެ "ޗަނަކިއާ" ގެނެސް ދޭނީ ދެ ބަޔަކަށް ބަހާލައިގެން

އަޖޭ ދޭވްގަން ސޮއިކޮށްފައިވާ ފިލްމުތަކުގެ ތެރޭގައި ހިމެނޭ ބައޮގްރަފިކަލް ޑްރާމާ "ޗަނަކިއާ" ގެނެސް ދޭނީ ދެ ބަޔަކަށް ބަހާލައިގެން ކަމަށް އޭނާ ބުނެފި އެވެ.

ނީރަޖް ޕަންޑޭ ޑައިރެކްޓްކުރާ ފިލްމު މިހާރު އޮތީ ސްކްރިޕްޓިން މަރުހަލާގަ އެވެ. "ޗަނަކިއާ" އަކީ އުސްތާޒެއްގެ ގޮތުގައި މަޝްހޫރުވި 4 ވަނަ ގަރުނުގެ އިލްމުވެރިއެކެވެ. އަދި އޭނާ އަކީ ޕޮލިޓިކަލް ސައިންސާއި އިގުތިސާދީ ދާއިރާގެ ފަންނުވެރިއެއް ވެސް މެ އެވެ.

ޗަނަކިއާގެ ވާހަކަ ކިޔައިދޭ ފިލްމެއް ހަދާކަން އިއުލާންކުރީ މިދިޔަ އަހަރުގެ ޖުލައި މަހުގެ ތެރޭގަ އެވެ.

ޑެކަން ކްރޮނިކަލް އަށް ދިން އިންޓަވިއުއެއްގައި އަޖޭ ބުނީ "ޗަނަކިއާ" ދެ ބަޔަކަށް ގެނެސްދޭން ނިންމީ އެ ވާހަކައިގައި ކިޔައިދޭން ހުރި ހާދިސާތައް ގިނަކަމުން، ވީހާ ވެސް ފުރިހަމަކޮށް އަދި އިންސާފުވެރިކޮށް ހުށަހަޅައިދޭން ކަމަށެވެ.

"ފުރަތަމަ ބައިގެ މަސައްކަތް މި އަހަރުގެ މެދުތެރޭގައި ފަށަން ރާވައިގެން އަހަރެމެން މިތިބީ،" ބޮލީވުޑްގެ އެންމެ ބިޒީ އެއް އެކްޓަރު ބުންޏެވެ.

އަޖޭ ދެން އެންމެ އަވަހަށް ޝޫޓިން ފަށާނީ އިންޑިއާގެ ކުރީގެ ފުޓްބޯޅަ ތަރި ސައިދު އަބްދުއްރަހީމްގެ ވާހަކަ ކިޔައިދޭ ފިލްމެވެ. އެ ފިލްމުގެ ޑައިރެކްޓަރަކީ މިދިޔަ އަހަރުގެ އެންމެ ހިނގި އެއް ފިލްމު ކަމަށްވާ "ބަދާއީ ހޯ" ގެނެސް އަމިތު ޝަރުމާ އެވެ. އަޖޭ ސޮއިކޮށްފައިވާ އިތުރު ފިލްމުތަކުގެ ތެރޭގައި "ބޫޖް: ދަ ޕްރައިޑް އޮފް އިންޑިއާ"، "އާރްއާރްއާރް" އަދި "މަހާވީރް ކަރްނާ" ހިމެނެ އެވެ.

މި އަހަރު "ޓޯޓަލް ދަމާލް" އާއި "ދޭ ދޭ ޕިޔާރު ދޭ" އިން ފެނިގެން ދިޔަ އެކްޓަރުގެ ކުރިއަށް އޮތް ފިލްމަކީ އަންނަ އަހަރުގެ ޖެނުއަރީގައި ރިލީޒް ކުރާ "ތާނަޖީ: ދި އަންސަންގް ވޮރިއާ" އެވެ.