ދުނިޔޭގެ އެންމެ ބޮޑު އެއް ފިލްމު އިންޑަސްޓްރީ އޮންނަ އިންޑިއާގައި ފިލްމީ މަސައްކަތްތައް ވަގުތީ ގޮތުން ހުއްޓުމަކަށް ގެނެސްފި އެވެ.
މުޅި ދުނިޔެ އަށް ކުރިމަތިވެފައިވާ ކޮވިޑް-19 ރޯގާއާ ހެދި އިންޑިއާގެ ވަރަށް ގިނަ ފިލްމުތަކާއި ޓީވީ ސިލްސިލާތަކުގެ މަސައްކަތްތައް ވެސް މި ވަގުތު ވަނީ ވަގުތީ ގޮތުން މަޑުޖައްސާލައިފަ އެވެ. އަދި ރަސްމީ ފަރާތްތަކުން ވެސް ވަނީ އެއްވެސް ޕްރޮޖެކްޓެއްގެ ޝޫޓިން މި މަހުގެ 19 އިން ފެށިގެން މި މަހުގެ ނިޔަލަށް ކުރިއަށް ނުގެންދަން އަންގައި ނޯޓިސް ވެސް ނެރެފަ އެވެ.
އޭގެ ތެރޭގައި ޕްރޮޑިއުސާޒް ގިލްޑް އޮފް އިންޑިއާ އާއި އިންޑިއަން މޯޝަން ޕިކްޗާ ޕްރޮޑިއުސާޒް އެސޯސިއޭޝަން (އޭއެމްޕީޕީއޭ) ހިމެނެ އެވެ.
އެ ދެ ތަނުން ނެރުނު ބަޔާންތަކުގައި ބުނީ މި ވަގުތު އެންމެ މުހިއްމީ އާންމު ސިއްހީ ރައްކާތެރިކަން ކަމަށާއި މި ވަގުތު އެއްވެސް ޝޫޓިން އަށް ކުރިއަށް ނުގެންދަން އެދޭ ކަމަށެވެ.
އުފެއްދުންތަކުގެ ޝޫޓިންތައް ހުއްޓުމަކަށް ގެނައި އިރު، އިންޑިއާގެ ވަރަށް ގިނަ ސިނަމާތަކެއް ވެސް ވަނީ މިހާރު ބަންދުކޮށްފަ އެވެ. އަދި ފިލްމު އަޅުވަން ތާވަލުކޮށްފައި ހުރި ތާރީހުތަކަށް ވެސް ދަނީ ބަދަލުތަކެއް ގެންނަމުންނެވެ.
ބޮލީވުޑުން މި ވަގުތު މަސައްކަތްތައް ހުއްޓުމަށް ގެނައި ބޮޑެތި ފިލްމުތަކުގެ ތެރޭގައި ސަލްމާން ޚާންގެ "ރާދޭ" އާއި އާމިރު ޚާންގެ "ލާލު ސިންގް ޗައްޑާ" އާއި އަކްޝޭ ކުމާރުގެ "ޕްރިތުވީރާޖް" އާއި ރަންބީރް ކަޕޫރްގެ "ބުރައްމަސްތުރާ" އާއި ކަރަން ޖޯހަރުގެ "ތަޚުތު" އާއި ޝާހިދު ކަޕޫރްގެ "ޖާޒީ" އާއި ކާތިކް އާރިޔަންގެ "ބޫލް ބުލައްޔާ 2" ފަދަ ފިލްމުތައް ހިމެނެ އެވެ.
ހިންދީ ބަހުން ހަދާ ބޮލީވުޑް ފިލްމުތަކުގެ އިތުރަށް އިންޑިއާގެ އެކި ބަހުރުވަތަކުން ހަދާ ފިލްމުތަކާ އެކު އެ ގައުމަކީ އަހަރެއްގެ މައްޗަށް ދެހާހެއްހާ ފިލްމު އުފައްދާ ގައުމެކެވެ.
