ގޭންގްސްޓާރު ވިކާސް ޑޫބޭގެ ވާހަކަ ފިލްމަކަށް

ދާފި ފަހުން އިންޑިއާގެ އަށް ފުލުހަކު މަރާލި މައްސަލައެއްގައި ހައްޔަރުކުރުމަށް ފަހު ފުލުހުންގެ ހަމަލާއެއްގައި މަރާލި އިންޑިއާގެ ގޭންގްސްޓާރު ވިކާސް ޑޫބޭގެ ވާހަކަ ކިޔައިދޭ ފިލްމެއް ހަދަން ނިންމައިފި އެވެ.

ބޮލީވުޑް ހަންގާމާ އިން ބުނި ގޮތުގައި ސިޔާސީ ގޮތުން ނުފޫޒު ގަދަ ބައެއްގެ ވާގިދީގެން އުޅުނު ވިކާސް އަށް ބިނާކޮށް ހަދާ ފިލްމުގެ ރައިޓްސް ހޯދާފައި ވަނީ ޑައިރެކްޓަރު ހެލްސަލް މެހެތާ އާއި ޕްރޮޑިއުސަރު ޝައިލޭޝް އާރް ސިންގެވެ. ހެންސަލް މިހާރު އަންނަނީ ފިލްމުގެ ސްކްރިޕްޓްގެ މަސައްކަތް ވެސް ކުރަމުންނެވެ.

ހަގީގީ ހާދިސާތަކަކަށް މީގެ ކުރިން ވެސް ކާމިޔާބު ފިލްމުތަކެއް ގެނެސްދިން ހެންސަލް ބުނިގޮތުގައި ވިކާސްގެ ވާހަކަ އަކީ ބެލުންތެރިންނަށް ކޮންމެހެން ވެސް ކިޔައިދޭން ޖެހޭ ވާހަކައެކެވެ. ސަބަބަކީ މިއީ މި ޖީލުގެ ތެރޭގައި ސިޔާސީ ނުފޫޒު ގަދަ މީހުން ކުޅޭ ހުތުރު ކުޅިގަނޑާއި އެ މީހުންގެ ބާރާއި ފައިސާ ބޭނުންކޮށްގެން އަމިއްލަ ބޭނުންތައް ފުއްދަން ކުރާ މަސައްކަތްތައް ވިކާސްގެ ކޭސް އިން ވަރަށް ރަނގަޅަށް ދައްކުވައިދޭތީ އެވެ.

"މިއީ މުޖުތަމައުގެ މިހާރުގެ ހާލަތު ސިފަކޮށްދޭ ހާދިސާއެއް. އަހަރެން މީތި ގެނެސްދޭނީ ޕޮލިޓިކަލް ތުރިލާއެއްގެ ގޮތައި. މިއީ ހަގީގަތުގައި ޝައުގުވެރި ކަންތައްތަކެއް ހުރި އަދި އާންމުންނާ ހަމައަށް ތިލަވާން ޖެހޭ ވަރަށް ގިނަ މައްސަލަތައް އެކުލެވޭ ހާދިސާއެއް،" ޝާހިދު އާއި އަލީގަޅް އަދި އޮމެރްތާ ފަދަ ވަރުގަދަ ފިލްމުތައް ގެނެސްދިން ޑައިރެކްޓަރު ބުންޏެވެ.

ޝައިލޭޝް ބުނީ އޭނާ އަކީ ވިކާސްގެ ހާދިސާ ފެށުނީއްސުރެ ވަރަށް ގާތުން ބަލަމުން ދިޔަ މީހެއް ކަމަށެވެ. އަދި ފުލުހުންތަކެއް މަރާލި މައްސަލައެއްގައި އޭނާ ހައްޔަރުކޮށް، ފަހުން ފުލުހުންގެ ހަމަލާއެއްގައި ވިކާސް މަރާލުމަކީ އެކަމާ ގުޅޭ މުޅި އިންޑިއާ ސުވާލު އުފެއްދި ކަމަށް ބުންޏެވެ.

"މީގައި އެބަހުރި ފޮރުވިފައި ހުރި ވަރަށް ގިނަ ސިއްރުތަކެއް. އެކަންކަން އަހަރެމެން މަސައްކަތްކުރާނަން ފިލްމުގެ ތެރެއިން ގެނެސްދޭން،" ޝައިލޭޝް ބުންޏެވެ.

ވިކާސް އަށް ބިނާކޮށް ހަދާ ފިލްމު އިއުލާންކުރި ނަމަވެސް މިއާ ބެހޭ އިތުރު ތަފުސީލުތަކެއް އަދި ހާމައެއްނުކުރެ އެވެ.

އަށް ފުލަހަކު މަރާލި މައްސަލައެއްގައި މިދިޔަ މަހުގެ 9 ގައި ހައްޔަރުކޮށް، ފުލުހުންގެ ބެލުމުގެ ދަށުން ވެހިކަލެއްގައި ގެންދަނިކޮށް ހިނގި އެކްސިޑެންޓަކަށް ފަހު، ހިނގި ކުރިމަތިލުންތަކެއްގެ ތެރޭގައި ފުލުހުންގެ ހަމަލާއެއްގައި ވިކާސް މަރުވީ ޖުލައި 10 ގަ އެވެ.

އުމުރުން 56 އަހަރުގެ ވިކާސް އަކީ ބޮޑެތި 60 އަށް ވުރެ ގިނަ ކުށުގެ ރެކޯޑް އޮތް މީހެކެވެ. އުއްތަރު ޕްރަދޭޝް އަށް އުފަން ވިކާސް އަކީ ސިޔާސީ ގޮތުން ނުފޫޒު ގަދަ އަދި ގޭންގްސްޓާރެއްގެ ގޮތުގައި މަޝްހޫރުވި މީހެކެވެ.