"ސީތާ: ދި އިންކާނޭޝަން" އަށް ކަރީނާ ކަޕޫރް؟

އިންޑިއާގެ ހިންދޫންގެ މެދުގައި ވަރަށް މަގުބޫލު އަންހެން ޝަހުސިއްޔަތެއްގެ ގޮތުގައި ފާހަގަކުރެވޭ ސީތާގެ ވާހަކަ ކިދައިޔޭ ފިލްމެއްގެ ބަތަލާގެ ރޯލު ކަރީނާ ކަޕޫރަށް ހުށަހަޅާފައިވާ ކަމަށް ރިޕޯޓްތައް ބުނެފި އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނި ގޮތުގައި މި ފިލްމަކީ ބިޔަ ޕްރޮޖެކްޓެއްގެ ގޮތުގައި ހަދާ "ސީތާ: ދި އަންކާނޭޝަން" އެވެ. މިދިޔަ މަހުގެ ފަހުކޮޅު ފަސްޓްލުކް ޕޯސްޓަރު ވެސް ދައްކައިލި ފިލްމުގެ ޑައިރެކްޓަރަކީ އިންޑިއާގެ ދެކުނު ފިލްމު އިންޑަސްޓްރީގެ ކުޅަދާނަ ޑައިރެކްޓަރު އަލޯކީކް ދެސާއީ އެވެ. ފިލްމުގެ ސްކްރީންޕްލޭ ލިޔެފައި ވަނީ "ބާހްބަލީ" ލިޔުނު ކޭވީ ވިޖެންދުރަ ޕްރަސާދެވެ. އޭނާ އަކީ އެ ފިލްމުގެ ޑައިރެކްޓަރު އެސްއެސް ރާޖަމޯލީގެ ބައްޕަ އެވެ.

ކަންގަނާ ރަނާވަތުގެ 2019 ގެ ފިލްމު "މަނިކަރްނިކާ: ދި ކްއީން އޮފް ޖާންސީ" އާއި އަންނަަ މަހުގެ 23 ގައި ރިލީޒްކުރާ ކަންގަނާގެ "ތަލައިވީ" އަކީ ވިޖެންދުރަގެ ސްކްރީންޕްލޭއަކަށް ހަދާފައިވާ ފިލްމުތަކެވެ.

މީޑިއާތަކުން ބުނީ "ސީތާ: ދި އަންކާނޭޝަން" އަށް ބޮލީވުޑްގެ ދެ ބަތަލާއަކާ ދޭތެރޭ ފިލްމުގެ ޓީމުން ވިސްނި ކަމަށާއި އެއީ ކަރީނާ އާއި އާލިއާ ބަޓް ކަމަށެވެ. ނަމަވެސް ސީތާގެ ކެރެކްޓާ އަށް އެންމެ ފިޓްވާ ކަމަށް ގަބޫލުކުރެވެނީ ކަރީނާ ކަމަށްވާތީ އޭނާ އަށް ފިލްމު ހުށަހެޅުމާ ގުޅިގެން ސްކްރިޕްޓް ކަމުދިއުމުން އެއަށް ރުހުން ދޭން ވަނީ ނިންމައިފަ އެވެ. އެކަމަކު އެއްވެސް ސަބަބަކާ ހެދި ކަރީނާ ފިލްމަށް އެއްބަސްނުވާން ނިންމައިފި ނަމަ ހޮވުމަކަށް ދެން ވާނީ އާލިއާ ކަމަށް މީޑިއާތަކުން ބުންޏެވެ.

ފިލްމާ ބެހޭ މާ ބޮޑު ތަފުސީލުތަކެއް އަދި ހާމަކޮށްފައެއް ނުވެ އެވެ. އެހެންވެ ފިލްމުގެ މަސައްކަތް ފަށާނެ އިރެއް ވެސް އަދި ނޭނގެ އެވެ. ކަރީނާ މިދިޔަ މަހުގެ 21 ގައި ދެވަނަ ދަރިފުޅު ވިހެއުމަށް ފަހު މިހާރު ވަނީ އަލުން މަސައްކަތަށް ނުކުމެފަ އެވެ.

އެކަމަކު މި ވަގުތު އޭނާގެ އަތުގައި ރަސްމީކޮށް ސޮއިކޮށްފައި އޮތް ހަމައެކަނި ފިލްމަކީ "ވާނުވާގައި" އޮތް ކަރަން ޖޯހަރް ތާރީހީ ލޯބީގެ ފިލްމު "ތަޚުތު" އެވެ. ކަރީނާގެ ކުރިއަށް އޮތް ފިލްމަކީ މި އަހަރުގެ ޑިސެމްބަރުގައި ރިލީޒްކުރާ އާމިރު ޚާންގެ "ލާލް ސިންގް ޗައްޑާ" އެވެ.

ސީދާގެ ކެރެކްޓާ ބޮޑު ފެންނަން ހުރި ފިލްމުތަކުގެ ތެރޭގައި ޑައިރެކްޓަރު އޯމް ރައުތު ޕްރަބާސް އާއި ސައިފް އަލީ ޚާނާ އެކު އަންނަ އަހަރު ގެނެސްދޭ "އަދިޕުރުޝް" ހިމެނެ އެވެ. އެ ފިލްމުގެ ސީތާގެ ރޯލަށް ކްރިތީ ސެނަން މިހާރު ވަނީ ސޮއިކޮށްފަ އެވެ.

އަދި މަދޫ މަންޓޭ ޕްރޮޑިއުސްކުރާ ފިލްމެއްގައި ދީޕިކާ ޕަދްކޯން ވެސް ސީތާގެ ރޯލު ކުޅޭނެ އެވެ.