ކަންގަނާގެ މައްޗަށް ކޮޕީރައިޓްގެ މައްސަލައެއް

މިހާރު ވެސް 700 އެއްހާ ދައުވާ ބޯމަތީގައި އޮތް ބޮލީވުޑްގެ ބަތަލާ ކަންގަނާ ރަނާވަތަށް އަނެއްކާ ވެސް އިތުރު މައްސަލައަކާ ކުރިމަތިލާން ޖެހިއްޖެ އެވެ

މި ފަހަރު މައްސަލައަކަށްވީ އޭނާ ޖެނުއަރީ މަހުގެ ތެރޭގައި އިއުލާންކުރި ފިލްމު "މަނިކަރްނިކާ: ދަ ލެޖެންޑް އޮފް ޑިއްޑާ" ގެ ކޮޕީރައިޓްގެ މައްސަލަ އެވެ. އެ ފިލްމު އިއުލާންކުރި ދަނޑިވަޅު ވެސް މި މައްސަލަ ފެންމަތިވި އެވެ. އެގޮތުން "ޑިއްޑާ: ދި ކްއީން އޮފް ކަޝްމީރު" ގެ ލިޔުންތެރިޔާ އަޝިޝް ކޯލް ވަނީ އޭނާގެ ފިކުރީ މުދަލަކަށް ކަންނަގާ އަރައިގެންފައިވާ ކަމަށް ބުނެ ކޯޓަށް ހުށަހަޅައިފަ އެވެ. އަދި "މަނިކަރްނިކާ: ދަ ލެޖެންޑް އޮފް ޑިއްޑާ" ގެ ވާހަކަ ޓްވިޓާގައި ކަންގަނާ ޖެނުއަރީ މަހުގެ 14 ގައި އާންމުކުރީ އޭނާ އީމެއިލަކުން ފޮނުވި ވާހަކައިގެ ޕްލޮޓުން ބައެއް ވެސް ހުއްދަ ނެތި ހިމަނާފައިވާ ކަމަށް އަޝިޝް ބުނެފައިވެ އެވެ.

އަޝިޝް ބުނީ ވާހަކައިގެ ރައިޓްސް އޮތީ އޭނާގެ އަތުގައި ކަމަށާއި އޭނާގެ އެއްވެސް ހުއްދައެއް ނެތި އެ ވާހަކައިގެ ތެރެއަށް އެއްވެސް މީހަކަށް އަތް ނުބޭނޭނެ ކަމަށެވެ.

އެހެންވެ މި މައްސަލަ ހުށަހެޅި ބަންޑްރާ މެޓްރޮޕޮލިޓަން ކޯޓުން ހުކުރު ދުވަހު ވަނީ މުމްބާއީ ފުލުހުންގެ ކަންގަނާގެ މައްޗަށް ކޮޕީރައިޓްގެ ގާނޫނުގެ މައްސަލައެއް ރަޖިސްޓްރީކުރަން އަމުރުކޮށްފަ އެވެ. އަދި އެގޮތަށް ނިންމީ ކޮޕީރައިޓްގެ ގާނޫނާ ކަންގަނާ ހިލާފުވެފައިވާތީ ކަމަށް ބުންޏެވެ.

މި މައްސަލާގައި ކަންގަނާ އަދި ވަކި އެއްޗެއް ނުބުނެ އެވެ.

އޭނާ "މަނިކަރްނިކާ: ދެ ލެޖެންޑް އޮފް ޑިއްޑާ" އިއުލާންކުރީ 2019 ގައި ގެނެސްދިން "މަނިކަރްނިކާ: ދި ކްއީން އޮފް ޖާންސީ" އަކީ އިންޑިއާގެ ކުރީގެ ވަރުގަދަ އަންހެން ހަނގުރާމަވެރިންގެ ވާހަކަ ކިޔައިދޭ ފްރެންޗައިޒެއްގެ ގޮތުގައި ގެނެސްދޭން ނިންމާފައިވާތީ އޭގެ ދެވަނަ ފިލްމުގެ ގޮތުގަ އެވެ. ފިލްމު އިއުލާންކުރި ނަމަވެސް އެއާ ބެހޭ ތަފުސީލުތަކެއް އަދި ހާމަކޮށްފައެއް ނުވެ އެވެ.