ކަރީނާ އަށް ހުށަހެޅި "ސީތާ" ގެ ރޯލެއް ރަންވީރަށް

އިންޑިއާގެ ދެކުނު ފިލްމު އިންޑަސްޓްރީގެ ކުޅަދާނަ ޑައިރެކްޓަރު އަލޯކީކް ދެސާއީ "ސީތާ: ދި އިންކާނޭޝަން" ގެ ނަމުގައި ހަދަން ނިންމާފައިވާ ހުރާފީ ބޮޑު ފިލްމުގެ ރޯލެއް ރަންވީރު ސިންގް އަށް ހުށަހަޅާފައިވާ ކަމަށް ރިޕޯޓްތައް ބުނެފި އެވެ.

ބޮލީވުޑްގެ ހަންގާމާ އިން ބުނި ގޮތުގައި އޭނާ އަށް ހުށަހެޅީ އޭގެ ނެގެޓީވް ކެރެކްޓާ ރާވަންގެ ރޯލެވެ. "ސީތާ" އަކީ ހިންދޫންގެ ތެރޭގައި ކިޔައިއުޅޭ ހުރާފީ ވާހަކަ "މަހާބާރާތު" ގެ ކެރެކްޓާތަކަށް ބިނާކޮށް ހަދާ ފިލްމެކެވެ. މި ޒާތުގެ ދެ ފިލްމެއް މިހާރު ވެސް އިއުލާންކޮށް، އޭގެ ތެރެއިން އެއް ފިލްމުގެ މަސައްކަތް އަންނަނީ ކުރަމުންނެވެ. އެއީ ޕްރަބާސް އާއި ސައިފް އަލީ ޚާނާއި ކްރިތީ ސެނަންއާ އެކު ޑައިރެކްޓަރު އޯމް ރައުތު ހަދާ "އާދިޕުރުޝް" އެވެ. އަންނަ އަހަރު ރިލީޒްކުރާ އެ ފިލްމުގައި ރާމް އަކީ ޕްރަބާސް އެވެ. ސައިފްގެ ކެރެކްޓާ އަކީ ރާމް އެވެ. އަދި ކްރިތީ އަކީ ސީތާ އެވެ.

"މަހާބާރާތު" އަށް ބިނާކޮށް ހަދާ ދެވަނަ ފިލްމަކީ ރަންވީރު ސިންގްގެ އަންހެނުން ދީޕިކާ ޕަދްކޯން ދުރޯޕަޅީގެ ކެރެކްޓާ ކުޅެން ހަމަޖެހިފައިވާ ފިލްމެވެ. މަދޫ މަންޓޭނާއާ ގުޅިގެން ދީޕިކާ ޕްރޮޑިއުސަރެއްގެ ގޮތުގައި ވެސް ހިއްސާވާ ފިލްމުގެ ރާމްގެ ކެރެކްޓާ އަށް ތެލެގޫ އެކްޓަރު މަހޭޝް ބާބޫ ގެންނަން މަސައްކަތްކުރާ އިރު، ރާވަންގެ ކެރެކްޓާ އަށް ރިތިކް ރޯޝަން ގެނެވޭތޯ މަސައްކަތްކުރަމުން އަންނަ ކަމަށް މީޑިއާތަކުން ކުރިން ބުނެފައިވެ އެވެ. އެ ފިލްމުގެ ޑައިރެކްޓްކުރާނެ މީހަކު އަދި އިއުލާން ނުކުރެ އެވެ. ދާދި ފަހުން އަޑުއެރި ގޮތުގައި ފިލްމު ޑައިރެކްޓްކޮށްދޭން ސަންޖޭ ލީލާ ބަންސާލީ އަށް ހުށަހެޅުމުން އޭނާ ވަނީ އެ ފުރުސަތު ގަބޫލުނުކޮށްފަ އެވެ.

މި އަހަރުގެ ފެބްރުއަރީ މަހުގެ ތެރޭގައި އިއުލާންކުރި އަލޯކީކްގެ "ސީތާ" އަކީ "ބާހްބަލީ" ގެ ސްކްރީން ރައިޓަރު ކޭވީ ވިޖެންދުރަ ޕްރަސާދުގެ ސްކްރީންޕްލޭއަކަށް ހަދަން ނިންމާފައިވާ ފިލްމެކެވެ. މީޑިއާތަކުން ބުނީ ފިލްމުގެ ޓައިޓްލް ރޯލު ކަރީނާ އަށް ހުށަހެޅި ނަމަވެސް އޭނާ އަދި ރަސްމީކޮށް ފިލްމަށް ސޮއިނުކުރާ ކަމަށެވެ. އަދި ކަރީނާ ފިލްމަށް އެއްބަސްނުވެއްޖެ ނަމަ ދެން ހޮވުމަކަށް ވާނީ އާލިއާ ބަޓް ކަމަށް މީޑިއާތަކުން މާޗް މަހުގެ ތެރޭގައި ބުންޏެވެ.

"ސީތާ" އަށް ކަރީނާ އާއި ރަންވީރު އެއްބަސްވެއްޖެ ނަމަ މި ފިލްމުވާނީ ދެ ތަރިން އެކީގައި ކުޅޭނެ ފުރަތަމަ ފިލްމަށެވެ. މީގެ ކުރިން ވެސް އެ ދެ މީހުންނަށް އެކީގައި މަސައްކަތްކުރަން ފުރުސަތުތައް ލިބުނެވެ. އޭގެ ތެރެއިން އެއް ފިލްމަކީ ކަރީނާ ދޫކޮށްލުމުން ރަންވީރާއި ދީޕިކާ ކުޅުނު ބަންސާލީގެ 2013 ގެ "ރާމް-ލީލާ" އެވެ. އަނެއް ފިލްމަކީ 2018 ގައި ކަރަން ޖޯހަރް އިއުލާންކުރި ނަމަވެސް ވާނުގައި އޮތް ފިލްމު "ތަޚުތު" އެވެ. އެ ފިލްމުގެ ކާސްޓްގައި ރަންވީރާއި ކަރީނާގެ އިތުރުން ވިކީ ކޯޝަލާއި އާލިއާ ބަޓާއި ޖާންވީ ކަޕޫރާއި އަނިލް ކަޕޫރްގެ އިތުރުން ބޫމީ ޕެޑްނޭކަރް ވެސް ހިމެނެ އެވެ.

"ސީތާ" ގެ ނެގަޓިވް ރޯލު ރަންވީރަށް ހުށަހެޅި އިރު އެފަދަ ރޯލެއް މިހާރު އޭނާ އަށް އަލެއް ވެސް ނުވާނެ އެވެ. ސަބަބަކީ ބަންސާލީ 2018 ގައި ގެނެސްދިން "ޕަދުމާވަތު" ގައި ރަންވީރު ކުޅުނީ ނުބައިބައި ރޯލަކަށްވުމެވެ.

"ސީތާ" ގެ މަސައްކަތް ފަށާނެ އިރެއް އަދި އިއުލާނެއް ނުކުރެ އެވެ.

މި އަހަރުގެ ފެބްރުއަރީގައި ދެވަނަ ދަރިޔަކު ލިބުނު ކަރީނާ ދެން ކުޅޭނެ ފިލްމެއް ރަސްމީކޮށް އިއުލާންކޮށްފައެއް ނެތެވެ. އޭނާގެ ކުރިއަށް އޮތް ފިލްމަކީ ބަލިވެއިނުމާ އެކު ޝޫޓިން ނިންމައިލި އާމިރު ޚާންގެ "ލާލް ސިންގް ޗައްޑާ" އެވެ.