ދީޕިކާގެ "ދުރޯޕަޅީ" ގެ ޑައިރެކްޝަން ބަންސާލީ ގަބޫލެއް ނުކުރި

މީގެ ދޮޅު އަހަރު ކުރިން އިއުލާންކުރި ދީޕިކާ ޕަދްކޯންގެ ބޮޑު ފިލްމު "ދުރޯޕަޅީ" ޑައިރެކްޓްކޮށްދޭން ސަންޖޭ ލީލާ ބަންސާލީ އަށް ހުށަހެޅުމުން އޭނާ އެކަން ގަބޫލުނުކޮށް ދޫކޮށްލާފައިވާ ކަމަށް ރިޕޯޓްތައް ބުނެފި އެވެ.

މިފަދަ އަޑުތަކެއް އަރާފައި ވަނީ އެ ދެ މީހުންގެ މެދުގައި ކުނި ޖެހި، މިހާރު ވާހަކަ ވެސް ނުދައްކާ ކަމަށް ދާދި ފަހުން ބައެއް މީޑިއާތަކުން ބުނެފައި ވަނިކޮށެވެ. ދީޕިކާ އަކީ ބަންސާލީ އެންމެ ފަހުން ގެނެސްދިން ތިން ފިލްމުގެ ވެސް ބަތަލާ އެވެ. އެއީ 2018 ގެ "ޕަދުމާވަތު" އާއި 2015 ގެ "ބަޖިރާއޯ މަސްތާނީ" ގެ އިތުރުން 2013 ގެ "ރާމް-ލީލާ" އެވެ.

މީޑިއާތަކުން ބުނި ގޮތުގައި ދީޕިކާ އާއި ބަންސާލީއާ ދެމެދު މައްސަލަ ޖެހުނީ، އާލިއާ ބަޓާ އެކު ބަންސާލީ މިހާރު ހަދަމުން އަންނަ ފިލްމު "ގަންގޫބާއީ ކަތިއަވާޅީ" ގެ ހާއްސަ ލަވައެއްގެ އިތުރުން ބަންސާލީ ޕްރޮޑިއުސްކުރާ ވެބް ސީރީޒް "ހީރާ މަންޑީ ގެ ރޯލެއް ދީޕިކާ އަށް ހުށަހެޅުމުން ގަބޫލުނުކުރުމުންނެވެ.

ބޮލީވުޑް ހަންގާމާ އިން ބުނީ ދީޕިކާ އާއި ޕްރޮޑިއުސަރު މަދޫ މަންޓޭނާ ގުޅިގެން ގެނެސްދޭ ގޮތަށް 2019 ގައި އިއުލާންކުރި "ދުރޯޕަޅީ" ގެ ޑައިރެކްޝަން ހުށަހެޅުމުން ބަންސާލީ އެ ދޫކޮށްލީ އޭނާގެ ޑްރީމް ޕްރޮޖެކްޓެއް ކުރިއަށް އޮތުމުންނެވެ. އެއީ 2019 ގައި އިއުލާންކޮށްފައި އޮތް "ބައިޖޫ ބަވްރާ" އެވެ.

އެ ފިލްމު ބަންސާލީ ހަދަން ބޭނުން ވަނީ ދީޕިކާ އާއި ރަންބީރް ކަޕޫރާއި އާލިއާއާ އެކު ކަމަށް ބައެއް މީޑިއާތަކުން ކުރިން ބުނެފައިވެ އެވެ.

އިންޑިއާގެ ހިންދޫންގެ ތެރޭގައި ކިޔައިއުޅޭ ހުރާފީ ވާހަކަ "މަހާބާރާތު" ހިމެނޭ އަންހެން ޝަހުސިއްޔަތު ދުރޯޕަޅީ އަށް ބިނާކޮށް ހަދާ ފިލްމު "ދުރޯޕަޅީ" ގެ ރޯލެއް ތެލެގޫ އެކްޓަރު މަހޭޝް ބާބޫ އަށް ހުށަހަޅާފައިވާ ކަމަށް މީޑިއާތަކުން ބުނެފައިވެ އެވެ.

ނަމަވެސް މި ފިލްމު އިއުލާންކުރުން ފިޔަވައި އެއާ ބެހޭ އެއްވެސް ވާހަކައެއް ފަހުން އޭގެ ޓީމުން ހާމަކޮށްފައެއް ނުވެ އެވެ.

ބަންސާލީގެ "ގަންގޫބާއީ" އަކީ މި އަހަރުގެ ޖުލައި 30 އަށް ތާވަލުކޮށްފައި އޮތް ފިލްމެކެވެ.