ބަންސާލީގެ "ބައިޖޫ ބަވްރާ" ގައި ރަންބީރެއް ނޫން ކާތިކް

ޑައިރެކްޓަރި ސަންޖޭ ލީލާ ބަންސާލީ އިއުލާންކޮށްފައި އޮތް ފިލްމު "ބައިޖޫ ބަވްރާ" ގެ ބަތަލުގެ ރޯލަށް ރަންބީރް ކަޕޫރް ގެންނަން ކުރިން މަސައްކަތްކުރި ނަމަވެސް، އެކަން ހުއްޓައިލުމަށް ފަހު، ފިލްމު ކާތިކް އާރިޔަނަށް ދީފައިވާ ކަމަށް ރިޕޯޓްތައް ބުނެފި އެވެ.

މީޑިއާތަކުން ބުނި ގޮތުގައި "ބައިޖޫ ބަވްރާ" ރަންބީރަށް ދެ ފަހަރެއްގެ މަތިން ހުށަހެޅި ނަމަވެސް އެއަކަށް އޭނާގެ ފަރާތުން މާ ބޮޑު ޝައުގުވެރިކަމެއް ފާޅުކޮށްފައެއް ނުވެ އެވެ. އަދި ކަރަން ޖޯހަރްގެ ދަރުމާ ޕްރޮޑަކްޝަންގެ ފިލްމަކަށް ރަންބީރް އިސްކަން ދޭން ނިންމާފައިވާތީ، އޭނާ ފިލްމަށް ގެނައުމުގެ ހިޔާލު އެއްކޮށް ދޫކޮށްލައި، ކާތިކަށް ފުރުސަތު ދިނީ އެވެ. ކާތިކް "ބައިޖޫ ބަވްރާ" ގެ ލީޑް ރޯލު ދިނީ ބަންސާލީ ޕްރޮޑިއުސްކުރާ ވެބް ސީރީޒް "ހީރާ މަންޑީ" ގެ ބަތަލަކީ ވެސް އޭނާ ކަމަށް ކުރިން މީޑިއާތަކުން ބުނެފައި ވަނިކޮށެވެ. މި ދޭތެރެ އިން ވަރަށް ގިނައިން ބަންސާލީގެ އޮފީހަށް ކާތިކް ޒިޔާރަތްކޮށްފައިވެ އެވެ.

އެކަމަކު އޭނާ ފިލްމަށް ސޮއިކުރި ކަމަށް ބުނާ ވާހަކަ އަކީ ކަށަވަރު ވާހަކައެއް ނޫނެވެ. ބަންސާލީ އަކީ އޭނާ ހަދާ ފިލްމުތައް ރިލީޒްކުރުމާ ގާތްކޮށްފައި ނޫނީ އެ ފިލްމަކާ ބެހޭ ވާހަކައެއް މީޑިއާތަކުގައި އާންމުކޮށް ދައްކައި އުޅޭ ޑައިރެކްޓަރަކަށް ނުވާތީ "ބައިޖޫ ބަވްރާ" ގެ ކާސްޓާ ބެހޭ ގޮތުން މިހާރު ދެކެވޭ ވާހަކައިގެ ތެދުދޮގެއް ރަސްމީކޮށް ސާފެއް ނުވެ އެވެ.

ދެހާސް ބަވާރައިގައި "ބައިޖޫ ބަވްރާ" އިއުލާންކުރި އިރު އެރި އެއް އަޑަކީ ފިލްމު ހަދަން ބަންސާލީ ބޭނުން ވަނީ ރަންބީރާއި މިހާރުގެ ލޯބިވެރިޔާ އާލިއާ ބަޓާއި ކުރީގެ ލޯބިވެރިޔާ އަދި މިހާރު އެކްޓަރު ރަންވީރު ސިންގްގެ އަންހެނުން ދީޕިކާ ޕަދްކޯނާ އެކީގައި ކަމަށެވެ. އާލިއާ އަކީ ބަންސާލީ މިހާރު ގެނެސްދޭން ތައްޔާރުވަމުން އަންނަ ފިލްމު "ގަންގޫބާއީ ކަތިއަވާޅީ" ގެ ބަތަލާ އެވެ.

ދީޕިކާ އަކީ ބަންސާލީ އެންމެ ފަހުން ގެނެސްދިން ތިން ފިލްމުގެ ބަތަލާ އެވެ އެވެ. އެއީ ޕަދުމާވަތު (2018) އާއި ބަޖިރާއޯ މަސްތާނީ (2015) ގެ އިތުރުން ރާމް-ލީލާ (2013) އެވެ.

ރަންބީރަކީ ބަންސާލީގެ 2007 ގެ "ސާވަރިޔާ" އިން ބޮލީވުޑަށް ތައާރަފުކުރި އެކްޓަރެކެވެ. އެކަމަކު އޭގެ ފަހުން އެ ދެ މީހުން އެކީގައި މަސައްކަތްކޮށްފައެއް ނުވެ އެވެ.

ރަންބީރް މިހާރު އަންނަނީ ކާތިކް ވިދައިލި ފިލްމު 2018 ގެ "ސޯނޫ ކޭ ޓިޓޫ ކީ ސްވީޓީ" ގެ ޑައިރެކްޓަރު ލަވް ރަންޖަން ހަދާ ރޮމޭންޓިކް ކޮމެޑީއެއްގެ މަސައްކަތްކުރަމުންނެވެ.

"ބައިޖޫ ބަވްރާ" ގެ ކާސްޓުންނަކ ކާތިކާއި އާލިއާ އަދި ދީޕިކާ އަށް ވެއްޖެ ނަމަ މި ފިލްމު ވާނީ ތިން ތަރިން ވެސް އެކީގައި މަސައްކަތްކުރާނެ ފުރަތަމަ ފިލްމަށެވެ.