ބަންސާލީގެ "ބައިޖޫ ބަވްރާ" ގައި ރަންބީރް، އާލިއާ އަދި ދީޕިކާ؟

އަންނަ އަހަރު ގެނެސްދޭނެ ކަމަށް ބުނެ ޑައިރެކްޓަރު ސަންޖޭ ލީލާ ބަންސާލީ މިދިޔަ އަހަރު އިއުލާންކުރި ފިލްމު "ބައިޖޫ ބަވްރާ" ގެ ލީޑް ރޯލުން ފެންނާނީ ރަންބީރް ކަޕޫރާއި އޭނާގެ މިހާރުގެ ލޯބިވެރިޔާ އާލިއާ ބަޓާއި ކުރީގެ ލޯބިވެރިޔާ ދީޕިކާ ޕަދްކޯން ކަމަށް ރިޕޯޓްތައް ބުނެފި އެވެ.

މި ފިލްމު އިއުލާންކުރި ފަހުން މީގެ ކުރިން ވެސް ކާސްޓާ ބެހޭ ގޮތުން އެކި އަޑުތައް އަރާފައިވެ އެވެ. އެގޮތުން ޕްރިޔަންކާ ޗޯޕްޅާ އާއި ރަންވީރު ސިންގް އާއި އަޖޭ ދޭވްގަނާއި އާލިއާ އާއި ރަންބީރް އަދި ދީޕިކާ އަށް ވެސް "ބައިޖޫ ބަވްރާ" ހުށަހެޅި ކަމަށް ބުނާ ވާހަކަތަކެއް ކުރިން ވަރަށް ގަދައަށް ދެކެވިފައިވެ އެވެ.

ޕިންކްވިލާ އިން ބުނި ގޮތުގައި އެ ފިލްމުގެ ބަތަލުގެ ރޯލަށް ބަންސާލީގެ "ސާވަރިޔާ" އިން 2007 ގައި ބޮލީވުޑަށް ނެރުނު ރަންބީރް ވަނީ ހަމަޖައްސައިފަ އެވެ. އަދި އާލިއާ އާއި ދީޕިކާ ފިލްމަށް ގެނައުމުގެ މަސައްކަތް މިހާރު ވަނީ ފަށައިފަ އެވެ. އާލިއާ އަކީ ބަންސާލީ މި ވަގުތު ހަދަމުން އަންނަ ފިލްމު "ގަންގްބާއީ ކަތިއަވާޅީ" ގެ ބަތަލާ އެވެ. ދީޕިކާ އަކީ ބަންސާލީ އެންމެ ފަހުން ގެނެސްދިން ތިން ފިލްމު ކަމަށްވާ "ޕަދުމާވަތު" އާއި "ބަޖިރާއޯ މަސްތާނީ" ގެ އިތުރުން "ރާމް-ލީލާ" ގެ ބަތަލާ އެވެ.

ޕިންކްވިލާ އިން ބުނީ ބަންސާލީގެ "ބައިޖޫ ބަރްވާ" ގައި އާލިއާ ފެނިގެންދާނީ 1952 ގެ "ބައިޖޫ ބަވްރާ" ގައި މީނާ ކުމާރީ ކުޅުނު ގޯރީގެ ކެރެކްޓާއިން ކަމަށެވެ. އަދި ދީޕިކާ ފެންނާނީ ކުލްދީޕް ކޯރް ކުޅުނު ރޫޕްމަތީގެ ރޯލުންނެވެ.

ވަރަށް އަސަރު ގަދަ ލޯބީގެ ވާހަކައެއް ކިޔައިދިން "ބައިޖޫ ބަވްރާ" އަކީ ވިޖޭ ބަޓް ޑައިރެކްޓްކޮށް ގެނެސްދިން ފިލްމެކެވެ. މި ވާހަކަ އަލުން ސްކްރީނަށް ގެންނަކަން މިދިޔަ އަހަރުގެ އޮކްޓޯބަރު މަހުގެ ތެރޭގައި ބަންސާލީ އިއުލާންކުރީ އަންނަ އަހަރުގެ ދިވާލީގައި ފިލްމު ސިނަމާތަކަށް ގެންނަ ގޮތަށެވެ.

ނަމަވެސް އޭނާ މިހާރު ހަދަމުން އަންނަ "ގަންގްބާއީ" ކޮވިޑް-19 އާ ހެދި ނުނިމި ދިގުލައިގެން ގޮސްފައިވާތީ "ބައިޖޫ ބަވްރާ" ގެނެސްދިނުން ފަސްވުމަކީ އެކަށީގެންވާ ކަމެކެވެ. އެކަމަކު ޔަގީނުން ވެސް މިއީ ބެލުންތެރިން ވަރަށް އިންތިޒާކުރާ ފިލްމަކަށް ވާނެ އެވެ. މުހިއްމު އެއް ސަބަބަކަށް ވާނީ ރަންބީރްގެ އެހާރާއި މިހާރުގެ ލޯބިވެރިންނާ އެކު ކުޅޭ ފިލްމަކަށްވުމެވެ.

ދީޕިކާ އާއި ރަންބީރް ކުރިން ވަނީ ތިން ފިލްމެއްގައި މަސައްކަތްކޮށްފަ އެވެ. އެއީ "ތަމާޝާ" އާއި "ޔެ ޖަވާނީ ހެ ދީވާނީ" ގެ އިތުރުން "ބަޗްނާ އޭ ހަސީނޯ" އެވެ. ރަންބީރާއި އާލިއާގެ އަލަތު ފިލްމަކީ އަންނަ އަހަރު ގެނެސްދޭ "ބުރައްމަސްތުރާ" އެވެ.