ދީޕިކާ އާއި ބަންސާލީއާ ދެމެދު މައްސަލަ ޖެހުނުކަމުގެ އަޑުތަކެއް

ޑައިރެކްޓަރު ސަންޖޭ ލީލާ ބަންސާލީގެ ފެވަރިޓެއް ކަމަށްވާ ބަތަލާ ދީޕިކާ ޕަދްކޯނާ އާއި އޭނާއާ ދެމެދު މައްސަލަ ޖެހިފައިވާ ކަމަށް ރިޕޯޓްތައް ބުނެފި އެވެ.

މީޑިއާތަކުން ރިޕޯޓްކޮށްފައިވާ ގޮތުގައި ބަންސާލީ އެންމެ ފަހުން ގެނެސްދިން ތިން ފިލްމު ކަމަށްވާ "ޕަދުމާވަތު" އާއި "ބަޖިރާއޯ މަސްތާނީ" ގެ އިތުރުން "ރާމް-ލީލާ" ގެ ބަތަލާއާ ދެމެދު މައްސަލަ ޖެހުނީ ބަންސާލީ މިހާރު އާލިއާ ބަޓާ އެކު ހަދަމުން އަންނަ ފިލްމު "ގަންގޫބާއި ކަތިއަވާޅީ" ގެ ހާއްސަ ލަވައެއް ކުޅެދޭން އެދުމުން ދީޕިކާ އެކަމާ އިންކާރުކުރުމުންނެވެ.

ދީޕިކާ އަށް ހުށަހެޅި ލަވަ ގަބޫލުނުކުރުމުން އެ ލަވަ ކުޅުވާފައި ވަނީ ހުމާ ގްރޭޝީ ލައްވަ އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނީ "ގަންގޫބާއީ" ގެ ލަވަ ދީޕިކާ ގަބޫލުނުކުރުމުން ބަންސާލީ ފުރަތަމަ އެކަން މާ ބޮޑު މައްސަލައަކަށް ނަހަދާ ކަމަށެވެ. އެކަމަކު އޭނާ ޕްރޮޑިއުސްކުރަން ހަމަޖެހިފައިވާ ބިޔަ ވެބް ސީރީޒް "ހީރާ މަންޑީ" ގެ ކާސްޓްގައި ހިމެނުމުގެ ފުރުސަތު ދިނުމުންނާއި އަދި އޭގެ ރޯލެއް ކުޅެވެން ނެތް ނަމަ ހަމައެކަނި ލަވެއްގައި ހިއްސާވެ ދިނުމަށް އެދުމުން އެކަން ވެސް ދީޕިކާ ބޮލާލާ ޖަހާފައިވެ އެވެ. އެހެންވެ އެކަމާ ގުޅިގެން ދީޕިކާއާ ދޭތެރޭ ބަންސާލީ ނުރުހިފައިވާ ކަމަށް ބުންޏެވެ.

ނަމަވެސް "ބައިޖޫ ބަވްރާ" ކިޔާ ފިލްމެއް ހަދަން އިއުލާންކޮށްފައިވާތީ އެ ފިލްމުގެ އެއް ބަތަލާއަކަށް ދީޕިކާ ގެންނަން ބަންސާލީ ބޭނުންވާތީ "ގަންގޫބާއީ" ގެ މަސައްކަތްތަކުން އަތްދޫކޮށްލެވެންދެން އޭނާ ދެން ހުރީ ދީޕިކާއާ މި ވަގުތު އެއްވެސް މުއާމަލާތެއް ނުކުރަން ނިންމައިގެން ކަމަށްވެ އެވެ. ސަބަބަކީ ވަރަށް ބިޒީކޮށް "ގަންގޫބާއީ" ގެ މަސައްކަތްތަކާ އުޅެން ޖެހިފައިވާތީ އެވެ. މި ދޭތެރެ އިން ބަންސާލީ އަށް ކޮވިޑް-19 ޖެހިގެން ވެސް ފިލްމުގެ މަސައްކަތް ހުއްޓުމަކަށް އަ އެވެ. އެކަމަކު ބަލިން މިހާރު ރަނގަޅުވެފައިވާތީ އަލުން އޭގެ މަސައްކަތް ފަށާފައިވާ ކަމަށް މީޑިއާތަކުން ބުންޏެވެ.

ރިޕޯޓްތައް ބުނާގޮތުން "ބައިޖޫ ބަވްރާ" ހަދަން ބަންސާލީ ބޭނުން ވަނީ ދީޕިކާ އާއި ރަންބީރްގެ ކަޕޫރްގެ އިތުރުން އާލިއާއާ އެކީގަ އެވެ. އެހެންވެ މި އަހަރުގެ ޖުލައި 30 އަށް ތާވަލުކޮށްފައި އޮތް "ގަންގޫބާއީ" ގެ މަސައްކަތްތައް ނިންމައިލުމަށް ފަހު، "ބައިޖޫ ބަވްރާ" ގެ ތައްޔާރީތައް ބަންސާލީ ފަށާނެ އެވެ. އެ ހިސާބުން އަނެއްކާ ވެސް ދީޕިކާ ފިލްމަށް ގެނެވޭތޯ މަސައްކަތްކުރާނެ އެވެ.

އެކްޓަރު ރަންވީރު ސިންގްގެ އަންހެނުންގެ އަތުގައި މި ވަގުތު ހުރި ފިލްމުތަކުގެ ތެރޭގައި ޑައިރެކްޓަރު ޝަކުން ބަޓްރާގެ ތުރިލާއަކާއި ޝާހްރުކް ޚާންގެ "ޕަތާން" އާއި ޕްރަބާސްގެ ފިލްމަކާއި ރިތިކް ރޯޝަނާ އެކު ކުޅެން ހަމަޖެހިފައިވާ "ފައިޓާ" ގެ އިތުރުން "ދި އިންޓާން" ގެ ރިމޭކް ހިމެނެ އެވެ.