މަންޒަރު ބަލަން ނުތިބެ ފަސްޓް އެއިޑް ދީ!

މަގުމަތީގެ އެކްސިޑެންޓެއް ވެއްޖެ ނަމަ އަހަރެމެންގެ ތެރެއިން ގިނަ މީހުން ފުރަތަމަ ދިއްކޮށްލަނީ އަތުގައި އޮންނަ މޮބައިލް ފޯނެވެ. ފޯނަށް އެ މަންޒަރު ރައްކޮށްލައި ސޯޝަލް މީޑިއާ އަށް ލުމުން އެ ކަން ނިމުނީ އެވެ. އަނެއް ބަޔަކު ތިބެނީ ހަދާނެ ގޮތް ހުސްވެފަ އެވެ. އެމްބިއުލާންސް އަންނަން އެ ހޭދަވާ ވަގުތު ވެސް ކުރާނެ ކަމެއް ނޭނގި ދެ އަތް އުރާލައިގެންނެވެ. އެކަމަކު، ބޮޑު އަނިޔާއެއް ލިބިފައި އޮންނަ މީހަކަށް ފާއިތުވާ ކޮންމެ ސިކުންތެއް ވެސް ވަރަށް މުހިއްމެވެ.

މާލެ ސަރަހައްދު ފަދަ އެކްސިޑެންޓުތައް ގިނައިން ހިނގާ ތަނެއްގައި، އަވަސް ފަރުވާ ދިނުމަށް ކުރެވޭނެ ކުދި ކުދި ކަންތައްތައް އެނގުން ވަރަށް މުހިއްމެވެ.

ރެޑްކްރެސެންޓުގެ ސެންޓާ ރީޖަނަލްގެ މެނޭޖަރު މުހައްމަދު އަދީލް ވިދާޅުވީ އެކްސިޑެންޓެއް ހިނގައިގެން އުޅޭ ސަރަހައްދެއްގައި ހުރި ނަމަ މީހަކަށް އެންމެ ފުރަތަމަ ކޮށްދެވޭނީ ކަމާ ގުޅުން ހުރި ފަރާތްތަކަށް ގުޅުން ކަމަށެވެ. އެއީ އެމްބިއުލާންސްގެ ހިދުމަތަށާއި ފުލުހުންނަށެވެ. އެ އަށް ފަހު، އެ ފަރާތްތަކަށް ފަސޭހައިން އާދެވޭނެ ގޮތަށް މަގު ހުސްކުރުމަކީ ވަރަށް މުހިއްމު ކަމެކެވެ.

ފަސްޓްއެއިޑުގެ މާ ގިނަ މައުލޫމާތެއް ނޭނގުނަސް މީހަކު ވެއްޓިފައި އޮތުމުން ހިއްލައިލެވޭ ފަހަރު ވެސް މަދެއް ނޫނެވެ. އޭގެ ސަބަބުން، އިތުރު އަނިޔާތައް ވުމުގެ ފުރުސަތު އޮންނަ ކަމަށް އަދީލް ވިދާޅުވި އެވެ. އެހެންވެ، އޭނާ ވިދާޅުވި ގޮތުގައި އެ ފަދަ ހާލަތެއްގައި އެންމެ ރަނގަޅީ ފަސްޓްއެއިޑުގެ ބެކްގްރައުންޑު ނޭނގޭ މީހުން ކައިރި ނުވުމެވެ.

ލޭ މަނާކުރުމަށްޓަކައި ކޮށްދެވޭނެ ކަންތައްތައް

- ފޮތިގަނޑެއް ކަހަލަ ކެޝުއަލްޓީގެ އެއްޗެއް ދީފައި ލޭ މަނާކުރުން.

- ގަދައަށް ލޭ އަންނަ ނަމަ ހިތް ހުންނަ ހިސާބުން މައްޗަށް ހިއްލާލުން. ބޯ ބިންމަތީގައި އޮތް ނަމަ ބޯ ކުޑަކޮށް މައްޗަށް ހިއްލާލުން. އޮށޯވެގެން އޮވެއްޖަ ނަމަ ގިނައިން ލޭ ބޭރުވާވަރު ވާނެ. ކުޑަކޮށް މައްޗަށް ހިއްލައިފިއްޔާ ލޭ ބޭރުވާ ވަރު މަދުވާނެ.

އަދީލް ވިދާޅުވީ އެމްބިއުލާންސް އަންނައިރު ސްޓްރެޗާ އަދި ސްޕައިން ބޯޑު ވެސް ވަރަށް މުހިއްމު ވާނެ ކަމަށެވެ. އަދި އަނިޔާވި މީހާ އޮތީ ވާހަކަ ދެއްކޭ ހާލަތެއްގައި ނަމަ ލިބުނު އަނިޔާތައް ކިޔައިދިނުން މުހިއްމު ކަމަށް އޭނާ ވިދާޅުވި އެވެ.

"އެއްވެސް ހާލަތެއްގައި ނުގުޑިފައި އޮންނަ މީހަކު މޫވް ކުރުމަކީ ކޮށްގެން ވާނެ ކަމެއް ނޫން،" އަދީލް ވިދާޅުވި އެވެ.

"ބޭރު ފުށުން މާ ބޮޑު އިންޖަރީއެއް ނެތިއްޔާ އަމިއްލަ އަށް ތެދުވެވޭ ހާލަތަށް ދެވޭތޯ އަދި ބޯ އަނބުރަންޏާ ރަނގަޅީ ޑަބްލިއު ޕޮޒިޝަނަށް ހުޅުވައިލުން އަދި އެއާވޭ ހުޅުވާލުން، އެއީ ކަރު ހިއްލާލައި ނޭވާލާ ނިޒާމު ހުޅުވާލައި ދިނުން އެއީ ވަރަށް މުހިއްމު ކަމެއް ސަޕޯޓު އަންނަން ދެން."

ފަސްޓް އެއިޑަށް މީހުން ތަމްރީނު ކުރުމުގައި މީގެ ކުރިން ހަރަކާތްތެރިވި ފިއުނާޒް ވަހީދު ބުނިގޮތުގައި، އެކްސިޑެންޓުވެ، މީހެއްގެ ގައިން ގިނައިން ލޭ ފައިބާ ނަމަ އެ ތަނެއްގައި ފޮތި އަޅައި ޕްރެޝަރު ބޮޑުކޮށް، ލޭ މަނާކުރަންޖެހެ އެވެ.

"ގިނައިން ލޭ ބޭރުވުމަކީ މި ގޮތަށް މަރުވުމުގެ އެންމެ ބޮޑު އެއް ސަބަބު. އަވަހަށް އަދި އާދައިގެ ގޮތަކަށް އަވަސް ފަރުވާ ދީގެން ވެސް ފުރާނައެއް ސަލާމަތްކުރެވިދާނެ،" ފިއުނާޒު ބުންޏެވެ.

ފުލުހުން ހިއްސާކުރި މައުލޫމާތުތަކަށް ބަލާއިރު މިދިޔަ ޖެނުއަރީ މަހުން ފެށިގެން މިދިޔަ މަހުގެ ނިޔަލަށް ސިނަމާލެ ބްރިޖާއި ހައިވޭގައި 1،101 އެކްސިޑެންޓު ހިނގާފައި ވެ އެވެ. އޭގެ ތެރެއިން 61 މީހަކަށް ސީރިއަސް، ބޮޑެތި ޒަހަމްތައް ލިބިފައިވެ އެވެ. ނަމަވެސް، އަވަސް ފަރުވާ ލިބިއްޖެ ނަމަ ފުރާނަ ސަލާމަތްވުމުގެ އުއްމީދު ބޮޑެވެ.