އައިފޯންގެ ޑިޒައިނަށް ބަދަލަކާ އެކު އެންމެ ތުނި އަދި ވަރުގަދަ ފޯނު ތައާރަފްކޮށްފި

އެޕަލް އިން މިހާތަނަށް އުފެއްދި އެންމެ ތުނި ފޯނާއި އެންމެ ވަރުގަދަ ފޯނާ އެކު އެ ކުންފުނީގެ އާ ބައެއް އުފެއްދުންތައް ތައާރަފްކޮށްފި އެވެ. އައިފޯންގެ ހަތަރު މޮޑެލްއެއްގެ އިތުރުން އެއާޕޮޑްސް ޕްރޯ 3 އާއި އެޕަލް ވޮޗް ސީރީޒް 11 އަދި އަލްޓްރާ 3 ވެސް ތައާރަފްކުރި އެވެ.

އައިފޯން 17

އައިފޯން 17 ނެރުނީ ޑިޒައިނަށް ބަދަލެއް ނުގެނެހެވެ. އެކަމަކު މިފަހަރު ހުރީ ތަފާތު ކުލަތަކެކެވެ. އަދި މެއިން ކެމެރާގައި 48 މެގަޕިކްސެލް އަދި 12 މެގަޕިކްސެލްގެ، 2 ގުނަ ޒޫމްކުރެވޭ ޓެލެފޮޓޯ ކެމެރާއެއް ހިމެނެ އެވެ. ކެމެރާގައި މުޅިން އަލަށް އެތައް ފީޗާއެއް ވަނީ ހިމަނައިފަ އެވެ.

މި ފޯނުގެ ފެށޭ އަގަކީ 799 ޑޮލަރެވެ.

އައިފޯން އެއާ

މިއީ އެޕަލް އިން މިހާތަނަށް ހެދި އެންމެ ތުނި ފޯނެވެ. ބޯމިނުގައި ހުންނަނީ 5.6 މިލިމީޓަރެވެ. ފޯނުގެ ދެ ފަރާތަށް ވެސް ސެރަމިކް ޝީލްޑް ލައްވައި އާދަޔާ ހިލާފަށް ފޯނު ވަނީ ވަރުގަދަކޮށްފަ އެވެ. މި ފޯނު މީގެ ކުރީގެ އެއްވެސް ފޯނަކަށް ވުރެ ވަރުގަދަވާނެ ކަމަށް އެޕަލް އިން ބުންޏެވެ.

މިއީ މިހާތަނަށް އެޕަލް އިން ހެދި އެންމެ އެނާޖީ އެފިޝެންޓް ފޯނަށް ވާއިރު އެއް ދުވަސް ވަންދެން ބެޓެރީ ހިފަހައްޓާނެ އެވެ. މީގައި ހިމަނާފައި ވަނީ އެޕަލްގެ އާ ޗިޕެއް ކަމަށްވާ އެން1 އެވެ.

މި ފޯނުގައި ފްރަންޓް ކެމެރާ އާއި ބެކް ކެމަރާއިން އެއްފަހަރާ ވީޑިއޯ ރެކޯޑްކުރެވޭނެ އެވެ.

އީސިމް ނޫނީ ބޭނުމެއް ނުކުރެވޭ މި ފޯނުގެ ފެށޭ އަގަކީ 999 ޑޮލަރެވެ.

އައިފޯން 17 ޕްރޯ

މިއީ މިހާތަނަށް އެންމެ ބޮޑު ބެޓެރީއާ އެކު ހެދި އައިފޯނެވެ. އަދި އެންމެ ބާރުގަދަ އައިފޯނެވެ. މީގެ ތިން ކެމެރާއަކީ 48 މެގަޕިކްސެލްގެ ކެމެރާ އެވެ. މިއީ މިހާތަނަށް އޮޕްޓިކަލް ޒޫމް އެންމެ ވަރުގަދަ ފޯނު ކެމެރާ އެވެ. އަދި ކުރީގެ ފޯނުތަކަށް ވުރެ އެތައް ގުނައެއް ވަނީ ވަރުގަދަ ވެސް ކޮށްފަ އެވެ.

ހުރިހާ ގޮތަކުން ވެސް ވަރުގަދަ މި ފޯނުގެ ފެށޭ އަގަކީ 1،099 ޑޮލަރެވެ.

ވީޑިއޯގެ ފެންވަރު ވެސް އިތުރަށް ވަނީ މި މޮޑެލްގައި ވަރުގަދަކޮށްފަ އެވެ. މިރޭގެ އެޕަލް އިވެންޓު ވީޑިއޯކޮށްފައިވަނީ ވެސް އައިފޯން 17 ޕްރޯއިންނެވެ.

އައިފޯން 17 ޕްރޯގެ އިތުރުން ބޮޑެތި ސައިޒު ކަމަށްވާ ޕްރޯ މެކްސް ވެސް މިރޭ ތައާރަފްކުރި އެވެ.

މި ހުރިހާ ފޯނެއް ވެސް ފެށެނީ 256 ޖީބީންނެވެ.

މި ހުރިހާ ފޯނަކަށް ވެސް ހުކުރު ދުވަހުން ފެށިފެން ޕްރީއޯޑާކުރެވޭނެ އެވެ. އަދި މި މަހުގެ 19 ވަނަ ދުވަހުން ފެށިގެން ލިބޭނެ އެވެ.

އެޕަލް ވޮޗް ސީރީޒް 11، އެޕަލް ވޮޗް އަލްޓްރާ 3

އެޕަލް ވޮޗަށް ގެނައި ތަރައްގީގައި ހައިޕަޓެންޝަން ނުވަތަ ލޭމައްޗަށް ދިއުމުގެ އަލާމާތްތައް ދެނެގަ އެވެ. މި މަހު ވެސް މި ފީޗާ 150 ގައުމަކަށް ލިބޭނެ އެވެ. އެޕަލް ވޮޗް ސީރީޒް 11 ގައި ގަޑީގެ ބެޓެރީ 24 ގަޑިއިރު ހުންނާނެ އެވެ. މީގެ އިތުރުން ސްލީޕް ސްކޯ ވަނީ ހިމަނައިފަ އެވެ.

ކޫރު އެޅުން ދެ ގުނަ ކުޑަވާނެ އެވެ. މީގައި ސެލިއުލާ 5ޖީ ވަނީ ހިމަނައިފަ އެވެ.

އަލްޓްރާ 3 ވެސް ވަނީ ސްކްރީން ސައިޒު ބޮޑުކުރުމާ އެކު އިތުރު ފީޗާތައް ހިމަނައި ވަރުގަދަކޮށްފަ އެވެ. އަދި ބެޓެރީ ވެސް 42 ގަޑިއިރު ވަންދެން ހުންނާނެ އެވެ. އަދި ސެޓެލައިޓް ކަނެކްޓިވިޓީ ވެސް މި ފީޗާ ލިބޭ ގައުމުތަކުގައި ލިބޭނެ އެވެ.

އެޕަލް ވޮޗް އެސްއީ 3 249 ޑޮލަރަށް އަދި ސީރީޒް 11 399 ޑޮލަރަށް އަދި އަލްޓްރާ 3، 799 ޑޮލަރަށް ލިބޭނެ އެވެ.

އެއާޕޮޑްސް ޕްރޯ 3

އެއާޕޮޑްސް ޕްރޯ 3 ގައި ނޮއިސް ކެންސަލޭޝަން އެންމެ ފަހުގެ އެއާޕޮޑަށްވުރެ ދެ ގުނަ އިތުރެވެ. މީގެ އެންމެ ހާއްސަކަމަކީ އެއާޕޮޑުން ވަގުތުން ތަރުޖަމާކޮށްދިނުމެވެ. ލައިވް ޓްރާންސްލޭޝަންގައި އެހެން މީހަކު އެހެން ބަހަކުން ވާހަކަދައްކާއިރު އެއާޕޮޑުން އަންނާނީ ތަރުޖަމާ އެވެ. އަދި ދެ މީހުން އެއާޕޯޑް އަޅައިގެން ހުރި ނަމަ، ދެ މީހުން ދެ ބަހަކުން ވާހަކަދެއްކި ނަމަވެސް ކޮންމެ މީހަކަށް ވެސް އެ މީހަކަށް އެނގޭ ބަހަކުން ތަރުޖަމާ ވަގުތުން ލިބެމުންދާނެ އެވެ.

މީގެ ބެޓެރީ ވަރުގަދަކޮށް މިހާރު ވަނީ އެއް ފަހަރު ޗާޖުކުރުމުން ހަ ގަޑިއިރު ހުންނަ ހުރުނަށް 8 ގަޑިއިރަށް އިތުރުކޮށްފަ އެވެ. މީގެ އަގަކީ 249 ޑޮލަރެވެ.