ސަރުކާރުގެ ހަރަދުގައި ހުޅުމާލޭގައި އަޅާ ބައިނަލްއަގްވާމީ ފެންވަރުގެ އެކެޑަމީ (ޓްރެއިނިން ސްކޫލް)ގެ މަސައްކަތް ކުރިއަށް އޮތް ތިން މަސް ތެރޭ ނިންމާނެ ކަމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް)ގެ ރައީސް ބައްސާމް އަދީލް ޖަލީލް މިއަދު ވިދާޅުވެއްޖެ އެެވެ.
އެފްއޭއެމް ހައުސްގައި މިއަދު ބޭއްވި ނޫސްވެރިންގެ ބައްދަލުވުމެއްގައި ބައްސާމް ވިދާޅުވީ ޓްރެއިނިން ސެންޓަރުގެ މަސައްކަތް ކުރިއަށްދަނީ ދެ ފޭހަކަށް ބަހާލައިގެން ކަމަށެވެ.
ފުރަތަމަ ފޭހުގައި ހިމެނެނީ އޮފީހަކާއި އެކޮމަޑޭޝަން ބްލޮކެއްގެ އިތުރުން ބޮޑު ޓާފް ދަނޑަކާއި ޖިމެއްގެ އިތުރުން ނަމާދުކުރާ ތަނެކެވެ. ދެ ވަނަ ފޭހުގެ މަސައްކަތް ފަހުން ކުރިއަށްގެންދަން ހަމަޖެހިފައިވާއިރު، އިތުރުވާނީ ދަނޑުތަކެއް ކަމަށް ބައްސާމް ވަނީ ވިދާޅުވެފަ އެވެ.
"ރާއްޖޭގެ އިއްޒަތްތެރި ރައީސުލް ޖުމުހޫރިއްޔާގެ އިސްނެންގެވުމުގެ މަތިން ސަރުކާރުން މުޅިން ފަންޑް ކޮށްގެން ފަށާ ޓްރޭނިން ސެންޓަރެއް މިއީ. އަޅުގަނޑުމެން އަދި ސަރުކާރުގެ ވެސް ބޭނުމަކީ ރާއްޖޭގެ ފުޓްބޯޅަ މިހާރު އޮތް ހަރުފަތުން އެހެން ހަރުފަތަކަށް ހިއްލާލުމުގެ މަސައްކަތްކުރުން. އޭގެ ތެރޭގައި ބޮޑަށް މަސައްކަތް ކުރަން މި ޖެހެނީ ގްރާސް ރޫޓް ނޫނީ ޔޫތު ރަގަޅުކުރަން،" ބައްސާމް ވިދާޅުވި އެވެ.
އޭނާ ވިދާޅުވީ މި އެކެޑަމީގެ މަސައްކަތް ފަށާއިރު ވެސް ފެންވަރު ރަނގަޅު ކުރުމުގެ ގޮތުން ރާއްޖެއިން ބޭރުގެ ނަން މަޝްހޫރު އެކެޑަމީއަކާ ވާހަަކަ ދައްކަމުން އަންނަ ކަމަށެވެ.
"މި އެކެޑަމީ މިއަށް ވުރެން ވަރުގަދަ ކުރުމުގެ ގޮތުން އަޅުގަނޑުމެން މިދަނީ ބޭރުގެ ވަރުގަދަ ބަޔަކާ މަޝްވަރާ ކުރަމުން، އަޅުގަނޑުމެންނާ ބައިވެރިވުމަށް. ވޯލްޑް ކަޕް ނިމުމުން އެ މީހުންނާ ވަރުގަދަ މަޝްވަރާތަކެއް ފެށިގެންދާނެ. އެ ހިސާބަށް ދިޔައީމާ އަޅުގަނޑުމެން އެ ބައެއްގެ ނަން ހިއްސާ ކުރާނަން،" ބައްސާމް ވިދާޅުވި އެވެ. "އަޅުގަނޑުމެން ބޭނުންވަނީ މި ހެދޭ އެކެޑަމީ އަކީ އެންމެ ފުރަތަމަ ދުވަހުން ފެށިގެން ވެސް ސާކް ސަރަހައްދުގެ އެންމެ ވަރުގަދަ އެއް އެކެޑަމީ އަށް ވެގެންދިއުން."
އޭނާ ވިދާޅުވީ އެކެޑެމީގެ ކަންތައްތައް ހަމަޖައްސާނީ ފީފާ އާއި އޭއެފްސީގެ ބޭފުޅުން ދޭ ލަފާގެ މަތިން ކަމަށާއި މި ހުރިހާ ކަމެއްގައި ވެސް ބަލާނީ ވީ އެންމެ ފުރިހަމަކޮށް ކަންތައްތައް ކުރިއަށް ގެންދިއުމަށެެވެ.
މި އެކެޑަމީގެ ފުރަތަމަ ފޭހަށް ބޭނުންވާ ބަޖެޓް އެއްކޮށް ލިބިފައިވާ ކަމަށާއި މިހާރު އޮތް ޝެޑިއުލަށް ހުރިހާ ކަމެއް ކުރިއަށްދާނެ ކަމުގެ ޔަގީންކަން އެބައޮތް ކަމަށް ބައްސާމް ވަނީ ވިދާޅުވެފަ އެވެ.
އެކެޑަމީ އަށް ކުޅުންތެރިން ހޮވާނީ މުޅި ރާއްޖެ އިން
އެފްއޭއެމުން ބުނީ މި އެކެޑަމީ ހަދަނީ 13 އަހަރުން ފެށިގެން 17 އަހަރާ ދެމެދުގެ އުމުރުފުރާގެ ކުދިންނަށް ހާއްސަކޮށް، އެއް ފަހަރާ 100 ކުދިންނަށް ތިބެވޭ ގޮތަށެވެ. ފިރިހެން ކުދިންނަށް ހާއްސަކޮށްގެން ފުރަތަމަ މަސައްކަތް ފަށާއިރު، އެކެޑަމީގެ ކަންތައްތައް އޮންނާނީ ބޯޑިން ގޮތަށެވެ. އެ ގޮތުން ފުޓްބޯޅައިގެ އިތުރުން ކިޔެވުމުގެ ކަންތައްތައް ވެސް ކުރިއަށްދާނެ އެވެ. އަދި އަހަރުން އަހަރަށް ކުދިންގެ ކިޔެވުމާއި ކުޅުމުގެ ކަންތައްތައް މޮނިޓާކުރާނެ އެވެ.
އެފްއޭއެމްގެ ޑެޕިއުޓީ ޓެކްނިކަލް ޑައިރެކްޓަރު އިހުސާން އަބްދުލް ގަނީ (ސާންތީ) ވިދާޅުވީ ކުދިން ހޮވުމަށް އަތޮޅުތަކަށް ދާއިރު ފުޓްބޯޅައިގެ މަގުބޫލު ރަށްތަކަށް އިސްކަންދޭނެ ކަމަށެވެ.
"ފުރަތަމަ ރާވާފައި އޮތީ އެފްއޭއެމްގެ ކޯޗުންނާ އެހީވެދޭން ތިބި އެހެން ކޮލިފައިޑް ކޯޗުން އަތޮޅު ތެރެއަށް ގޮސް ކުޅުންތެރިންތަކެއް ނަގާގޮތަށް. އަތޮޅު ތެރެއަށް ދިއުމުގައި ވެސް އަޅުގަނޑުމެން މި ދަނީ ފުޓްބޯޅައިގެ މަގުބޫލު ރަށްތަކަށް. ފުޓްބޯޅައިގެ ތާރީހު އޮތް ރަށްތަކަށް އަޅުގަނޑުމެން އިސްކަންދެން. ކުޅުންތެރިން ނެގުމުގައި ޓެކްނިކަލް އަދި ޓެކްޓިކަލް ކަންތައްތަކަށް ބަލާނަން،" ސާންތީ ވިދާޅުވި އެވެ.
ސާންތީ ވިދާޅުވީ ސަރުކާރާ ގުޅިގެން އެފްއޭއެމުން މި ވަރުގެ ބޮޑު އިންވެސްޓްމަންޓްތަކެއް ކުރާއިރު ކުދިން ހޮވުމުގައި ބަލާ އެކި ކަހަލަ މިންގަނޑުތަކެއް ހުންނާނެ ކަމަށެވެ.
"މި ކުދިން ހޯދާއިރު އަޅުގަނޑުމެން އެބަ ބަލަން އިސްކޮޅަށް، އެ ކުދިންގެ ބަރުދަނަން. ދެން މެޑިކަލީ ރަނގަޅު ކުއްޖެއްތޯ ވެސް ބަލަން. އެއީ މެޑިކަލް ސްކްރީނިން އާ ކަންތައްތައް ކުރިއަށްގެންދިޔައީމަ އެނގޭނީ އެ ކުއްޖެއްގެ ސިއްހީ ހާލަތު،" އޭނާ ވިދާޅުވި އެވެ.
ސާންތީ ވިދާޅުވީ ރަށްތަކުން ކުޅުންތެރިން ހޮވުމަށް ފަހު މާލެ ގެނެސް ކުރިއަށް ގެންދާނީ ފައިނަލް ސިލެކްޝަން ކަމަށާއި އެ އަށް ފަހު އެކަޑަމީ އަށް ކުޅުންތެރިން ނަގާނީ ވެވޭ އެގްރީމެންޓެއްގެ ދަށުން ކަމަށެވެ.
"ހޮވޭ ކުޅުންތެރިންނާ އަޅުގަނޑުމެން ބައްދަލުކުރާނީ ބެލެނިވެރިޔާއާ އެކު. ދެން އެއްބަސްވުމެއް ވުމަށް ފަހު އެކެޑަމީ އަށް ކުޅުންތެރިން ވައްދާފައި ކިޔެވުމާއި އެހެނިހެން ޕްރޮގްރާމްތައް ކުރިއަށްދާނެ. ހުޅުމާލެ ސްކޫލެއް މި ދަނީ ބަލަމުން. އެ ކުޅުންތެރިން އެތާ ތިބޭއިރު ވެސް އެކި ޕްރޮގްރާމްތައް ކްލާސްތައް ރާވާނަން އިޖުތިމާއީ ޒިންމާ އާއި ދީނީ ކަންތައްތަކާ ގުޅޭގޮތުން ވެސް،" އޭނާ ވިދާޅުވި އެވެ.
އެކެޑަމީގެ ކަންތައްތައް ކުރިއަށްދާ ގޮތް ވަރަށް ރަނގަޅަށް ބަލާނެ ކަމަށާއި ކުދިންނަށް ފުރިހަމަވާން ޖެހޭ ކަންތައްތައް ރަނގަޅު ކުރުމަށް ރަނގަޅު ވަސީލަތްތަކެއް ގާއިމްކުރަން ވެސް ވަނީ ނިންމައިފަ އެވެ.
"މި ހުރިހާ ކަމެއް ކުރިއަށްދާނީ ފީފާ އާއި އޭއެފްސީއާ ގުޅިގެން ހަދާ ކަރިކިއުލަމެއްގެ ތެރެއިން. ދެން އެހެން ކަންތައްތައް ފުރިހަމަ ކޮށްދިނުމަށް ފިޓްނަސް އާއި ނިއުޓްރިޝަން ބައްޓަން ކުރާނެ ގޮތްތައް ބެލެހެއްޓުމަށް ބޭރުން އެކަމާ ބެހޭ މާހިރުން ގެންނަން ހަމަޖެހިފައި އޮތީ،" ސާންތީ ވިދާޅުވި އެވެ.
ކްލަބްތަކުގެ ފުރިހަމަ އެއްބާރުލުން ލިބޭނެ ކަމުގެ ޔަގީންކަން އެބައޮތް
އެފްއޭއެމްގެ ރައީސް ބައްސާމް ވިދާޅުވީ އެފްއޭއެމް އިން ގައުމީ ލެވެލްގެ އެކެޑަމީއެއް ފެށި ނަމަވެސް މިއީ އެހެން ފަރާތްތަކަށް އޮތް ހުރަހެއް ނޫން ކަމަށެވެ. އަދި އެހެން އެކެޑަމީތަކަށް އޮތް ހުރިހާ ފުރުސަތުތަކެއް އޮންނާނެ ކަމަށް ވިދާޅުވި އެވެ.
"ރާއްޖޭގައި އެބައޮތް ވަރަށް ގިނަ އެކެޑަމީތައް. އަޅުގަނޑުމެން ބޭނުމެއް ނުވޭ އެ އުވިގެންދާކަށް. އެ އެކަޑަމީތަކަށް ވެސް ކުދިން ދާންވާނެ. ނެޝަނަލް ފުޓްބޯލް އެކެޑަމީ އަށް އަޅުގަނޑުމެން ބަލާނީ ހުނަރުގެ ގޮތުން އެންމެ ރަނގަޅު ކުދިން ގެންނަން. މިހެން ބުންޏަސް އެހެން އެކެޑަމީ އަކުން ޓްރެއިން ވެގެން ރަނގަޅުވާ ކުއްޖަކަށް އަޅުގަނޑުމެންނާ ގުޅުމުގެ ފުރުސަތު އޮންނާނެ،" ބައްސާމް ވިދާޅުވި އެވެ.
އެފްއޭއެމުން ވަނީ އެ އިދާރާ އިން ފަށާ މި އެކެޑަމީގެ މަސައްކަތުގެ ނަތީޖާ ހޯދަން ދުރު ރާސްތާ ޕްލޭނެއް ވެސް އެކުލަވާލައިފަ އެވެ.
"އަޅުގަނޑުމެން ނިންމާފައިވާނީ މި ތަނުގެ މަސައްކަތްތައް ފެށުމާ އެކު ކުރިއަށް އޮތް ފަސް އަހަރުގެ ތެރޭގައި އަޅުގަނޑުމެންގެ ފުރަތަމަ ޑިވިޝަން ނޫނީ ދެ ވަނަ ޑިވިޝަނަށް ކުޅުންތެރިން ނެގުމުގައި މި އެކެޑަމީގެ ކޮންމެވެސް ވަރަކަށް ތަމްރީން ހަދާފައި ތިބި ކުޅުންތެރިން ނެގޭގޮތަށް. ފުރަތަމަ ފަސް އަހަރަށް މި ރާވަނީ 30 ޕަސެންޓަކީ ކްލަބެއްގައި މި ތަނުން ތަމްރީންވި ކުޅުންތެރިންނަށް ވާން ޖެހޭ ކަމަށް. ދެން 10 ނޫނީ 12 ވަރަކަށް އަހަރަށް އަޅުގަނޑުމެން ބަލާނީ 100 ޕަސެންޓަކީ މި ތަނުގެ ކުދިންނަށް ވުން،" ބައްސާމް ވިދާޅުވި އެވެ.
ކްލަބްތަކާ އެކު މިހާރު ހަދާފައިވާ އެސްއޯއީގެ އެއްބަސްވުމުގެ ދަށުންނާއި ކްލަބް ލައިސަންސިން ސިސްޓަމްގެ ތެރެއިން މިހާރު ވެސް ގިނަ ކްލަބްތަކުން އަންނަނީ އެކެޑަމީ ހިންގަމުންނެވެ. އެފްއޭއެމުން އެކެޑަމީގެ މަސައްކަތް ފެށުމުގެ ކަންތައްތައް ކުރިއަށްގެންދާއިރު، އެކަމާ ބެހޭ މައުލޫމާތު ކްލަބްތަކާ ހިއްސާކުރާނެ ކަމަށް ޑެޕިއުޓީ ޓެކްނިކަލް ޑައިރެކްޓަރު ސާންތީ ވަނީ ވިދާޅުވެފަ އެވެ.
"އަޅުގަނޑުމެންނަށް ކްލަބްތަކުގެ އެއްބާރުލުން ލިބޭނެ ކަމުގެ ހެއްކެއް މިހާރު ވެސް ފެންނަން އޮތީ. އެއީ މި މަހު 7 ވަނަ ދުވަހު ފަށާ 13 އަހަރުން ދަށުގެ ޔޫތު ލީގަށް ލިބުނު ތަރުހީބުން. އިރާދަކުރެއްވިއްޔާ ކުރިއަށް ވެސް ރަނގަޅުވާނެ. ދެން މި އެކެޑަމީއާ އެކު އަންނަ ޓްރެއިނިން ސެންޓަރުގެ ސަބަބުން މިހާރު ދިމާވެފައި އޮތް އިންފްރާސްޓްރަކްޗާގެ މައްސަލަތަކަށް ހައްލެއް ލިބޭނެ،" ސާންތީ ވިދާޅުވި އެވެ.
އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) ވިދާޅުވީ މިހާރު ވެސް ކްލަބްތަކަށް އެފްއޭއެމްގެ ފަރާތުން ދޭން ޖެހޭ އެޑްމިނިސްޓްރޭޓިވް ސަޕޯޓް ފުރިހަަމަ އަށް ދެމުންދާ ކަމަށެވެ.
