ހުޅުމާލޭގައި ޕާކް ކޮށްފައި އޮތް ކާރަކުން ފެނުނު 91 ޕެކެޓް [ގާތްގަނޑަކަށް 91 ކިލޯ] ޑްރަގްސްގެ މައްސަލާގައި ހައްޔަރުކޮށްފައިވާ އަހްމަދު މުޖާހިދަކީ ވަޒީފާއެއް އަދާނުކުރާ އަދި އާމްދަނީއާ ނުބައްދަލު ދިރިއުޅުމެއް އުޅޭ މީހެއް ކަމަށް ފުލުހުން ތުހުމަތުކޮށްފި އެވެ.
މި މަހުގެ 14 ވަނަ ދުވަހު ހައްޔަރުކުރި މުޖާހިދު، 29، ގެ ބަންދުގެ އިތުރު ކުރުމަށް މިއަދު ކްރިމިނަލް ކޯޓަށް ހާޒިރުކުރުމުން އިތުރު 15 ދުވަހުގެ މުއްދަތު ދީ ނެރުއްވި އަމުރުގައި ގާޒީ ދީބާނާޒް ފަހުމީ ވިދާޅުވެފައިވާ ގޮތުގައި ގދ. ހޯނޑެއްދޫ މީހެއް ކަމަށްވާ މުޖާހިދަކީ އާމްދަނީއާ ނުބައްދަލު ދިރިއުޅުމެއް އުޅޭ މީހެއް ކަމަށް ފުލުހުން ބުންޏަސް ދިފާއީ ވަކީލުން އެކަން ދޮގުކުރެ އެވެ.
އަމުރުގައިވާ ގޮތުން މުޖާހިދަކީ ގިނަ ދުވަސްތަކެއް ވަންދެން ވަޒީފާ އަދާކޮށްފައިވާ މީހެއް ކަމަށް ދިފާއީ ވަކީލުން ވަނީ ބުނެފަ އެވެ. އަދި އޭނާގެ އަންހެނުންނަކީ މިހާރު ވެސް ވަޒީފާ އަދާކުރާ މީހެއް ކަމަށް ވަކީލުން ބުނެފައިވެ އެވެ. ދިފާއުން ބުނި ގޮތުގައި މަސްތުވާތަކެތި ފެނުނު ކާރާ މުޖާހިދާ ގުޅުވޭނެ ހެއްކެއް ފުލުހުން ހުށަހަޅައިފައެއް ނުވެ އެވެ. އަދި މައްސަލަ ރަނގަޅަށް ތަހުގީގެއް ވެސް ނުކުރެ އެވެ. މުޖާހިދަކީ ކުށުގެ ރެކޯޑެއް ވެސް ނެތް މީހެއްކަން ވެސް ދިފާއުން ފާހަގަކުރި އެވެ.
މުޖާހިދުގެ ދިރިއުޅުން އާމްދަނީއާ ނުބައްދަލު ކަމަށް ބުނާ ބުނުމުގެ ތަފްސީލެއް އަމުރުގައި ހާމަކޮށްފައެއް ނުވެ އެވެ.
ނަމަވެސް މީގެ ކުރިން ފުލުހުން ވަނީ މަސްތުވާތަކެތި ފެނުނު ކާރުން މުޖާހިދުގެ ދަރިފުޅުގެ ވަރަށް ފަހުގެ ޑޮކިއުމެންޓްތަކެއް ކޯޓަށް ހުށަހަޅައިފަ އެވެ. އެންމެ ފަހުން ބޭއްވި ބަންދު މަޖިލީހުގައި މުޖާހިދަށް 14 ދުވަހުގެ ބަންދު އިތުރުކުރި އިރު، ކާރުން ފެނުނު ލިޔުންތަކަކީ ކުއްޖާގެ ބެލެނިވެރިއެއްގެ އަތުގައި ނޫނީ ހުރުން އެކަށީގެން ނުވާ ލިޔުންތަކެއް ކަމަށް ގާޒީ ވިދާޅުވެފައިވެ އެވެ.
މުޖާހިދު މިއަދު ކޯޓަށް ހާޒިރުކޮށް ފުލުހުން ވަނީ ޝަރީއަތް ނިމެންދެން އޭނާ ބަންދުގައި ބަހައްޓަން އެދިފަ އެވެ. ނަމަވެސް ގާޒީ މިއަދު ނިންމެވީ އެފަދަ އަމުރެއް ނެރެދޭން ވަނީ މައްސަލަ މައުޟޫއީ ގޮތުން ބައްލަވާ ފަނޑިޔާރު ކަމަށް ބުރަވެވޭ ކަމަށެވެ.
ދެން ހިމެނެނީ ޑްރަގްގެ ބޮޑު ކޭސްއަކުން ސަލާމަތްވި ބައެއް
މުޖާހިދާ ގުޅުން ހުރި ކަމަށް ބުނާ ކާރުން ފެނުނު 91 ޕެކެޓްގެ އިތުރުން މާލޭން ހުއްޓުވި ޓެކްސީއަކުންނާ އެކު 119 ކިލޯ ޑްރަގްސް ފެނުނު މި މައްސަލާގައި ހައްޔަރުކޮށްފައިވާ މީހުންގެ ތެރޭގައި މީގެ ކުރިން ޑްރަގްގެ ބޮޑު ކޭސްއަކުން ސަލާމަތްވި ބަޔަކު ވެސް ހިމެނެ އެވެ. އެއީ މިދިޔަ އަހަރުގެ ޖެނުއަރީ މަހު މާލޭގެ ގެތަކެއް ފާސްކޮށް ނުވަ ކިލޯ ޑްރަގްސް ހޯދައި އެ މައްސަލާގައި ހައްޔަރުކުރި ބައެއް މީހުންނެވެ.
ފުލުހުން ކުރިން ބުނެފައިވާ ގޮތުގައި 119 ކިލޯ ޑްރަގް މައްސަލާގައި ހައްޔަރުކޮށްފައިވަނީ ތިން މީހެކެވެ. އެހެންވެ މުޖާހިދުގެ އިތުރުން ދެން ހިމެނޭ ދެ މީހުންނަކީ ޑްރަގް ޓްރެފިކިން ދައުވާއިން ކުރިން ސަލާމަތްވި މީހުންގެ ތެރެއިން ދެ މީހެކެވެ.
އެއީ ޑްރަގްގެ ބޮޑު ނެޓްވޯކެއް ކަމަށް ބުނާ މީހުންގެ ތެރެއިން ދޫވި ހަ މީހުންގެ ތެރޭގައި ހިމެނޭ އަހްމަދު ސުނައިން، 25، އާއި އަލީ ޒުބައިރު، 51، އެވެ. މި ދެ މީހުން ވެސް މިއަދު ވަނީ ޑްރަގް ޓްރެފިކިން މައްސަލާގައި ކުރިން ހައްޔަރުކޮށް މިއަދު ބަންދުގެ މުއްދަތު އަނެއްކާވެސް އިތުރުކޮށްފަ އެވެ. މި ދެ މީހުންނަކީ ވެސް ގދ. ހޯނޑެއްދޫ މީހުންނެވެ. އަދި ނެޓްވޯކްގައި އިސްކޮށް ހުރި ކަމަށް ފުލުހުން ތުހުމަތުކުރާ މީހާ އާއި ހުޅުމާލޭން ޑްރަގްސް ފެނުނު ކާރާ ގުޅުން ހުރި މީހާ އަކީ ވެސް އެ ރަށު މީހުންނެވެ.
އަލީ ޒުބައިރާ ދެކޮޅަށް ފުލުހުން ވަނީ ހެކީގެ ގޮތުގައި ސީސީޓީވީ ފުޓޭޖް ސްކްރީންޝޮޓްތަކެއް ހުށަހަޅައިފަ އެވެ. އަދި ސުނައިނުއާ ދެކޮޅަށް ވެސް ފުލުހުން ކޯޓުގައި ވާހަކަ ދެއްކި އެވެ.
މި ދެ މީހުން ވެސް ޝަރީއަތް ނިމެންދެން ބަންދުގައި ބައިތިއްބަން ފުލުހުން އެދުނަސް ގާޒީ ނިންވެނީ 15 ދުވަހުގެ ބަންދެއް ދިނުމަށެވެ.
މި ދެ މީހުންނަކީ ގދ. ހޯނޑެއްދޫ އަލޯރާ އަރުޝަދު ހާލިދު، މއ. ވައިލެޓްމާގެ އަސްލަމް ނާޒިމާއި ލ. ކަލައިދޫ މަތަރަސްމާގެ ހުސައިން ޒަހީނާއި ގދ. ހޯނޑެއްދޫ މެޑްރިޓްހައުސް، އަހްމަދު ގިޔާސް އާއި މ. ދާރުލްގަރާރު އިސްމާއިލް ވިޝާލް އަދި ޅ. ނައިފަރު މިސްކިތްދޮށުގެ އަހްމަދު އިމްސާހުއާ އެކު ދައުލަތުން މީގެ ކުރިން ޑްރަގް ޓްރެފިކިން ދައުވާ އުފުލި މީހުންނެވެ. މީގެ ތެރެއިން އިސް މީހަކީ އަރުޝަދު ކަމަށް ދައުލަތުން ތުހުމަތުކުރެ އެވެ.
މި މީހުންގެ ތެރެއިން ދެ މީހަކު ފިޔަވައި އެހެން މީހުން ކްރިމިނަލް ކޯޓުން ސަލާމަތްވުމުން މިހާރު ވަނީ އެ މައްސަލަ ހައި ކޯޓުގައި އިސްތިއުނާފުކޮށްފަ އެވެ.
މީގެ ތެރެއިން ކުށް ސާބިތުވެ މިދިޔަ ސެޕްޓެމްބަރު މަހު ހުކުމްކުރީ އަސްލަމާއި ޒަހީނަށެވެ. އެހެންވެ އެ ދެ މީހުން ވެސް އުމުރަށް ޖަލަށްލައި އެއް ލައްކަ ރުފިޔާއިން ޖުރިމަނާކުރީ އެވެ. އޭގެ އިތުރުން ޒަހީންގެ ގޭގެ އެކި ތަންތަނުން ފެނުނު 19،500ރ. އާއި، 10،500ރ. އާއި 44،300ރ. އާ އެކު ޖުމްލަ 74،300ރ. ދައުލަތަށް ނަގަން ވެސް ހުކުމް ކުރި އެވެ.