ވައިގެ މަގުން ރާއްޖެއަށް ޑްރަގްސް އެތެރެކުރި ޕާކިސްތާނު ތިން މީހުންގެ ތެރޭގައި ހިމެނޭ އަންހެން މީހާ "އަމިއްލައަށް މަރުވާން ހިތަށްއަރާ" ކަމަށް ކޯޓުގައި ބުނެފައި ވަނީ އޭނާ ރަނގަޅަށް ބަލަހައްޓަން ކްރިމިނަލް ކޯޓުން އަންގައިފި އެވެ.
މިދިޔަ ޑިސެމްބަރު މަހު ހައްޔަރުކުރި ބުސްރާ އަނީސް، 51، ބަންދުގައި ހުންނައިރު ރަނގަޅަށް ބަލަހައްޓަން ގާޒީ ދީބާނާޒް ފަހުމީ އަމުރުކުރެއްވީ ބުސްރާގެ ބަންދުގެ މުއްދަތު އިތުރު ކުރުމަށް އިއްޔެ ކޯޓަށް ގެންދިއުމުންނެވެ.
ބުސްރާ އަކީ ޕާކިސްތާން ދެ މީހުން ކަމަށްވާ މުހައްމަދު ޔަސީން، 49، އަދި މުނީރް އަޒީޒް، 41، އާ އެކު ހައްޔަރުކުރި މީހެކެވެ. މި ތިން މީހުންގެ އަތުން ފެނުނު މަސްތުވާތަކެތީގެ ބަރުދަނުގައި 2.485 ކިލޯގްރާމް ހުއްޓެވެ. މި މީހުންގެ ތެރެއިން ބުސްރާގެ ޖަނގިޔާ ތެރެއިން 852 ގްރާމްގެ ހެރޮއިން ފެނިފައިވެ އެވެ. އަދި މުހައްމަދު ޔަސީންގެ ބޫޓު ތެރެއިން 738 ގްރާމް ހެރޮއިން އަދި މުނީރްގެ ބޫޓު ތެރެއިން 895 ގްރާމްގެ ހެރޮއިން، ފެނިފައިވެ އެވެ.
ރާއްޖެއަށް މަސްތުވާތަކެތި އެތެރެކުރި ކަމަށް ބުސްރާ ކޯޓުގައި އިއުތިރާފް ވެފައި ވިޔަސް އަދި މި މައްސަލާގައި ދައުވާއެއް ނުކުރެ އެވެ. އެހެންވެ އަނެއްކާވެސް ބަންދަށް ވަނީ 15 ދުވަސް އިތުރުކޮށްފަ އެވެ.
ފުލުހުން އިއްޔެ ކޯޓުގައި ބުނެފައިވަނީ ބުސްރާގެ ނަފްސާނީ ހާލަތު ހުރި ގޮތުން ޑޮކްޓަރަށް ދައްކައި ބޭސް ދީފައިވާ ކަމަށެވެ. އަނެއްކޮޅުން ދިފާއުން އެދުނީ ބަލި ހާލަތަށް ބަލައި ބުސްރާ މިނިވަންކޮށް ޑީޕޯޓްކޮށްދިނުމަށެވެ.
ފުލުހުން ބުނި ގޮތުގައި މި މައްސަލަ އަވަހަށް ނިންމަން ކުރި މަސައްކަތް ލަސްވެފައި ވަނީ ބަޔާން ނެގުމަށް ދިފާއީ ވަކީލަށް ހާޒިރު ނުވެވުމުންނެވެ. ކުރިން ވަކީލަކު ހަމަޖައްސައިދިނީ ދައުލަތުން ކަމަށް ވިޔަސް މިހާރު އައްޔަންކޮށްފައިވާ ވަކީލަކީ ބުސްރާގެ ފަރާތުން އަމިއްލައަށް ހަމަޖެއްސި ވަކީލެކެވެ.
ބަލި ހާލަތާ ބެހޭ ގޮތުން ވާހަކަ ދައްކަމުން ބުސްރާ ބުނެފައިވަނީ އޭނާގެ އާއިލާ އަކީ ވަރަށް ނިކަމެތި ބައެއް ކަމަށާއި އާއިލާ ގާތަށް އަވަހަށް ދާން ބޭނުންވާ ކަމަށެވެ. އެހެންވެ އަވަހަށް މައްސަލަ ނިންމައިދޭން އޭނާ އެދުނެވެ.
މި މައްސަލާގައި ހިމެނޭ ޕާކިސްތާނު މީހުން ގެނައި ޑްރަގްސްއާ ހަވާލުވެފައި ވަނީ ދިވެއްސެކެވެ. ފުލުހުން ހިންގަ ކޮންޓްރޯލްޑް ޑެލިވަރީ އޮޕަރޭޝަނުގައި ހައްޔަރުކުރީ ފުވައްމުލަކު މީހެއް ކަމަށްވާ އަބްދުﷲ އާމިރު، 31، އެވެ. ފުލުހުން ބުނެފައިވާ ގޮތުގައި އޭނާ ވަނީ ޑްރަގާ ހަވާލުވުމަށް ފަހު އެ ގެނައި މީހުންނަށް 3،000 ޑޮލަރު ވެސް ދީފަ އެވެ.