ޚަބަރު / މޫސުން

އީދު ބަންދުގައި ކަނޑު ގަދަވާނެ: މެޓް

މޫސުން ގޯސް ދުވަހެއްގައި ބަޔަކު އެއް ނަމްބަރު ޖެޓީ ކައިރީގައި މަޑުކޮށްލައިގެން-- ފޮޓޯ: އަހުމަދު އަވްޝަން/ މިހާރު

މާއިދާ މުހައްމަދު ރަޝާދު، މިހާރު

28 އެޕްރީލް 2022 - 11:42

2 comments

މި އީދު ބަންދުގައި މުޅި ރާއްޖެއަށް ވެސް މޫސުން ގޯސްވާނެ ކަމަށް މޫސުމާ ބެހޭ ގައުމީ އިދާރާ (މެޓް) އިން ލަފާކޮށްފި އެވެ.

ވައި ބާރުވެ ކަނޑުތައް ވެސް ގަދަވާނެ ކަމަށް ލަފާކޮށް މެޓުން މިހާރު ވެސް އޮތީ ލ. އަތޮޅުން ފެށިގެން އައްޑޫއަށް ވައިޓް އެލާޓް ނެރެފަ އެވެ. އެ ދެމެދުގެ އަތޮޅުތަކަށް ބޯކޮށް ވާރޭވެހި، ގުގުރައި އަދި ވިލާގަނޑުގައި ގަޑިއަކު 45 މޭލަށް ވައިގަދަވާނެ ކަމަށް ލަފާކުރެ އެވެ.

މެޓް އޮފީހުގެ އޮފިޝަލަކު، "މިހާރު" އަށް ވިދާޅުވީ އަންނަ ހޮނިހިރު ދުވަހުން ފެށިގެން ރާއްޖޭގެ ހުރިހާ ހިސާބަކަށް ވެސް ވައިގަދަވާނެ ކަމަށެވެ. އެހެންވެ ކަނޑުތައް ވެސް ގަދަވާނެ ކަމަށް ވިދާޅުވި އެވެ.

"އަންނަ މަހުގެ އެކަކުން ފެށިގެން މޫސުން ގޯސްވާނެ ކަމަށް ދައްކަނީ. ރާއްޖޭގެ ހުރިހާ ހިސާބަކަށް ވެސް ތަންކޮޅެއް ވިއްސާރަކޮށް އުޅެނީ. ވައި ވެސް ބާރުވާނެ. ކަނޑު ވެސް ގަދަވާނެ،" އޮފިޝަލް ވިދާޅުވި އެވެ.

އޭނާ ވިދާޅުވި ގޮތުގައި ހޮނިހިރު ދުވަހުން ފެށިގެން ހަތަރު ވަރަކަށް ދުވަސް ވަންދެން މުޅި ރާއްޖެއަށް ވެސް އޮންނާނީ އެކަހަލަ ގޮތަކަށެވެ.

ކޮވިޑްގެ ހުރިހާ ފިޔަވަޅެއް އުވާލި ފަހުން ލިބޭ ފުރަތަމަ އީދު ބަންދު ފެށުމާ ދިމާކޮށް އެތައް ބަޔަކު ވަނީ ދަތުރުތައް ރާވައިފަ އެވެ. ހަފްތާއެއްގެ ޗުއްޓީއަށް ދާ މީހުން ގިނަވެ މޯލްޑިވިއަންގެ ފްލައިޓްތައް ވެސް އޮތީ މުޅި ހަފްތާއަށް ފުލްކޮށެވެ. އަދި މާލެ ކައިިރި ރަށްތަކުގެ ގިނަ ގެސްޓްހައުސްތައް ވެސް އޮތީ ފުރިފަ އެވެ.

އީދު ޗުއްޓީއަށް ގިނަ ބަޔަކު ވަނީ މިއަދު ރަށްރަށަށް ފުރަން ފަށައިފަ އެވެ.