ހޯމަ ދުވަހުން ފެށިގެން ރާއްޖެއަށް ވިއްސާރަ ކުރާނެ ކަމަށް ލަފާކޮށްފި

އަންނަ ހޯމަ ދުވަހުން ފެށިގެން މުޅި ރާއްޖެއަށް ވިއްސާރަކުރާނެ ކަމަށް މެޓް އޮފީހުން މިއަދު ލަފާކޮށްފި އެވެ.

މޫސުމާ ބެހޭ އިދާރާ، މެޓް އޮފީހުގެ އޮފިޝަލަކު "މިހާރު"އަށް ވިދާޅުވީ ބުރާސްފަތި ދުވަހުން ފެށިގެން ދެކުނުގެ އަތޮޅުތަކަށް ވިއްސާރަ ކުރާނެ ކަމަށެވެ. އަދި އެހެން ހިސާބުތަކަށް ކެރީގެ އަސަރުކުރާނެ ކަމަށާއި އަދި އަންނަ ހޯމަ ދުވަހުން ފެށިގެން މުޅި ރާއްޖެއަށް ވިއްސާރަ ކުރާނެ ކަމަށް ލަފާކުރެވޭ ކަމަށް އޭނާ ވިދާޅުވި އެވެ.

"އެއީ ދެ މޫސުން ބެދޭ ދުވަސްވަރާ ދިމާކޮށް މި ކުރާ ވިއްސާރަ،" އޮފިޝަލް ވިދާޅުވި އެވެ.

މެޓް އޮފީހުން އިއްޔެ ވަނީ އުތުރުގެ އަތޮޅުތަކަށް ވިއްސާރަކުރާނެ ކަމަށް ލަފާކޮށް ވައިޓް އެލާޓް ނެރެފަ އެވެ. މި އަހަރުގެ ހުޅަނގު މޫސުން ނިމި، އިރުވައި މޫސުން ފެށެން އަންނަ މަހު ހަޅަ ޖަހާނެ އެވެ. މޫސުން ބަދަލުވާ އެ ދުވަސްވަރާ ދިމާކޮށް އަބަދުވެސް ރާއްޖެއަށް މޫސުން ގޯސްވެ އެވެ.

ރާއްޖެއާ ކައިރީގައި އޮންނަ ސްރީލަންކާ އާއި އިންޑިއާގެ ދެކުނުގެ ހިސާބުތަކަށް މި ދުވަސްވަރު ވަރަށް ވިއްސާރަ އެވެ. އަދި އިންޑިއާގެ މޫސުމާ ބެހޭ އިދާރާއިން ވަނީ އިންޑިއާގެ ދެކުނުގެ އެކި ސަރަހައްދުތަކަށް ބޯކޮށް ވިއްސާރަ ކުރާނެ ކަމަށް ލަފާކޮށް އަންނަ އާދިއްތަ ދުވަހާ ހަމައަށް އެލާޓެއް ވެސް ނެރެފަ އެވެ.

ދިވެހި ނަކަތް ކަލަންޑަރުގައިވާ ގޮތުން ހުޅަނގު މޫސުމުގެ އެންމެ ފަހު ނަކަތް ކަމަށްވާ ދޮށަ ނިމޭނީ އަންނަ މަހުގެ ނުވަ ވަނަ ދުވަހު އެވެ. މިހާރު މި ހިނގާ ނޮރަ ނަކަތުގައި އާންމުކޮށް މޫސުން ރަނގަޅު ވިޔަސް، ދޭތެރެ ދޭތެރެއިން ވިއްސާރަކޮށް، ކަނޑުތައް އާދައިގެ ވަރަކަށް މަޑުވިޔަސް ވިލާގަނޑުގައި ގަދަވާނެ އެވެ.

ރާއްޖޭގައި އޮންނަ ދެ މޫސުމުގެ ތެރެއިން އިރުވައި މޫސުން އާންމުކޮށް ދެމިގެން ދަނީ ޖެނުއަރީ މަހުން ފެށިގެން މާޗް މަހުގެ ނިޔަލަށެވެ. އަދި ހުޅަނގު މޫސުން ދެމިގެން ދަނީ މެއި މަހުން ފެށިގެން ނޮވެމްބަރު މަހުގެ ނިޔަލަށެވެ. އެޕްރީލް މަހާއި ޑިސެމްބަރު މަހަކީ މޫސުން ބަދަލުވާން ފަށާ ދުވަސްވަރެވެ.