ވިއްސާރަ ދުވަހެއްގައި މާލެ ކައިރީގައި ހެދިފައި ހުރި ވާރޭ ވިލާގަނޑެއް: މިހާރު ކުރާ ވިއްސާރައިގެ އަސަރު ހަފުތާއެއްހާ ދުވަހަށް ކުރާނެ ކަމަށް ލަފާކުރެވޭ.-- ފޮޓޯ: މިހާރު
24 ނޮވެމްބަރ 2025 - 10:46
މި އަހަރުގެ ހުޅަނގު މޫސުން ނިމެން ކައިރިވުމާ އެކު ރާއްޖެއަށް މިހާރު ކުރަމުންދާ ވިއްސާރައިގެ އަސަރު ހަފުތާއެއްހާ ދުވަހަށް ކުރާނެ ކަމަށް ލަފާކޮށްފި އެވެ.
މޫސުމާ ބެހޭ އިދާރާ، މެޓް އޮފީހުން މިއަދު ނެރުނު ނޫސްބަޔާނެއްގައި ބުނީ ހުޅަނގު މޫސުމުގެ ބާރުގަދަވުމާ އެކު، މިއަދުން ފެށިގެން ކުރިއަށް އޮތް ތިން ދުވަހު ރާއްޖޭގެ އެކި ހިސާބުތަކަށް ބޯކޮށް ވާރޭވެހި، ވައިގަދަވެ އަދި ކަނޑުތައް ވެސް ގަދަވާނެ ކަމަށް ލަފާކުރެވޭ ކަމަށެވެ.
އެހެންވެ، މޫސުމަށް ހާއްސަ ސަމާލުކަމެއް ދިނުމަށް މެޓް އޮފީހުން ވަނީ އިލްތިމާސްކޮށްފަ އެވެ.
މެޓް އޮފީހުން ވަނީ ބޯކޮށް ވާރޭ ވެހުމާ އެކު، ގުގުރާނެ ކަމަށް ލަފާކޮށް މިއަދު ހެނދުނު 10:00 އިން މެންދުރު ފަހު 2:00 އަށް ހއ. އަތޮޅުން ފެށިގެން އދ. އަތޮޅާ ހަމައަށް ޔެލޯ އެލާޓް ވެސް ނެރެފަ އެވެ.
Alert yellow for torrential rain and thunderstorms. pic.twitter.com/8EhWJf6iLM
— Maldives Meteorology (@MetMaldives) November 24, 2025
މޫސުމީ ލަފާކުރުންތައް މި ވަގުތު ދައްކާ ގޮތުގައި، ދެ މޫސުން ބެދޭ ދުވަސްވަރާ ދިމާކޮށް ރާއްޖެއަށް މިހާރު ކުރަމުންދާ ވިއްސާރައިގެ އަސަރު މިއަދުން ފެށިގެން ކުރިއަށް އޮތް ހަފުތާއެއްހާ ދުވަހަށް ކުރާނެ އެވެ.
ރާއްޖެއަށް މޫސުން ގޯސްވެފައިވާއިރު، ބަންގާޅު ކަނޑުގައި މިވަގުތު އުފެދިފައިވާ ދެ ކޮޅިގަނޑުގެ ނުސީދާ އަސަރު ވެސް ރާއްޖެއަށް ދަނީ ކުރަމުންނެވެ. އެ ދެ ކޮޅިގަނޑު ބައްދަލުވެ، މި އަންނަ ބުދަ ދުވަހު ތޫފާނަކަށް ބަދަލުވުން އެކަށީގެންވާ ކަމަށް އިންޑިއާގެ މޫސުމާ ބެހޭ އިދާރާއިން ވަނީ ލަފާކޮށްފަ އެވެ.
ދިވެހި ނަކަތް ކަލަންޑަރުގައިވާ ގޮތުން ހުޅަނގު މޫސުމުގެ އެންމެ ފަހު ނަކަތް ކަމަށްވާ ދޮށަ ނިމޭނީ އަންނަ މަހުގެ ނުވަ ވަނަ ދުވަހު އެވެ. މިހާރު މި ހިނގާ ނޮރަ ނަކަތުގައި އާންމުކޮށް މޫސުން ރަނގަޅު ވިޔަސް، ދޭތެރެ ދޭތެރެއިން ވިއްސާރަކޮށް، ކަނޑުތައް އާދައިގެ ވަރަކަށް މަޑުވިޔަސް ވިލާގަނޑުގައި ގަދަވާނެ އެވެ.
ރާއްޖޭގައި އޮންނަ ދެ މޫސުމުގެ ތެރެއިން އިރުވައި މޫސުން އާންމުކޮށް ދެމިގެން ދަނީ ޖެނުއަރީ މަހުން ފެށިގެން މާޗް މަހުގެ ނިޔަލަށެވެ. އަދި ހުޅަނގު މޫސުން ދެމިގެން ދަނީ މެއި މަހުން ފެށިގެން ނޮވެމްބަރު މަހުގެ ނިޔަލަށެވެ. އެޕްރީލް މަހާއި ޑިސެމްބަރު މަހަކީ މޫސުން ބަދަލުވާން ފަށާ ދުވަސްވަރެވެ.
Copyright © 2025 Mihaaru · Terms and Conditions · Privacy Policy · Code of Ethics · Editorial Policy
ކޮމެންޓްތައް
ބާލަމުރުގަން
24 November 2025
ބްރޯ ކޮބާތިބުނާ ވާރޭ މަމިހުރީ ގަދަ ހޫނުގައި މަޖީދީމަގުގައި
ޑޮލަރު ތިރިވެ ގޭންގުތައް ހުއްޓާލައިފި
24 November 2025
ވިއްސާރައެއް ނެތޭ ވެރިމީހާ އަރާ ބުނެލަނިކޮށް ތިކަން ހައްލުވީ!
ވެހޭވާރޭ
24 November 2025
މެޓުން އެބުނާބަސް އަޑުއަހައިގެން ސިޓީކައުންސިލުންވެސް ކާނުތައް ވަގުތުއޮއްވައި ސާފުނުކުރަނީ ކީއްވެ، ގައިމު ޑްރެއިނޭޖު ސިސްޓަމަށް ލޯޑުކުޑަވެ ފަސޭހައިން ފެންހިދޭނެދޯ.
އަމީތާބު
24 November 2025
އާނ އަހަރެން ތައްޔާރު ސަރުކާރުގެ ކަމާ ބޭހޭ އިދާރާތައް ތައްޔާރުތަ؟ މިބުނީ މަގުތަކުގައި ފެންބޮޑުވީމާ ފެންހިއްކަން ފަންސުރުޖަހާ ދައްޗެއްވަރު ފެން ޕަންޕެއް ހިފައިގެން ނިކުންނާނީނުން
ބުޖަޑާ
24 November 2025
ޝުރުރިއްޔާ ތިއިރުޝަދުގެ މަތިން އަމަލުކުރެވޭތޯ ބަލާނަން. މިހާރު ސައިކަލު މަޑިދަށުގައި އޮތް ދަބަރުޖަހާފައިވާ ބާކުޑާ އުކާލާ އާއެއްޗެއް ގަނެ، ފުރާޅުން ލީކުވާ ލޯވަޅު ބައްދާ، ލީކުވާ ފާރުގައި ޕުޓީކޮޅެއް ހާކާލަ. އެކަމަކު ގެ ކުރިމަތީ އޮންނަ މަގަށް ކުޅެޖެހިޔަސް ފެންބޮޑުވާ މަގުގެ މައްސަލަ ހައްލުކޮށްދެނީ ކާކު!