ޗައިނާ އިން ބޭނުންވަނީ ރާއްޖެއިން ޑިމޮކްރަސީ ފޮހެލައި ދަރަނިވެރި ކޮށްލަން ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ނަޝީދު ޗައިނާ އަށް ފާޑު ވިދާޅުވީ، އެ މަނިކުފާނު މިވަގުތު އިންޑިއާ އަށް ކުރައްވާ ރަސްމީ ދަތުރުފުޅުގެ ތެރެއިން އިންޑިއާގެ ކުރީގެ ފޮރިން ސެކްރެޓަރީ ޝިއަމް ސަރަން މޮޑަރޭޓްކުރެއްވި ލެކްޗާއެއްގަ އެވެ.
ނަޝީދު ވިދާޅުވީ ރާއްޖޭގައި އަބަދުވެސް އޮންނާނީ "އިންޑިއާ ފަސްޓް" ސިޔާސަތެއް ކަމަށާއި ޗައިނާއިން ގެންގުޅޭ "ބިން ފޭރުމާއި ދަރަނި މަޅީގައި" ރާޢްޖެއިން ނުޖެހޭނެ ކަމަށެވެ.
"ރާއްޖެއިން ބޭނުންވަނީ އިންޑިއާއާ އެކު ގާތް ގުޅުމެއް. އަޅުގަނޑަށް ހަމަ ވަރަށް ބޮޑަށް ޔަގީން. އަޅުގަނޑު މިހެން ނުދަންނަވާނަން އަޅުގަނޑަކީ ސިޔާސީ މީހަކަށްވާތީ، އަޅުގަނޑަށް އިތުރަށް ވޯޓު ނުލިބޭނެ ވާހަކައެއް ނުދަންނަވާނަން،" ނަޝީދު ވިދާޅުވި އެވެ.
އިދިކޮޅު ފަރާތްތަކުން ކުރިޔަށް ގެންދާ "އިންޑިއާ އައުޓް" ކެމްޕެއިން ހިންގުމުގައި އިސްކޮށް ހަރަކާތްތެރިވާ ކުރީގެ ރައީސް އަބްދުﷲ ޔާމީން ޗައިނާގެ ސަރުކާރު ކުންފުނިތަކަށް ބޮޑެތި ބާރުތަކެއް ދީފައިވާ ކަމަށާއި އެ މަޝްރޫއުތަކުގެ ސަބަބުން ގައުމު ވަރަށް ބޮޑަށް ދަރާފައިވާ ކަމަށް ނަޝީދު ވިދާޅުވި އެވެ.
"ޗައިނާއިން ބޭނުންވީ ރާއްޖޭގައި ހުދުމުހުތާރު ވެރިކަމެއް އުފައްދައި، ޑިމޮކްރަސީ އުވާލަން، ދެން އެ މީހުން ބޭނުންވާ ގޮތަށް ކަންކަން ކުރަން. ރާއްޖޭގެ މިހާރުގެ ދަރަނީގެ 70 ޕަސެންޓަށް ވުރެ ބޮޑު ބައެއް އޮތީ ޗައިނާގައި. މިކަމުގެ ސަބަބުން ރާއްޖޭގެ މައްޗަށް ޗައިނާއަށް ކުރިން ލިބިފައި ނުވާ ފަދަ އިގްތިސާދީ އަދި ސިޔާސީ ބާރުވެރިކަން ލިބިގެންދާނެ،" ނަޝީދު ވިދާޅުވި އެވެ.
ނަޝީދަކީ އަބަދުވެސް ޗައިނާ އަށް ވަރަށް ބޮޑަށް ފާޑުވިދާޅުވަމުން ގެންދާ ބޭފުޅެކެވެ. އެމަނިކުފާނު ވަނީ ރާއްޖެއަށް ޗައިނާއިން ނަގާފައިވާ ލޯނުތައް ރީސްޓްރަކްޗާ ކުރުމަށް ވެސް ގޮވާލައްވައިފަ އެވެ. އަދި ޗައިނާގެ "ދަރަނި މަޅި" އާ ވީހާވެސް ދުރުން ރާއްޖެ އުޅެން ޖެހޭ ކަމަށް ތަކުރާރުކޮށް ވަނީ ވިދާޅުވެފަ އެވެ.