ރައްޔިތުންގެ މަޖިލީހުން މިދިޔަ ހަފުތާގައި ފާސްކުރި ހެއްކާބެހޭ ބިލު ރައީސް އިބްރާހިމް މުހައްމަދު ސޯލިހު ތަސްދީގުކުރައްވައިފި ނަމަ، އެ ބިލުގައިވާ މަސްދަރު ހާމަކުރަން މަޖުބޫރުވާ މާއްދާ ބާތިލްކުރަން ދުސްތޫރީ މައްސަލައެއްގެ ގޮތުގައި ސުޕްރީމް ކޯޓަށް ހުށަހަޅަން މޯލްޑިވްސް މީޑިއާ ކައުންސިލް (އެމްއެމްސީ)ން މިއަދު ނިންމައިފި އެވެ.
އެމްއެމްސީން މިއަދު ބޭއްވި ޖަލްސާއެއްގައި މުހިންމު ދެ ނިންމުމެއް ނިންމާފައިވެ އެވެ. އެއީ؛
- މަޖިލީހަށް ސަރުކާރުން ހުށަހަޅާފައިވާ ރާއްޖޭގެ ގާނޫނުލްއުގޫބާތަށް އިސްލާހު ގެނައުމުގެ ބިލުގެ މާއްދާއެއް މިހާރު އޮތްގޮތުން ކައުންސިލްގެ ކަންބޮޑުވުންތަކެއް އޮތުމުން އެ މާއްދާ އިތުރަށް ދިރާސާކޮށް ގޮތްތަކެއް ހުށަހެޅުމަށް އެ ކައުންސިލްގެ އެތިކްސް އެންޑް ލީގަލް ކޮމިޓީ އަށް ފޮނުވުން.
- ހެއްކާބެހޭ ގާނޫނު ރައީސް ތަސްދީގުކުރައްވައިފި ނަމަ، އެ ބިލުގައި ނޫސްވެރިންނަށް މަސްދަރު ހާމަކުރަން މަޖުބޫރުވާ މާއްދާ ބާތިލްކުރަން ދުސްތޫރީ މައްސަލައެއްގެ ގޮތުގައި ސުޕްރީމް ކޯޓަށް ހުށަހެޅުން.
ނޫސްވެރިންގެ މަސްދަރު ހާމަކުރުން މަޖުބޫރުކުރެވޭ ގޮތަށް ރައްޔިތުންގެ މަޖިލީހުން ހެއްކާބެހޭ ބިލު ފާސްކުރީ، މިހާރު އޮތް ގޮތަށް ފާސްނުކުރަން ރާއްޖޭގެ މީޑިއާތަކާއި އެމްއެމްސީ އާއި ނޫސްވެރިންގެ ޖަމިއްޔާ މޯލްޑިވްސް ޖާނަލިސްޓް އެސޯސިއޭޝަނުން މަޖިލީހުގައި އެދިފައި ވަނިކޮށެވެ.
އެ މައްސަލައިގައި ނޫސްވެރިން މަޖިލިސް ދޮށަށް އެއްވެ، އަޑު ވެސް އުފުލި އެވެ. އެކަމަކު އެ ދުވަހު މަޖިލީހުގެ ރައީސް މުހައްމަދު ނަޝީދު ވިދާޅީ އެ ބިލަށް ވޯޓު އެހުން ނޫން ގޮތެއް މިވަގުތު ނެތް ކަމަށެވެ.
މިދިޔަ ބުރާސްފަތި ދުވަހު މަޖިލީހުން ފާސްކުރި ހެއްކާބެހޭ ބިލުގައިވާ ގޮތުން ގައުމީ ސަލާމަތާއި ޓެރަރިޒަމްގެ ކުށްތަކުގައި ނޫސްވެރިޔާގެ މަސްދަރު ހާމަކުރަން ކޯޓަށް އެންގިދާނެ އެވެ. އެކަމަކު މަސްދަރު ހާމަ ނުކުރުމުގެ ހައްގު ގާނޫނު އަސާސީން ނޫސްވެރިންނަށް ލިބިދެ އެވެ.
އެ ބިލާ މެދު ކަންބޮޑުވުން ފާޅުކޮށް، އެމްއެމްސީން ރައީސް މިދިޔަ ބުރާސްފަތި ދުވަހު ރައީސް އަށް ސިޓީ ވެސް ފޮނުވި އެވެ. އެ ސިޓީގައި އެދިފައި ވަނީ އެ ބިލަކީ ނޫސްވެރިކަމުގެ މިނިވަންކަމުގެ ހައްގު ހަނިވެގެންދާ ގޮތަށް އޮތް ބިލަކަށް ވާތީ އެ ބިލް ތަސްދީގު ނުކުރައްވައި، މަޖިލީހަށް އަނބުރާ ފޮނުވާލެއްވުމަށެވެ.
މަޖިލީހުން ފާސްކުރާ ބިލްތައް ތަސްދީގު ނުކުރައްވައި، އަނބުރާ ފޮނުވާލެއްވުމުގެ އިހްތިޔާރު ރައީސަށް އޮވެ އެވެ.