މޯލްޑިވިއަން އޭވިއޭޝަން އެކަޑަމީ ހިންގަން ހުއްދަ ދީފި

ޕައިލެޓުން ތަމްރީނުކުރަން އައިލެންޑް އޭވިއޭޝަނާއި ދިވެހިރާއްޖޭގެ ގައުމީ ޔުނިވާސިޓީ ގުޅިގެން ހަދާފައިވާ މޯލްޑިވިއަންގެ އޭވިއޭޝަން އެކަޑަމީ ހުޅުވުމުގެ ހުއްދަ ސިވިލް އޭވިއޭޝަން އޮތޯރިޓީން ދީފި އެވެ.

އޭވިއޭޝަން އެކަޑަމީން ނެރުނު ބަޔާނެއްގައި ބުނީ ފްލައިން އެކަޑަމީ ހިންގުމަށް ބޭނުންވާ ހުރިހާ މަސައްކަތްތަކެއް ފުރިހަމަކޮށް މޯލްޑިވް ސިވިލް އޭވިއޭޝަނުން ހަދަންޖެހޭ އިންސްޕެކްޝަންތައް ނިމި ސްކޫލު ހިންގުމުގެ ހުއްދަ ވެސް ލިބިފައިވާ ކަމަށެވެ.

އަންނަ ހޮނިހިރު ދުވަހު ދަރިވަރުންގެ ކިޔެވުން ފެށޭނެ ކަމަށް ބަޔާނުގައި ބުންޏެވެ.

އޭވިއޭޝަން އެކަޑަމީން ބުނީ ޕައިލެޓް ޓްރެއިނިން ހަދަމުންދިޔަ ދަރިވަރުންގެ ތެރެއިން ފުރަތަމަ ބެޗުގައި ހިމެނޭ، ރިފްރެޝާ ޕްރޮގްރާމު ނިންމާފައިވާ 35 ދަރިވަރުންގެ ފްލައިން ފަށާނެ އެވެ. އަދި ދެވަނަ ބެޗުގައި 39 ދަރިވަރުންގެ ރިފްރެޝާ ޕްރޮގްރާމު މިހާރު އެބަ ކުރިއަށްދާ ކަމަށާއި ފުރަތަމަ ބެޗްގެ ދަރިވަރުންގެ ފްލައިން ނިމެމުންދާ ވަރަކަށް ދެވަނަ ބެޗްގެ ފްލައިން ފެށޭނެ ކަމަށް އެ އެކަޑަމީން ބުންޏެވެ.

"އުއްމީދުކުރެވޭ ގޮތުގައި މި އަހަރު ނިމުމުގެ ކުރިން ފުރަތަމަ ބެޗާއި ދެވަނަ ބެޗުގެ ފްލައިން ނިމޭނެ،" މޯލްޑިވިއަން ފްލައިން އެކަޑަމީގެ ބަޔާނުގައިވެ އެވެ.

އެ އެކަޑަމީއަކީ ޗެކް ރިޕަބްލިކްގެ ފްލައިން އެކަޑަމީއާ ގުޅިގެން ހިންގާ ފްލައިން ސްކޫލަކަށްވާތީ އެތަން ހިންގާނީ ސިވިލް އޭވިއޭޝަންގެ ގަވާއިދުތަކުގެ އިތުރުން ޔޫރަޕިއަން އޭވިއޭޝަން ސޭފްޓީ އެޖެންސީގެ ސްޓޭންޑާޑްތަކާ އެއްގޮތަށެވެ.

އޭވިއޭޝަން އެކަޑަމީން އެންމެ ބޮޑު އިސްކަމެއް ދޭނީ އައްޑޫގައި ހިންގި އޭޝިއަން އެކަޑެމީ އޮފް އެއޮރޮނޯޓިކްސް (އޭއޭއޭ) ގެ ދަރިވަރުންނަށެވެ. އެ އަށް ފަހު، ކިޔެވުން ނިމޭ ވަރަކުން އެހެން ދަރިވަރުންނަށް ޖާގަ ދޭނެ އެވެ. ފުރަތަމަ އަހަރު މަދުވެގެން 80 ދަރިވަރުންނަށް އެ ސްކޫލުގައި ކިޔެވޭނެ އިންތިޒާމު ހަމަޖައްސަން ނިންމާފައިވެ އެވެ.

އައިލެންޑް އޭވިއޭޝަނާއި އެމްއެންޔޫ ގުޅިގެން އޭވިއޭޝަން އެކަޑަމީއެއް ހިންގަން ޖެހުނީ އައްޑޫ ފްލައިން ސްކޫލުގެ މައްސަލަ ބޮއްސުންލުމުންނެވެ. އެތަނުގެ މައްސަލަތަކާ ހުރެ ދަރިވަރުންނަށް މުއްދަތަށް ކޯސް ފުރިހަމަނުވެ، ކިޔަވަން ނެގި ލޯނު ހުސްވެ އަލުން ލޯނު ނަގަން ޖެހި އެތައް މައްސަލަތަކެއް ފެންމަތިވި އެވެ.

އެންމެ ފަހުން އެތަނުގެ ހުއްދަ ބާތިލުކޮށް ސަރުކާރުން ވަނީ އެ ދަރިވަރުންނަށް ލޯނު ހަމަޖައްސައިދޭން ނިންމައިފަ އެވެ. އޭއޭއޭގައި ކިޔެވުން ފުރިހަމަ ނުކުރެވި ތިބި 85 ދަރިވަރަކު ސިވިލް އޭވިއޭޝަން އޮތޯރިޓީގައި ރަޖިސްޓަރީ ވެފައިވާ އިރު އެކި ދަރިވަރުން ތިބީ ކޯހުގެ އެކި ލެވެލްގަ އެވެ.