އެމްޕީއެލް ސަރަހައްދުގައި ހުރި ކެމިކަލް ކޮންޓޭނަރަކުން މިއަދު ކެމިކަލް ލީކުވެއްޖެ އެވެ.
އެމްއެންޑީއެފުން ބުނީ އެ ހާދިސާ ރިޕޯޓްކުރީ މިއަދު ހެނދުނު 11 ޖަހާކަން ހާއިރު ކަމަށެވެ. އަދި އެ ހާދިސާ ރިޕޯޓްކުރުމާ އެކު ސިފައިންގެ ފަޔަ އެންޑް ރެސްކިޔު ސާވިސް އިން އެ ސަރަހައްދަށް ގޮސް، ކެމިކަލް ލީކުވަމުންދާ ކޮންޓޭނަރު ސާފުކުރުމުގެ މަސައްކަތް ފެށި ކަމަށް ބުންޏެވެ.
އެ ހާދިސާގައި އެއްވެސް މީހަކަށް އަނިޔާއެއް ނުވެ އެވެ.
އެމްއެންޑީއެފުން ބުނީ 48 ފޫޓުގެ އެ ކޮންޓޭނަރުން ކެމިކަލް ލީކުވާ ކަން ފާހަގަވީ ކޮންޓޭނަރުން ދުން އަރަން ފެށުމުން، އެ ސަރަހައްދު ބެލިބެލުމުން ކަމަށެވެ. އަދި އެ ކޮންޓޭނަރުން ލީކުވަމުން ދަނީ ހައިޑްރޮޒެން ޕެރޮސައިޑް އަޅާފައި ހުރި ކެމިކަލް ހަންތަކަކުން ކަމަށް ވެސް ބުންޏެވެ.