ސްރީ ލަންކާގެ ރައީސް ގޮޓާބަޔަ ރާޖަޕަކްސަ ސިއްރުން ރޭ ރާއްޖެ ވަޑައިގެން، ދިވެހި ސަރުކާރުގެ ހިމާޔަތް ހޯދާފައިވާތީ، ރާއްޖޭގައި ދިރިއުޅޭ ލަންކާގެ މީހުން ދިވެހި ސަރުކާރާ ދެކޮޅަށް މާލޭގައި ކުރަން އުޅުނު މުޒާހަރާ ދިވެހި ފުލުހުން ނުކުމެ ދެންމެ ހުއްޓުވައިފި އެވެ.
އަލިމަސް ކާނިވާ ސަރަހައްދު ކައިރިން ޕެޓްރޯލް ޝެޑް ކުރިމައްޗަށް ކަހަލަ ގޮތަކަށް 100 އެއްހާ މީހުން އެއްވެ މުޒާހަރާ ފެށިތަނާ ފުލުހުން ނުކުމެ އެ މީހުން އަނބުރާ ފޮނުވައިލި އެވެ.
އެ މީހުން ފޮނުވައިލީ، ހިފައިގެން ތިބި ލަންކާގެ ދިދަތަކާއި ބެނާތައް އަތުލުމަށް ފަހު ކަމަށް އެ ސަރަހައްދުގައި ހުރި "މިހާރު" ގެ ރިޕޯޓަރު ބުންޏެވެ.
"ވަރަށް ސުލްހަވެރިކޮށް އެ މީހުން ތިބީ. ފުލުހުން ބުނާއިރަށް މުޒާހަރާ ހުއްޓާލާފައި އެ މީހުން ހިނގައްޖެ،" ރިޕޯޓަރު ބުންޏެވެ.
ދިވެހި ސަރުކާރު ދެކެ ހިތްހަމަނުޖެހިގެން ލަންކާގެ މީހުން ފެށި މުޒާހަރާގެ ތެރެއަށް ބައެއް ދިވެހިން ވަންނަން އުޅުނު ކަމަށް ވެ އެވެ. އެކަމަކު، އެ ފުރުސަތު ނުދީ ފުލުހުން މުޒާހަރާ ހުއްޓުވީ އެވެ.
ލަންކާގެ ރައީސް ރޭ ދަންވަރު އެ ގައުމުގެ އަސްކަރީ ބޯޓެއްގައި ރާއްޖެ ވަޑައިގެން މިހާރު ހުންނެވީ ވޮލްޑޯފް އެސްޓޯރިއާ ރިސޯޓުގައި ކަމަށް އެނގިފައި ވެ އެވެ.
މިއަދުގެ ވަގުތެއްގައި އޭނާ މަގާމުން އިސްތިއުފާ ދެއްވާނެ ކަމަށް ކުރިން އިއުލާން ކުރެއްވިޔަސް އަދި އެ ކަމެއް ނުކުރައްވަ އެވެ. އަދި ގޮޓާބަޔަ ރާއްޖެ ވަޑައިގަތީ ޓްރާންސިޓް ވުމަށް ކަމަށް ބައިނަލްއަގްވާމީ މީޑިއާތަކުން ބުނެ އެވެ. އެހެންވެ، ބެލެވޭ ގޮތުގައި މިއަދުގެ ވަގުތެއްގައި އޭނާ ރާއްޖެ އިން ފުރާވަޑައިގަންނަވާނެ އެވެ.