މާލޭ ސަރަހައްދުން ގޯތި ދޫކުރާ އުސޫލުގައި މާލޭގެ ރަށްވެހިންގެ ގޮތުގައި ބަޔާންކޮށްފައިވާ މާއްދާ އުވާލުމަށް އެދި ހައި ކޯޓަށް ހުށަހެޅި މައްސަލަ ބަލައިގެންފި އެވެ.
ދުސްތޫރީ މައްސަލައެއްގެ ގޮތުގައި ގާނޫނީ ދެ ވަކީލުން ކަމަށްވާ ޝިހާދު އިބްރާހިމް އަދި ހަސަން ފަލާހު ހުށަހެޅި މައްސަލަ ބަލައިގަނެ، މިދިޔަ ބުރާސްފަތި ދުވަހު ވަނީ ރަޖިސްޓްރީކޮށްފަ އެވެ.
ދިވެހި ދައުލަތާއި އެޗްޑީސީއާ ދެކޮޅަށް އެ މައްސަލަ އެންމެ ފުރަތަމަ ހުށަހެޅީ ސުޕްރީމް ކޯޓަށެވެ. އެއީ މިދިޔަ މަހުގެ 24 ވަނަ ދުވަހެވެ. އެކަމަކު، އެ ކޯޓުން ދުސްތޫރީ މައްސަލަ ބަލައިނުގަތެވެ.
ހައި ކޯޓަށް ހުށަހެޅީ އޭގެ ފަހުން، މިދިޔަ މަހުގެ 31 ގަ އެވެ.
އެ ކަމާ ގުޅޭގޮތުން ޝިހާދު "މިހާރު" އަށް ވިދާޅުވީ އެ މައްސަލަ ކޯޓަށް ހުށަހެޅީ މާލޭ މީހުންނަށް ގޯތި ދޭތީ ކަންބޮޑުވެގެން ނޫން ކަމަށެވެ. ޖާގަ އޮތް ވަރަކުން ހިލޭ ގޯތި ވެސް ދޭންވީ ކަމަށާއި އެކަމަކު، އެކަން ކުރަންޖެހޭނީ ގާނޫނު ހުއްދަކުރާ ގޮތަށް ކަމަށް އޭނާ ވިދާޅުވި އެވެ.
އެހެންވެ ހުށަހެޅި މައްސަލައިގައި އެ ވަކީލުން ވަނީ، ގޯތި ދިނުމަށް މާލޭ ރައްވެއްސެއް ކަމަށް ބަލާ މިންގަނޑު އިސްލާހުކުރަން ނުވަތަ އެ މާއްދާ ބާތިލްކުރަން އެދިފަ އެވެ.
ބިންވެރިޔާ ސްކީމްގެ ދަށުން މާލޭ މީހުންނަށް ހުޅުމާލެ އާއި ގުޅީފަޅުން ދޫކުރާ 3،000 ގޯއްޗަށް އެދުމުގެ ޝަރުތަކަށް އެންމެ ފުރަތަމަ ކަނޑައެޅީ މާލޭ މީހުން ކަމުގައި ބަލަނީ އެއްވެސް އިރެއްގައި މާލެ ފިޔަވައި އެހެން ތަނެއްގައި ރަޖިސްޓްރީވެފައި ނުވާ މީހުން ކަމަށެވެ.
އެކަމަކު، މި މަހުގެ 15 ވަނަ ދުވަހު ޕްލޭނިން މިނިސްޓްރީން އެ އުސޫލަށް ގެނައި ބަދަލުގައި ބުނީ ސަރުކާރުން ކަނޑައެޅި އުސޫލެއް ނުވަތަ ގަވާއިދެއްގެ ސަބަބުން ކުރިން އެހެން ތަނެއްގައި ރަޖިސްޓްރީވެފައި އޮތަސް، އެ މީހެއްގެ މަންމަ ނުވަތަ ބައްޕައަކީ މާލޭ މީހެއް ކަމަށްވާ ނަމަ އަދި އެއީ މިހާރު މާލޭގައި ރަޖިސްޓްރީވެފައިވާނަމަ އެއީ މާލޭ މީހެއް ކަމަށް ބެލެވޭނެ ކަމަށެވެ.
ޝިހާދު ވިދާޅުވީ ފަހުން ގެނައި އިސްލާހުން ވެސް މާމަ ނުވަތަ ކާފަ މާލޭ ރައްވެއްސަކަށް ވެއްޖެނަމަ އަމަލުކުރާނެ ގޮތެއް ނެތް ކަމަށެވެ.
"ގޯތި ދިނުމުގެ މުޅި ޕްރޮސެސް ހުއްޓުވާކަށް ނޫން މި އުޅެނީ،" ޝިހާދު ވިދާޅުވި އެވެ.
