ދޮޅު ގަޑިއިރުގެ ތެރޭގައި ނަޝީދު 12 ފަހަރަށް ވާހަކަ ދެއްކެވި، މެންބަރުންގެ އެތައް ޝަކުވާއެއް!

ރައްޔިތުންގެ މަޖިލީހުގެ ރައީސް މުހައްމަދު ނަޝީދު މަޖިލީހުގެ ރިޔާސަތުގައި އިންނަވައި، ބަހުސަށް ވަދެވަޑައިގެން ވާހަކަ ދައްކަވާ މައްސަލައިގައި އެމްޑީޕީގެ ބައެއް މެމްބަރުން ހިތްހަމަނުޖެހި އެމަނިކުފާނަށް ވަރަށް ބޮޑަށް ފާޑު ވިދާޅުވެއްޖެ އެވެ.

މަޖިލީހުގެ ގަވައިދު ބުނާ ގޮތުން ތަޅުމުގައި ހިނގާ ބަހުސްގައި ރިޔާސަތަކަށް ބައިވެރިއެއް ނުވެވޭނެ އެވެ. އަދި ހުށަހެޅިފައިވާ މައްސަލާގައި ވަކި ފަރާތަކަށް ވެސް ރިޔާސަތަކަށް ބުރައެއް ވެސް ނުވެވޭނެ އެވެ.

އެހެން ނަަމަވެސް މަޖިލީހުގައި ކުރިޔަށް ދާ ބިލުތަކާއި މައްސަލަތަކާ ގުޅޭ ގޮތުން އެމަނިކުފާނު އާދަވެގެން ވާހަކަ ދައްކަވައި ތަފާތު އެކި މައުލޫމާތުތައް ދެއްވަ އެވެ. އަދި ބައެއް ފަހަރު މެންބަރުން ދައްކަވާ ވާހަކަތައް ހުއްޓުވައި އެކަމުގައި އެމަނިކުފާނުގެ އަމިއްލަ ހިޔާލުފުޅު ވެސް ފާޅުކުރައްވަ އެވެ.

މަޖިލީހުގައި މިއަދު ކުރިޔަށް ދިޔަ ރާއްޖެ-މޮރިޝަސް އިމުގެ މައްސަލައިގެ ބަހުސްގައި ވެސް ނަޝީދު ތަފާތު އެކިފަހަރުގެ މަތިން ބަހުސްގެ ތެރެއިންނާއި ބައެއް މެމްބަރުންގެ ވާހަކަތަކުގެ މެދު ތެރެއިން ވެސް މައިކު ކަނޑާލައްވައި އަމިއްލަ ހިޔާލާއި އެހެން މައުލޫމާތުތައް ދިޔައީ ވިދާޅުވަމުންނެވެ.

އެ މައްސަލައިގެ ބަހުސް 9:45 ގައި ފެށިއިރު ދޮޅު ގަޑިއިރު ތެރޭގައި އެމަނިކުފާނު 12 ފަހަރަށް ބަހުސްގެ ތެރެއަށް ވަދެވަޑައިގެން އެކިއެކި ހިޔާލު ފާޅުކުރި އެވެ.

ބަހުސް ކުރަން ފުރުސަތު ލިބިވަޑައިގަތުމުން، އެ މައްސަލަ ފާހަގަ ކުރައްވައި މާފަންނު ހުޅަނގު ދާއިރާގެ މެންބަރު މުހައްމަދު ފަލާހު ވިދާޅުވީ މަޖިލިސް ފެށިގެން ގަޑިން 11:15 ވީއިރު ތަޅުމުގައި މެންބަރުންނަށް ވުރެ ގިނައިން ރިޔާސަތުން ވާހަކަ ދައްކާފައިވާ ކަމަށެވެ. ގަވައިދުގައި އެ ފުރުސަތެއް ނޯންނަ ކަމަށާއި މެންބަރުން ދައްކާ ވާހަކަތަކާ ބެހޭ ގޮތުން ވަކި ކޮޅަކަށް ޖެހިގެން ވެސް ވާހަކަ ނުދެއްކެވޭނެ ކަމަށް ފަލާހު ވިދާޅުވި އެވެ.

"އަޅުގަނޑުމެންނަށް މި ފެންނަނީ މި ބަހުސްގައި އިއްޒަތްތެރި ރައީސް ރިޔާސަތުގައި ވަކި ގޮތެއް ކަނޑައާޅުއްވައިގެން އިންނަވާ ތަން،" ފަލާހު ވިދާޅުވި އެވެ.

ފަލާހު ވާހަކަ ދައްކަވަން ހުއްޓާ މައިކުގެ އަޑު ކަނޑާލުމަށް ފަހު ނަޝީދު ވިދާާޅުވީ އެމަނިކުފާނަކީ ވެސް ދިވެހި ރައްޔިތެއް ކަމަށާއި މައްސަލަ އާ ގުޅޭ ގޮތުން އެމަނިކުފާނަށް އެނގިވަޑައިގަންނަވާ މައުލޫމާތު މެންބަރުންނަށް ނާރުވާ އިންނެވުމަކީ ބުއްދިވެރި ކަމެއް ނޫން ކަމަށެވެ.

އެ ވާހަކަ އަށް ރައްދު ދެއްވަމުން އިސްދޫ ދާއިރާގެ ޖޭޕީ މެންބަރު އަލީ ހަމީދު ވިދާޅުވީ މެންބަރުންގެ ވާހަކަތައް ނަޝީދު ތަރުޖަމާ ކޮށްދެއްވުމަކީ ރަނގަޅު ކަމެއް ނޫން ކަމަށެވެ. ކުރީގެ ރައީސެއްގެ ހައިސިއްޔަތުން ޗާގޯސް މައްސަލާގައި މައުލޫމާތު އެނގިވަޑައިގަންނަވާނެ ކަމަށް ގަބޫލު ކުރައްވާ ކަމަށާއި ނަމަވެސް އެ ވާހަކަތައް ދައްކަވަން ބޭނުން ނަމަ އިންތިހާބުވެވަޑައިގަތް ދާއިރާގެ ގޮނޑީގައި އިށީނދެވަޑައިގެން އެ ވާހަކަތައް ކުރިޔަށް ގެންދެވުމަށް އޭނާ އެދިވަޑައިގަތެވެ.

ކެލާ ދާއިރާގެ މެންބަރު އިބްރާހިމް ޝަރީފް ވެސް ވަނީ އޭނާ ވާހަކައިގެ ތެރެއިން މަލިކުގެ ނަން އައި ހިސާބުން ނަޝީދު ވާހަކަ މެދު ކަނޑާލައި އަލުން ފުރުސަތު ނުދިން މައްސަލާގައި ޝަކުވާ ކުރައްވައިފަ އެވެ. ނަމަވެސް އެ ވާހަކަ އިތުރަށް ކުރިޔަށް ގެންދަވާކަށް ނަޝީދު ފުރުސަތެއް ނުދެއްވި އެވެ.

އެ މައްސަލާގައި ދުވާފަރު ދާއިރާގެ މެންބަރު އިސްމާއިލް އަހުމަދު ވިދާޅުވީ މަޖިލިސް ހިނގަމުންދާ ގޮތާ މެދު ވަރަށް ބޮޑަށް ހިތާމަ ކުރައްވާ ކަމަށެވެ. ކެލާ ދާއިރާގެ މެންބަރު ވާހަކަ ދެއްކުމުގެ ވަގުތު ހަމަ ނުވަނީސް ފުރުސަތު ގެއްލުވާލި ކަމަށާއި ނަމަވެސް ރިޔާސަތުން ބޭނުންވާ މެންބަރުންނަށް ބަރާބަރަށް އެ ފުރުސަތު ދެއްވާ ކަމަށް އިސްމާއިލް ވިދާޅުވި އެވެ.

ނަޝީދު ސަރުކާރަށް ޖެއްސުން ކުރާ ކަމަށް ތުހުމަތު ކުރައްވާ އިސްމާއިލް ވަނީ އެމަނިކުފާނަށް ވަރަށް ބޮޑަށް ފާޑު ވިދާޅުވެފަ އެވެ.

"މި ރާއްޖެ އަށް މި އުޅެނީ ޗާގޯސް މައްސަލަ ދިމާވެގެން ނޫން. އިމެއްގެ މައްސަލައެއް ވެސް ނޫން. މި ރާއްޖެ އަށް ދިމާވެގެން މި އުޅެނީ މަނިކުފާނަށް ވެރިކަން ނުލިބިގެން އުޅޭ މައްސަލަ،" އޭނާ ވިދާޅުވި އެވެ.

މި ފަހަކަށް އައިސް މަޖިލީހުގެ ޖަލްސާތަކުގައި އެމްޑީޕީ މެންބަރުންގެ ތެރޭގައި ހިނގާ ބަހުސާއި އަރައިރުން ވަރަށް ގިނަ އެވެ. އެ މައްސަލަތައް ހައްލު ކޮށް ގަވައިދާ އެއްގޮތަށް މަޖިލިސް ހިންގަން މެންބަރުން ތަކުރާރުކޮށް ވަނީ ނަޝީދު ކައިރިން އެދިވަޑައިގެންފަ އެވެ.