މީގެ ކުރިން 58 ފަހަރު ހައްޔަރުކޮށްފައިވާ މީހަކު އެހެން ބަޔަކާ އެކު އޮފީހެއްގެ ތެރެއަށް ވަދެ ތިޖޫރި ފަޅާލަން އުޅެނިކޮށް ހައްޔަރުކޮށްފި އެވެ.
އައްޑޫ، ފޭދޫ މީހެއް ކަމަށްވާ މުހައްމަދު އިލްހާމް، 40، މިދިޔަ ހަފްތާގައި ހައްޔަރުކުރީ ކޯސްޓްލައިންގެ އޮފީހަށް ވަދެ ހުއްޓަ އެވެ.
ކޯޓުން ފުރަތަމަ ދިން ފަސް ދުވަސް ހަމަވުމުން އިތުރު 45 ދުވަހަށް ބަންދުގައި ބަހައްޓަން ނެރުނު އަމުރުގައި ބުނެފައިވާ ގޮތުން އޭނާ މީގެ ކުރިން 58 ފަހަރު ހައްޔަރުކޮށް އޭގެ ތެރެއިން 19 ފަހަރު ބަންދުގެ މުއްދަތު އިތުރުކޮށްފައިވެ އެވެ. ހައްޔަރުކުރި މައްސަލަތަކުގެ ތެރޭގައި މަސްތުވާ ތަކެއްޗާއި ވައްކަމުގެ މައްސަލަތައް ހިމެނެ އެވެ.
މުދަލަށް ގެއްލުން ދިނުމާއި ހުއްދަ ނޫން ތަނަކަށް ވަނުމާއި ވައްކަން ކުރުމުގެ ތުހުމަތަށް މިފަހަރު ހައްޔަރުކުރި އިލްހާމް ހައްޔަރުކުރީ ފުލުހުން ބުނި ގޮތުގައި ކޯސްޓްލައިންގެ އޮފީސް ތެރޭ ވައްކަން ކުރަން ވަދެ ހުއްޓަ އެވެ. އެ މީހާ ބުނެފައި ވަނީ އެތަނަށް ވަނީ ނިދަން ކަމަށާއި އަދި އެއީ ގުދަނެއް ކަމަށެވެ. އޭނާގެ ވާހަކަ ދޮގުކޮށް ކޯޓުގައި ފުލުހުން ބުނީ އެއީ އޮފީހެއް ކަމަށާއި މުހައްމަދަކީ އެތަނަށް ވަންނަން ޖެހޭ މީހެއް ނޫން ކަމަށެވެ.
ފުލުހުން އެ އޮފީހަށް ގޮސް އިލްހާމާއި އިތުރު ތިން މީހަކު ހައްޔަރުކުރީ އޮފީހުގެ ތިޖޫރީގައި ތަޅާ އަޑު އިވިގެން އޮފީހުގެ މުވައްޒަފަކު ރިޕޯޓްކުރުމުން ކަމަށާއި މިފަދަ ވައްކަންތަކުގައި އާންމުކޮށް ބޭނުންކުރާ ސާމާނު ވެސް އެ މީހުންގެ އަތުން ފެނުނު ކަމަށެވެ. އޭގެ ތެރޭގައި ދެ ދަތްގަނޑާއި ދެ ކަށިގަނޑާއި ދެ ގްރޭންޑަރު ބުރާއި ތިން އަންގި ޖޯޑުގެ އިތުރުން ވަޑާން ކައްޓަކާއި ގްރޭންޑަރެއް ހިމެނެ އެވެ.
މި ތަކެތީގެ އިތުރުން އިލްހާމް ލައިގެން ހުރި ޖިންސުގެ ޖީބުގައި ކޯސްޓްލައިން އޮފީހުގެ މާސްޓާ ކާޑެއް ވެސް އޮތް ކަމަށް ފުލުހުން ބުންޏެވެ.
މިދިޔަ ހަތްފާގައި ފުލުހުން ވަނީ ރާވައިގެން ބޮޑެތި ވައްކަންތައް ކުރާ ބަޔަކު ވެސް ހައްޔަރުކޮށްފަ އެވެ.