ފުލުހުން ހިންގި ޑްރަގް އޮޕަރޭޝަނެއްގައި ހައްޔަރުކުރި، ފުލުހުންގެ ޑްރަގް އެންފޯސްމަންޓް ޑިޕާޓްމަންޓް (ޑީއީޑީ)ގެ އޮފިސަރު ވަޒީފާއިން ވަކިކުރަން ފުލުހުންގެ ބޯޑުން ނިންމައިފި އެވެ.
ފުލުހުންގެ ބެލުމުގެ ދަށަށް ގެންދާ ޑްރަގްސްގެ ސްޓޮކް ބެލެހެއްޓުމުގެ މަސައްކަތްކުރި ހަސަން ޝުޖާއު އާއި އޭނާގެ ލޯބިވެރިޔާ މަރިޔަމް ސަފާ، 31، ހައްޔަރުކުރީ، މިދިޔަ އަހަރުގެ ނޮވެމްބަރު މަހުގެ 10 ވަނަ ދުވަހުގެ ރޭ ހުޅުމާލޭގެ އެޕާޓްމަންޓަކުންނެވެ. އެ މީހުން ތިބި އެޕާޓްމަންޓުން ވަނީ ޑްރަގް ޓްރެފިކިންގެ މިންގަނޑަށް ފެތޭ މިންވަރަށް ޑްރަގްސް ފެނިފައި ކަމަށް ކުރިން ފުލުހުން ބުނެފައިވެ އެވެ.
އިތުރު ދެ މީހަކު ވެސް ހައްޔަރުކުރި އެ މައްސަލާގައި ޝުޖާއު ސަސްޕެންޑްކުރުމަށް ފަހު، ސަސްޕެންޝަނުގެ މުއްދަތު މިހާރު ވަނީ ހަމަވެފަ އެވެ. އެހެންވެ އޭނާ މިހާރު ވަޒީފާއަށް ނުކުތް ނަމަވެސް ޒިންމާތަކުން ވަނީ އެކަހެރިކޮށްފައިކަން ވަނީ އެނގިފަ އެވެ. ވަޒީފާއިން ވަކިކުރަން ބޯޑުން ނިންމި ނަމަވެސް އެ ނިންމުން އަދި އިސްތިއުނާފު ވެސް ކުރެވޭތީ އެ މުއްދަތުގައި ވެސް ވަޒީފާއިން ވަތްކެއް ނުކުރެވޭނެ އެވެ.
މީގެ 16 އަހަރު ކުރިން ފުލުހުންގެ ވަޒީފާއަށް ވަތް ޝުޖާއު ފުލުހުންގެ ވަޒީފާއިން ވަކިކުރަން ފުލުހުންގެ ބޯޑުން ނިންމި ކަމަށް އެނގިފައި ވިޔަސް މިކަމާ ބެހޭ ގޮތުން ފުލުހުންގެ ރަސްމީ ބަހެއް އަދި ނުލިބެ އެވެ.
ފުލުހުން އޭރު ބުނެފައި ވަނީ ޝުޖާއު އަކީ އޮޕަރޭޝަންތަކުގައި އަތުލައިގަންނަ ޑްރަގްގެ ސްޓޮކް ބެލެހެއްޓުމުގެ މަސައްކަތްކުރާ މީހަކަށް ވިޔަސް އެތެރޭގެ އިންތިޒާމްތައް ހުންނަ ގޮތުން އޭނާއަކަށް ވެސް ފުލުހުންގެ ބެލުމުގެ ދަށުގައި ހުންނަ ޑްރަގްސް ނަގައި އޭގެ ބޭނުމެއް ނުކުރެވޭނެ ކަމަށެވެ.
އޭނާ ހައްޔަރުކޮށް އެކި ފަހަރުމަތިން ކޯޓަށް ހާޒިރުކޮށް ބަންދުގެ މުއްދަތު އިތުރުކުރި ނަމަވެސް ފުލުހުން އެދިގެން އަޑުއެހުންތައް ވަނީ ސިއްރުކޮށްފަ އެވެ. އެހެންވެ އޭނާ ބަންދުން ދޫކޮށްލި އިރެއް ވެސް އެނގިފައެއް ނުވެ އެވެ.