ރާއްޖެއިން ނައްތާލާފައިވާ ބައްޔެއް ކަމަށްވާ، ހިމަބިއްސަށް އައްޑޫން ކުއްޖަކު މިއަދު ޕޮޒިޓިވްވެއްޖެ އެވެ.
އެޗްޕީއޭ އިން ބުނީ އައްޑޫން ކުއްޖަކު ހިމަބިއްސަށް ޕޮޒިޓިވްވެފައިވާއިރު އެ ބަލި ޖެހިފައިވާ ކަމަށް ބެލެވޭ އިތުރު ކުއްޖަކު ދެނެގަނެވި، ކޮންފާމްކުރުމަށް ސާމްޕަލް ނަގައި ޓެސްޓް ހެދުމުގެ މަސައްކަތް ކުރަމުން އަންނަ ކަމަށެވެ.
އެޗްޕީއޭ އިން ބުނި ގޮތުގައި އެ ކުދިންގެ ގައިން ބަލި ފެތުރޭ މުއްދަތު ފާއިތުވެފައިވާތީ އެ ކުދިންގެ ފަރާތުން އެހެން މީހަކަށް އެ ބަލި ފެތުރުމުގެ ފުރުސަތެއް ނެތެވެ. އެކަމަކު އެ ބައްޔަކީ ރާއްޖެއިން ނައްތާލެވިފައިވާ ބައްޔަކަށްވާތީ، އެންމެ ކޭސްއެއް ފެނުނު ނަމަވެސް އެ ވާނީ އައުޓްބްރޭކަކަށް ކަމަށް ވެސް އެޗްޕީއޭ އިން ބުންޏެވެ.
އެހެންވެ، އެފަދަ ހާލަތްތަކުގައި އަމަލުކުރަންޖެހޭ އުސޫލުގެ މަތިން ކޮންޓެކްޓުންނާއި ބަލި ޖެހެން މެދުވެރިވި ސަބަބު ދެނެގަތުމުގެ މަަސައްކަތް އައްޑޫ އިކުއިޓޯރިއަލް ހޮސްޕިޓަލާ ގުޅިގެން ކުރަމުންދާ ކަމަށް ވެސް އެ އެޖެންސީން ބުނެ އެވެ.
ވަރަށް އަވަހަށް ވެކްސިން ދޭންޖެހޭ ފަރާތްތަކަށް ވެކްސިން ދޭން ފެށޭނެ ކަމަށް ވެސް އެޗްޕީއޭ އިން ބުންޏެވެ.
ހިމަބިހީގެ އަލާމާތްތައް:
- ހުން އައުން
- ހަމުގައި ރަތް ބިހިތަކެއް ނެގުން
- ކެއްސުން
- ނޭފަތުން އަރިދަފުސް ފޭބުން
- ލޯ ރަތްވުން
އެފަދަ އަލާމާތެއް ފެނިއްޖެ ނަމަ، ލަސްނުކޮށް ސިއްހީ ހިދުމަތްތެރިއެއްގެ ލަފާ ހޯދުމަށް އެޗްޕީއޭ އިން އިލްތިމާސްކުރެ އެވެ.
ރާއްޖެއިން ހިމަބިހި ނައްތާލީ 2018 ވަނަ އަހަރުގަ އެވެ. އެކަމަކު އޭގެ ފަހުން، 2020 ވަނަ އަހަރުގެ ތެރޭގައި ވެސް ރާއްޖެއިން ހިމަބިހީގެ ކޭސްތަކެއް ފެނިފައިވެ އެވެ.
