ނަޝީދު އިންޒާރު ދެއްވާ ކަމުގެ ތުހުމަތު: "ދަތްޕިލަ ދުއްވާލާނެ ކަމަށް ވިދާޅުވި"

ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު އެމްޑީޕީގެ މެންބަރުންނަށް އިންޒާރު ދެއްވަމުން ގެންދަވާ ކަމަށް އެ ޕާޓީގެ ބައެއް މެންބަރުން ތުހުމަތު ކުރައްވައިފި އެވެ.

މަޖިލީހުގެ ޖަލްސާތައް ކުރިޔަށް ގެންދަން ނަޝީދު ހުރަސް އަޅުއްވާ ކަމަށް ބުނެ މަޖިލީހުގައި ސަރުކާރަށް ތާއީދު ކުރައްވާ އެމްޑީޕީގެ މެންބަރުން އިއްޔެ އާއި މިއަދު ވަނީ މަޖިލީހުގެ ތަޅުމުގައި އަޑުގަދަ ކުރައްވައި ރިޔާސަތާ މެދު ކަންބޮޑުވުން ފާޅު ކުރައްވައިފަ އެވެ.

ސޯޝަލް މީޑިއާގައި އާންމުވެފައިވާ ބައެއް ވީޑިއޯތަކުން ފެންނަ ގޮތުގައި ނަޝީދާއި އެމްޑީޕީ މެންބަރުންގެ މެދުގައި ތަޅުމުން ބޭރުގައި ވެސް ގިނަ ޒުވާބުތަކެއް ހިނގި އެވެ.

"މިހާރު" އާ ވާހަކަ ދެއްކެވި އެމްޑީޕީގެ މަޖިލިސް މެންބަރަކު ވިދާޅުވީ މަޖިލީހުގެ ސައި ކޮޓަރީގައި އިއްޔެ އިހަވަންދޫ ދާއިރާގެ މެންބަރު މުހައްމަދު ޝިފާއު އަށް ވެސް ނަޝީދު އިންޒާރު ދެއްވި ކަމަށެވެ.

"އެހެން މެންބަރަކާ ވާހަކަ ދައްކަން ހުއްޓާ އައިސް ވިދާޅުވި ދަތްޕިލަ ދުއްވާލާނަމޭ،" އޭނާ ތުހުމަތު ކުރެއްވި އެވެ.

ނަޝީދު ފަހަކަށް އައިސް ވަރަށް ގިނައިން އެފަދަ ގޮތަކަށް އިންޒާރު ދެއްވާ ކަމަށް ވެސް އޭނާ ތުހުމަތު ކުރެއްވި އެވެ.

މި މައްސަލާގައި ނަން ޖަހައިގެން އިންޓަވިއު ދެއްވަން ބޭނުން ނުވަނީ އޭނާ ވިދާޅުވި ގޮތުގައި ނަޝީދަށް ތާއީދު ކުރައްވާ މެންބަރުންގެ ފުރައްސާރަ ކުރުން އިތުރަށް ބޮޑުވެގެންދާނެތީ އެވެ.

އައްޑޫ މީދޫ ދާއިރާގެ މެންބަރު ރޮޒެއިނާ އާދަމް ވެސް މިއަދު ޓުވީޓް ކުރެއްވި ވީޑިއޯއެއްގައި ވެސް ނަޝީދާއި ހުޅުމާލެ ދާއިރާގެ މެންބަރު އަލީ ނިޔާޒް އާ ދެމެދު ދެކެވުނު ވާހަކަތަކެއް ހާމަވި އެވެ.

އެ ވީޑިއޯ އިން ވިދާޅުވާ އެއްޗެއް މާ ބޮޑަށް ސާފު ނުވިޔަސް "ގަޔަށް އަރަން އުޅުނު" ވާހަކަ ނަޝީދު ވިދާޅުވި އަޑު އިވެ އެވެ.

އެކަމާ ގުޅޭ ގޮތުން ރޮޒެއިނާ ވިދާޅުވީ މަޖިލިސް ތެރޭ ނަޝީދު މެންބަރުންނަށް އިންޒާރުދީ ބިރުދައްކަމުން ދާ މައްސަލައަކީ ސީރިއަސް މައްސަލައެއް ކަމަށެވެ. މިއަދު ވެސް އެތައް މެންބަރުންނަކަށް ބިރު ދައްކައި މަޖިލީހުގެ ނައިބު ރައީސް އީވާ އަބްދުﷲ ގެ އިތުބާރު ނެތް މައްސަލަ އަނބުރާ ގެންދަން އަންގާފައިވާ ކަމަށް ރޮޒެއިނާ ވިދާޅުވި އެވެ.

މި މައްސަލާގައި ނަޝީދުގެ ބަހެއް ހޯދަން އެމަނިކުފާނަށް މެސެޖް ކުރި ނަމަވެސް އަދި އެއްވެސް ޖަވާބެއް ނުދެއްވަ އެވެ.