އިދިކޮޅު ޕީޕީއެމުން ވަކިވި އެ ޕާޓީގެ ސެނެޓް މެމްބަރު އަހުމަދު ގާލިބް މިއަދު އެމްޑީޕީއާ ގުޅިވަޑައިގެންފި އެވެ.
ގާލިބް ޕީޕީއެމުން ވަކިވެވަޑައިގަތީ މި އަހަރުގެ ރިޔާސީ އިންތިހާބަށް ކުރިމަތިލާން އަންނަ މަހުގެ 23 ގައި އިލެކްޝަންސް ކޮމިޝަނުން ހުޅުވާލަން ނިންމާފައިވާއިރު، އެ އިންތިހާބުގެ ތައްޔާރީތަކާ މެދު ވެސް އުންމީދެއް ނެތް ކަމަށް ވިދާޅުވެ އެވެ.
އެ ޕާޓީން އޭނާ ވަކިވީ މި މަހުގެ 10 ވަނަ ދުވަހު އެވެ.
މި ސަރުކާރު ހިންގާ ކޯލިޝަންގެ މައި ޕާޓީ އެމްޑީޕީން މިއަދު ބުނީ ކެލާ ދާއިރާގެ ކުރީގެ ރައީސްކަން ވެސް ކުރައްވާފައިވާ ގާލިބާ އެކު ގިނަ އަދަދެއްގެ ބަޔަކު އެމްޑީީޕީއާ ގުޅިފައިވާ ކަމަށެވެ.
ރާއްޖޭގައި އެންމެ މެމްބަރުން ގިނަ ޕާޓީ އެމްޑީޕީ އަށް ސޮއިކުރައްވައި ގާލިބުގެ ފޯމު ހަވާލުކުރެއްވީ ރައީސް އިބްރާހިމް މުހައްމަދު ސޯލިހާ އެވެ. އެ ރަސްމިއްޔާތުގައި އެމްޑީޕީގެ ޗެއާޕާސަން އަދި އިކޮނޮމިކް މިނިސްޓަރު ފައްޔާޒު އިސްމާއިލް ވެސް ބައިވެރިވެވަޑައިގަތެވެ.
އެމްޑީޕީއަށް ސޮއި ކުރެއްވުމަށް ފަހު ކުރެއްވި ޓުވީޓެއްގައި ގާލިބް ވިދާޅުވީ، އޭނާ އެ ނިންމުން ނިންމެވީ އާއިލާ އަދި ކުރިން ޕީޕީއެމްގައި ތިބި ގިނަ ބަޔަކާ އެކު ކަމަށެވެ. އެއީ ފެށުމެއް ކަމަށް ވެސް ގާލިބް ވިދާޅުވި އެވެ.
"ލީޑަރުންނަށް ވެވެނީ ވާހަކަތަކުން އެކަންޏެއް ނޫން. ކުރާ ކަންކަމާއި ނެރޭ ނަތީޖާއިން. ރައީސް އިބްރާހިމް މުހައްމަދު ސޯލިހު ވަނީ ވައުދު ފުއްދާ ލީޑަރެއް ކަން ސާބިތުކޮށްދެއްވާފައި،" ދެވަނަ ދައުރަކަށް ރައީސް އިބްރާހިމް މުހައްމަދު ސޯލިހު އިންތިޚާބު ކުރަން ގޮވާލައްވަމުން ލިޔުއްވި މެސެޖެއްގައި ގާލިބް ވިދާޅުވި އެވެ.
ހއ. ވަށަފަރާއި ކެލާ ދާއިރާއިން އެމްޑީޕީ އަށް އިތުރު އެތައް މެމްބަރުންނެއް ހޯއްދަވައި ދެއްވާނެ ކަމަށް ވެސް އޭނާ ވިދާޅުވި އެވެ.
