އައިޖީއެމްއެޗްގައި މަސައްކަތްކުރި ފިލިޕީންސްގެ ނަރުހެއް ކަމަށްވާ މޭރީ ގްރޭސް މަރާލި މައްސަލާގައި ދައުވާލިބޭ އޭނާގެ ފިރިމީހާ މާވިން ބަންދަށް ލުޔެއް ނުދެވޭނެ ކަމަށް ކްރިމިނަލް ކޯޓުން ނިންމައިފި އެވެ.
އޮކްޓޫބަރު، 2021 ގައި މޭރީ މަރާލި މައްސަލާގައި އެނގިހުރެ މީހަކު މެރުމުގެ ދައުވާ މާވިންގެ މައްޗަށް ދައުވާ ކުރާއިރު ދިވެހި ނަރުހެއް ކަމަށްވާ ހަލީމަތު ލަމްހާގެ މައްޗަށް ކުރަނީ އެކަމުގައި ބައިވެރިވުމުގެ ދައުވާ އެވެ. އަދި އިންޖެކްޝަންތަކެއް ގެންގުޅުނު ކަމަށް ލަމްހާގެ މައްޗަށް އިތުރު ދެ ދައުވާއެއް ކުރެ އެވެ.
އެ މައްސަލާގައި މާވިން އާއި ލަމްހާ ޝަރީއަތް ނިމެންދެން ބަންދުގައި ބައިތިއްބަން އަމުރު ކޮށްފައި ވަނިކޮށް ކޯޓުން މިއަދު ވަނީ ޝަރުތުތަކާ އެކު ތިން މަސް ދުވަހަށް ލަމްހާ ވަނީ ބަންދުން ދޫކޮށްލައިފަ އެވެ. ނަމަވެސް ކޯޓުން މިއަދު ނިންމީ މާވިންގެ ބަންދަށް ލުޔެއް ނުދެވޭނެ ކަމަށެވެ.
ލަމްހާ ދޫކޮށްލީ ރޭގަނޑުގެ ވަކި ވަގުތުތަކެއްގައި ގެއިން ބޭރަށް ނުނިކުތުމާއި މާލެއިން ބޭރަށް ދާނަމަ ހުއްދަ ހޯދުމަށް ޝަރުތުކޮށްފަ އެވެ.
އެ މައްސަލާގައި މިހާރު ކުރިއަށް ދަނީ ހެކިބަސް ނެގުމުގެ މަރުހަލާ އެވެ.