ކ. މާފުށީގައި މިއަދު ފަތިހު ބޮޑު މާރާމާރީއެއް ހިންގައި، މީހަކު ޒަހަމްކޮށްލައިފި އެވެ.
ފުލުހުން ބުނިގޮތުގައި އަނިޔާވެފައިވަނީ އުމުރުން 34 އަހަރުގެ ދިވެހި ފިރިހެނަކަށެވެ. އޭނާ އަށް މާފުށީ ހޮސްޕިޓަލްގައި ފަރުވާދިނުމަށް ފަހު، މިހާރު ވަނީ މާލެ ގެނެސް ޓްރީޓޮޕް ހޮސްޕިޓަލްގައި ފަރުވާދޭން ފަށައިފަ އެވެ.
އެ މީހާއަށް ލިބުނު އަނިޔާގެ ތަފުސީލެއް އަދި ނުލިބެ އެވެ. ނަމަވެސް، އެ މާރާމާރީގައި އެ މީހާގެ ނޭފަތް މައްޗަށް ވަރަށް ބޮޑަށް އަނިޔާވެފައި ވެ އެވެ.
މާރާމާރީ ހިނގަން މެދުވި ސަބަބެއް ސާފެއް ނުވެ އެވެ.
ފުލުހުން ބުނީ މާރާމާރީއާ ގުޅިގެން ދެ ފިރިހެނަކު ހައްޔަރުކޮށްފައިވާ ކަމަށާއި ތަހުގީގަށް މިހާތަނަށް އެނގުނު މައުލޫމާތަށް ބަލާއިރު އެއީ މާރާމާރީ ހިންގުމުގައި އަމަލީ ގޮތުން ބައިވެރިވި ދެ މީހުން ކަމަށެވެ.